Read KIMERU BIBLE PROTESTANT EDITION Joh 18 Bible Online

Joh 18 - KIMERU BIBLE PROTESTANT EDITION bible

Joh 18

¹Jesû akûthiria kûromba ûu, nî aumîre aû baarî arî na aritwa baawe baraûna mûguuru jwa Kidironi na bareeta rûteere rûrîa rûngî arîa kwaarî na kamuunda na baratonya ku.

²Kinya Judasi ûrîa waamûkunyanîîre, nî aijî antû au nîûntû Jesû nî eetaga o jamaingî arî amwe na aritwa baawe.

³Tontû bûu, Judasi aratongeeria gîkundi kîa asikarî na akaria ba kîûrû barîa baatûmi nî athînjîri-Mûrungu barîa anene na Afarisayo, bareeta kamuundeene bakamatîte taawa na inyinga na mathaga ja ndwaa.

⁴Jesû akîmenyaga bwega ûrîa kwaarî gûkarîke, nî aumîîre na arabooria, “Nûû bûgûcwaa?”

⁵Nabo baramûcokeeria, “Nî Jesû wa Nazarethi.” Jesû arabeera, “Nî ni we.” Judasi ûrîa waamûkunyanîîre, nî aarî amwe nabo.

⁶Rîrîa Jesû aabeerîre, “Nî ni we,” nî bacokere na nyuma na baragwa nthî.

⁷O kaîrî Jesû arabooria atîrî, “Nûû bûgûcwaa?” Nabo baramûcokeria, “Nî Jesû wa Nazarethi.”

⁸Jesû arabeera, “Nkûthiria kûbwîra atî nî ni we. Këethîra nî ni bûgûcwaa, rekaneni na baba baciîtîre.”

⁹Aaugîre ûu nîkenda jarîa aarî akuuga mbereene joojûra, “Kîrî barîa wampeere, gûtî no ûmwe waaûra.”

¹⁰Tontû Simioni Peterû nî aarî na rûchiû, ararûcinûra na aragiita gûtû kwa ûrîo kwa nkombo ya mûthînjîri-Mûrungu ûrîa mûnene. Nkombo îîu yeetagwa Maluko.

¹¹ Rîu Jesû areera Peterû, “Cokia rûchiû rwaaku kîûene. Ka ûkwenda ndega kûnyua gîkombe kîrîa Baaba aampeete.”

¹²Tontû bûû gîkundi kîa asikarî na mûrûngamîîri waao na atongeeria ba Ayahudi baragwata Jesû na baramûtheeka.

¹³Rîu baramwikia kîrî Anasi mbere nîûntû aarî mûthoni wa Kaifa, ûrîa waarî mûthînjîri-Mûrungu ûrîa mûnene mwaka jûu.

¹⁴ Kaifa nîwe waarî akwîra Ayahudi atî nî kwagîrîte muntû ûmwe akue nîûntû bwa antû bonthe.

¹⁵Simioni Peterû amwe na mûritwa ûngî nî baathingatîre Jesû. Tontû mûritwa ûu nî aijîkeene nî mûthînjîri-Mûrungu ûrîa mûnene, nî aakûrûkanîrie na Jesû kîaragoone kîa mûthînjîri-Mûrungu ûrîa mûnene,

¹⁶îndî Peterû aratigwa arûngami oome akuî na mpingîro. Tontû bûû, mûritwa ûu ûrîa waijîkeene kîrî mûthînjîri-Mûrungu ûrîa mûnene araumagara oome na araaria na mûka ûrîa wakaragia mpingîro, arakûrûkia Peterû ndeene.

¹⁷Mûka ûu wakarîtie mpingîro arooria Peterû atîrî, “Kinya gwe ûtî ûmwe wa aritwa ba muntû ûûjû?” Peterû aramwîra, “Arî.”

¹⁸Nthûûmba na akaria nî baarî bagwakia mwanki jwa makara tontû nî kwaarî na mpio na barakara au bagîotaga mwanki. Peterû nawe ararakara amwe nabo agîotaga mwanki.

¹⁹Rîu, mûthînjîri-Mûrungu ûrîa mûnene, arooria Jesû mantû jegiî aritwa baawe na ûritani bwaawe.

²⁰Jesû aramûcokeria, “Ndîraaragia na antû magiita jonthe nticiithîte na nkaritana iromberoone, na kîûrûûne kûrîa Ayahudi bonthe bacemanagia na gûtî ûntû ndauga na witho.

²¹Nîkî ûkûmbûûria biûria? Ûûria antû barîa baraigagua nkîaria mantû jarîa ndîrabeeraga. Bo nî baijî jarîa mbugîîte.”

