Read KIMERU BIBLE PROTESTANT EDITION Joh 17 Bible Online

Joh 17 - KIMERU BIBLE PROTESTANT EDITION bible

Joh 17

¹Rîrîa Jesû aathirîrie kwaria nteto îîu, aararaithîîria bwa îgûrû arauga, “Baaba, îgiita rîgûkinya. Kumithia Mûtaana waaku, nîkenda nawe agûkumithia.

²Nîkwîthîrwa nî waanenkeere Mûtaana waaku inya ya kwatha antû bonthe nîkenda akaa bonthe barîa waamûnenkeere ûtûûro bwa kenya na kenya.

³Nabu ûtûûro bwa kenya na kenya nî atî antû bakûmenye gwe gwenka ûrîa ûrî Mûrungu wa mma na bamenye Jesû Kristû ûrîa gwe waatûmîre.

⁴Nî ngûkumithîtie aja nthîgûrûûne nîûntû nî nthirîtie kûrita ngûgî irîa wantûmîre ndita.

⁵Baaba, nandî nkumithia mbere yaaku na ûkumio bûrîa ndaarî nabu ndî kîrî gwe mbere ya nthîgûrû yûûmbwa.

⁶“Nî ntûmîte ûmenyekana kîrî antû barîa wampeere kuuma nthîgûrûûne. Bo baarî baaku îndî ûrampa bo. Nabo nî bathîkîrîte rûteto rwaaku.

⁷Nandî nî bamenyete atî kîonthe kîrîa wampeere kiumîte kîrî gwe.

⁸Nîkwîthîrwa nî mbeerîte nteto irîa waambîrîre na baaciîtîkia. Ningî nî baijî na mma atî mpuumîte kîrî gwe na beetîkia atî nîgwe waantûmîre.

⁹Bau nîbo nkûrombera, ntîkûrombera nthîgûrû îndî nî barîa wampeere, nîûntû nî baaku.

¹⁰Barîa bonthe ndî nabo nî baaku, na baaku nî baakwa na nî nkumithîtue ndeene yaao.

¹¹Nandî ka mbîjîte kîrî gwe, ntîthîrwa ndî nthîgûrûûne kaîrî îndî bo barî nthîgûrûûne. Baaba Ûmûtheru, bamenyeere na inya ya riîtwa rîaaku, narîo nî riîtwa rîrîa wampeere, nîkenda bagakara barî gîntû kîmwe ta ûrîa kinya tuî tûrî gîntû kîmwe.

¹² Rîrîa ndaarî nabo, nî ndabamenyagîîra na inya ya riîtwa rîaaku rîrîa wampeere. Nî ndabakarîrie na gûtî noo ûmwe waao waûra, tiga mûtaana ûrîa waarî wa kûûra nîkenda Maandîko joojûra.

¹³Îndî nandî ka mbîjîte kîrî gwe, na ndiuga mantû jaja ndî nthîgûrûûne nîkenda bagwîrua ta ûrîa ngwîrîtue.

¹⁴Nî mbanenkerete rûteto rwaaku, na nthîgûrû yabathûûra nîûntû batî ba nthîgûrû, o ta ûrîa kinya ni ntî wa nthîgûrû.

¹⁵Ntîkûromba nîkenda ûbarita nthîgûrû, îndî nîkenda ûbamenyeera kuuma kîrî ûrîa mûûî.

¹⁶Bo tî ba nthîgûrû, o ta ûrîa kinya ni ntî wa nthîgûrû.

¹⁷Batherie na ûûma, nîûntû rûteto rwaaku nîru ûûma.

¹⁸O ta ûrîa gwe waantûmîre nthîgûrûûne, nou kinya ni nkûbatûma nthîgûrûûne.

¹⁹Ni nî nkwinenkanîra buru kîrî gwe nîûntû bwaao, nîkenda kinya bo bainenkanîra kîrî ûûma buru.

²⁰“Tî baba bonka nkûrombera, îndî ndîrombera kinya barîa bakambîtîkia baigua ntûmîîri yaao.

²¹Ningî ndîromba nîkenda bonthe baa gîntû kîmwe. Baaba, o ta ûrîa ûrî ndeene yaakwa naani ndeene yaaku, ndîromba kinya bo beethîrwe barî gîntû kîmwe ndeene yeetû nîkenda nthîgûrû îîtîkia atî nîgwe waantûmîre.

²²Nî ndaabaeere ûkumio o bûrîa wampeere, nîkenda kinya bo baa gîntû kîmwe o ta ûrîa kinya gwe naani tûrî gîntû kîmwe.

²³Ni nî mbîthagîrwe ndî ndeene yaao, naagwe ûrî ndeene yaakwa nîkenda bonthe baa gîntû kîmwe buru, na nthîgûrû imenya atî nîgwe waantûmîre, na atî nî ûbeendeete o ta ûrîa ûmpendeete.

²⁴“Baaba! Ndîenda barîa wampeere kinya bo bakarage amwe naani arîa ndî, nîkenda boona ûkumio bwaakwa bûrîa wampeere nîûntû nî wampendeete mbere ya nthîgûrû yûûmbwa.

²⁵Baaba Ûmwagîru, nthîgûrû îtîkwijî, îndî ni nî nkwijî na aritwa baba nî baijî atî nîgwe waantûmîre.

²⁶Ni nî ndaakûmenyithanîrie kîrî bo na ngeeta na mbere gûkûmenyithania nîkenda wendo bûrîa ûmpendeete nabu bwîthîrwa bûrî ndeene yaao, naani ndî ndeene yaao.”