Read KIMERU BIBLE PROTESTANT EDITION Joh 16 Bible Online

Joh 16 - KIMERU BIBLE PROTESTANT EDITION bible

Joh 16

¹“Ndabwîra mantû jaja jonthe, nîkenda bûtîgatige gwîtîkia.

²Antû bakabwînga kîromberoone na kagiita nî keejîte rîrîa muntû wonthe ûrîa ûkabûûraga, akathûgaania nî Mûrungu agûtumîkîra.

³Bakathithia ûu nîûntû batiijî Baaba kana baamenya.

⁴Ndabwîra mantû jau, nîkenda rîrîa jagakarîka bûrîrîkana atî nî ndaarî ndîkûbûmenyithia mantû jau. Ntaabwîrîre mantû jau kuuma kîambîrîria, nîûntû ndîreethagîrwa ndî amwe naabûî.

⁵“Îndî nandî mbîtîte kîrî ûrîa waantûmîre, na gûtî weenu ûkûmbûûria: ‘Nîkû weta?’

⁶Îndî nîûntû ndîkûbwîra mantû jaja, bûkwigua bûbûûî mono.

⁷Ga nkûbwîra na mma atî, nî kaaba mbîte nîkenda bûgunîka nîûntû ndarega gwîta, Mûeejani kîrîra atîîja kîrî buî. Îndî ndeeta nkamûtûma kîrî buî.

⁸Rîrîa akeeja, akamenyithia nthîgûrû meeyia jaayo na waagîru na ûrîa Mûrungu akamîgambithia;

⁹nthîgûrû îkamenyithua meeyia jaayo nîûntû antû nî baregere kûmbîtîkia;

¹⁰nthîgûrû îkamenyithua mantû jegiî waagîru nîûntû nî mbîtîte kîrî Baaba, na bûtîmbona kaîrî;

¹¹nthîgûrû îkamenyithua mantû jegiî îgamba nîûntû mwathi wa nthîgûrû îîjî nî athîrîtie kûgambithua.

¹²“Ndî na mantû jangî jamaingî ja kûbwîra, îndî nandî bûtîûmba kûjoomîîria jonthe.

¹³Rîrîa Roho ûu wa ûûma akeeja, akabûritana ûûma bûnthe. Nîkwîthîrwa atîtua kwaragia na bwaawe wengwa îndî agatua kwaragia mantû jonthe jarîa akaigua na abwîrage mantû jarîa jakeeja.

¹⁴We agankumithia, nîûntû akabwîraga mantû jarîa aîgîtue kuuma kîrî ni.

¹⁵Bionthe birîa Baaba arî nabio, nî biaakwa; nîkîo gîtûmîre mbwîra atî Roho Ûmûtheru akabwîraga mantû jarîa akaigagua kuuma kîrî ni.

¹⁶“Nyuma ya kagiita gagakai bûtîmbona. Ningî nyuma ya kagiita gagakai bûkambona kaîrî.”

¹⁷Tontû bûû, bamwe ba aritwa baawe baroorania, “Nîatîa ûû agûtwîra: ‘Nyuma ya kagiita gagakai bûtîmbona. Ningî nyuma ya kagiita gagakai bûkambona kaîrî.’ Ningî akauga ‘Tontû mbîtîte kîrî Baaba?’”

¹⁸Ningî baroorania, “Rîrîa akuuga ‘Nyuma ya kagiita gagakai rî, nîatîa agûtwîra?’ Tûtîkûmenya ûrîa akuuga.”

¹⁹Jesû akûmenya nî beendaga kûmûûria gîtûmi kîa ûrîa aarî akuuga arabeera, “Ka bûkûûrania gîtûmi kîa: ‘Nyuma ya kagiita gagakai bûtîmbona. Ningî nyuma ya kagiita gagakai bûkambona kaîrî?’

²⁰Ga nkûbwîra na mma atî, bûgakaya na bûrîre, îndî nthîgûrû îkagwîrua. Buî bûkaithikîîra îndî kwithikîîra kweenu gûkagarûka kwee kûgwîrua.

²¹Rîrîa mûka eethagîrwa arî akuî kûewa kaana, nî aigagua rwakaî, îndî athiria kûewa kaana, atîririkanaga rwakaî rûu kaîrî nîûntû bwa kûgwîrîrua kaana kau gaaciarwa nthîgûrûûne.

²²Nandî buî nî bwithikîrîte; îndî nkabwona kaîrî, na nkoro cieenu igwîrue, na gûtî we ûkabûtuunya kûgwîrua kweenu.

²³Îgiita rîu gûtîkîo bûkandomba. Ga nkûbwîra na mma atî, kîrîa kîonthe bûkaromba Baaba bûgîtumagîra riîtwa rîaakwa akabûnenkera.

²⁴Mwanka nandî gûtîkîo bûraromba bûgîtumagîra riîtwa rîaakwa. Rombeni na bûkoona kîrîa bûkûromba nîkenda bwîthîrwa bûrî na kûgwîrua kûrîa gûtîthiraga.

²⁵“Ndabwîra mantû jaja ngîtumagîra ngerekano. Kagiita nî keejîte rîrîa ntîbwarîria ngîtumagîra ngerekano kaîrî, îndî nkabwîraga mantû jegiî Baaba carûrûkû.

²⁶Rîrîa ntukû îîu îgakinya bûkaromba into bionthe bûgîtumagîra riîtwa rîaakwa. Ni ntîkûbwîra atî nkabûrombera noo mbi kîrî Baaba,

²⁷nîkwîthîrwa Baaba wengwa nî abwendeete, na buî nî bûmpendeete, na nî bweetîkîrie atî ndaumîre kîrî Baaba.

²⁸Ni ndaumîre kîrî Baaba, na ndîreeja nthîgûrûûne na nandî ga mpuumîte nthîgûrûûne kaîrî ncokete kîrî Baaba.”

²⁹Rîu aritwa baawe baramwîra, “Nandî nî ûkwaria carûrûkû ûtîgûtumîra ngerekano.

³⁰Nandî nî tûkûmenya atî gwe nî wiijî mantû jonthe, na gûtî na gîtûmi kîa muntû noo ûrîkû akûûrîa kîûria. Tontû bûû, nî tûgwîtîkia atî waumîre kîrî Mûrungu.”

³¹Jesû arabacokeria, “Nandî bûgwîtîkia?

³²Îgiita nî rîîjîte na rîgûkinya, rîrîa bûkanyaganua o muntû eete kwaawe, na bûntige ndî ninka. Îndî ntîîthîrwa ndî ninka, nîûntû Baaba arî amwe naani.

³³Ndabwîra mantû jaja, nîkenda bwîthîrwa bûrî na thîîrî bûrî ndeene yaakwa. Bûkathangîka mono bûrî nthîgûrûûne îndî ûmîîrieni nîûntû ni nî ncindîte nthîgûrû.”