²²Rîrîa athirîrie kuuga ûu, mûkaria ûmwe ûrîa waarûngi au araringa Jesû rûî arauga, “Ûu nîu ûbuîrîte gûcokeria mûthînjîri-Mûrungu ûrîa mûnene?”

²³Jesû aramûcokeria, “Këethîra nkwaria mantû jamathûûku onania ûthûûkû bwaajo. Îndî këethîra nî ûûma ndaaria, nîkî waandinga?”

²⁴Rîu Anasi araikia Jesû atheeki kîrî mûthînjîri-Mûrungu ûrîa mûnene weetagwa Kaifa.

²⁵Îgiita rîu Peterû nî arûngi agîotaga mwanki na barîa baarî amwe nawe nî baamûûrîrie, “Kinya gwe ûtî ûmwe wa aritwa baawe?” Nawe arakaana arauga, “Arî.”

²⁶Ûmwe wa nthûûmba cia mûthînjîri-Mûrungu ûrîa mûnene wa ndûgû cia muntû ûrîa Peterû aarî akûgiita gûtû aramwîra, “Ntîkwonere kamuundeene ûrî amwe na Jesû?”

²⁷O kaîrî Peterû arakaana na ntûti îmwe nchamba ya ngûkû îragamba.

²⁸Rîu baratongeeria Jesû kuuma gwa Kaifa baramwikia kîaragoone kîa mûnene Pilatû gîeetagwa Praetoria. Kwarî rûkîîrî, nabo Ayahudi batatonyere Praetoria batîkagwatwe nî mûgiro, na mûgiro jûu jûrigîîria barîa kîatho kîa Pasaka.

²⁹Tontû bûû, Pilatû araumagara na areeta kîrî bo arauga, “Nî ûntû bûrîkû bûkûthitangîra muntû ûûjû?”

³⁰Baramûcokeria, “Këethîra muntû ûûjû ataathithagia mantû jamathûûku, tûtîngîmûreeta kîrî gwe.”

³¹Pilatû arabeera, “Mûjûkieeni bwingwa na bûkamûgambithie kûringana na Waatho bweenu.” Ayahudi baramûcokeria, “Waatho bûtîtwîtîkîîrîtie tûtuîra muntû îgamba rîa kûûragwa.”

³² Kwathithîkîre ûu nîkenda nteto irîa Jesû aarî akwaria cia kwonania ûrîa agaakua ciûjûra.

³³Pilatû nî aatonyere Praetoria kaîrî na areeta Jesû aramûûria, “Gwe nîgwe mûnene wa Ayahudi?”

³⁴Jesû aramûcokeria, “Kîûria kîu kiumanîtie naagwe, kana nî antû bangî bakwîrîte nteto imbegiî?”

³⁵Pilatû aramûcokeria, “Ka ûûni ndî Mûyahudi? Nî antû ba mûgongo jweenu na athînjîri-Mûrungu barîa anene bakûreetete kîrî ni. Nîatîa ûthithîtie?”

³⁶Rîu Jesû aramûcokeria, “Ûnene bwaakwa tî bwa nthîgûrû îîjî. Këethîra ûnene bwaakwa nî bwa nthîgûrû îîjî, nî mma athingati baakwa barîngîndwîrîîra ntîkanenkanîrwe kîrî Ayahudi. Îndî nandî ûnene bwaakwa tî bwa gûkû nthîgûrû.”

³⁷Rîu Pilatû aramwîra, “Anga gwe ûrî mûnene?” Nawe Jesû aramûcokeria, “Gwe nîgwe ûkuuga atî ndî mûnene. Ndaaciarîrwe nîûntû bwa gîtûmi kîu na ndîreeja nthîgûrû gûkûûjîîra ûûma. Muntû wonthe ûrîa ûrî wa mma, nî anthikagîîra.”

³⁸Pilatû aramûûria, “Mma nîmbi?” Pilatû akûthiria kuuga ûu, nî aumagarîre kaîrî na areeta kîrî Ayahudi na arabeera, “Ni ntîkwona ûntû bwa kûgambithîria muntû ûûjû.

³⁹Îndî nî bûmenyeretie kûmbûûria mbûthaûrîre muntû ûmwe îgiita rîa Pasaka. Nî bûkwenda mbûthaûrîra Mûnene wa Ayahudi?”

⁴⁰Rîu bararinga gîtuma kaîrî barauga, “Arî, tûtîkwenda ûu, tûrîenda Baraba!” Baraba aarî mûtuunyani.