Read KIMERU BIBLE PROTESTANT EDITION Joh 2 Bible Online

Joh 2 - KIMERU BIBLE PROTESTANT EDITION bible

Joh 2

¹Mûthenya jwa îthatû nî kwaarî na mûranû ntûûreene ya Kana, îrîa yaarî Galili na ng'ina wa Jesû nî aarî ku.

²Kinya Jesû na aritwa baawe nî beeti mûranûûne jûu.

³Rîrîa ndibei yaathirîre, ng'ina wa Jesû aramwîra, “Batî na ndibei!”

⁴Jesû aramûcokeria, “Mwekûrû, nîatîa mantû jau jambegiî? Îgiita rîaakwa rîtîrakinya.”

⁵Rîu ng'ina areera nthûûmba atîrî, “Thithieni o bunthe bûrîa akabwîra.”

⁶Au nî kwaarî na nyongû ithanthatû, na o îmwe yaacio îrîngîkîrwa lita îgaana cia rûûjî. Nyongu iu cieki au nîûntû bwa mambura ja Ayahudi ja kwitheria.

⁷Jesû nî aabeerîre atîrî, “Ûjûrieni nyongû rûûjî.” Nabo baraciûjûria ndoo.

⁸Rîu Jesû arabeera, “Nandî taeni bwikîrie ûrîa ûrûngamîrîte kîatho.” Nabo baramwikîria.

⁹Rîrîa ûrîa warûngamîrîte kîatho aacemere rûûjî rûu, areethîra nî rwaarî rûkûgarûka rwaa ndibei. We ataijî kûrîa yaumîte îndî nthûûmba irîa ciataîte rûûjî rûu nî ciaijî. Tontû bûû, areeta mûjûkania na

¹⁰aramwîra, “Antû bonthe baambaga gûkundania ndibei îrîa njega na antû bathiria kûnyua mono akarita îrîa îtî înjega îndî gwe wîkîre îrîa njega mwanka nandî.”

¹¹Gîkî nîkîo kîama kîa mbere kîrîa Jesû aaringîre arî Kana ya Galili. Nî oonanîrie mwago jwaawe na aritwa baawe baramwîtîkia.

¹² Jesû akûthiria kûthithia ûu, nî eenamîre Kaperinaumu arî na ng'ina na ataana ba ng'ina na kinya aritwa baawe na barakara ku ntukû inkai.

¹³ Tontû thigûûnkû ya Ayahudi îrîa îtagwa Pasaka nî yaarî akuî gûkinya, Jesû nî eetîre Jerusalemu.

¹⁴Agûkûrûka kîûrûûne nî eethîîre antû bakîendagia ng'ombe na ng'ondu na ijea na bangî baaringaga biashara ya gûkûranagia mbeecha irîa îtatumagîrwa kîûrûûne na irîa ciatumagîrwa kîûrûûne.

¹⁵Nî aathithîrie mûcarica jwa mîrigi, na araûûra antû bau bonthe amwe na ng'ondu na ng'ombe ciaao na araturûra meetha cia barîa baakûranagia mbeecha na arabeenga kîûrûûne.

¹⁶Areera barîa beendagia ijea, “Riteeni into bibi aja. Tigeeni kweethia nyomba ya Baaba nyomba ya biashara.”

¹⁷ Aritwa baawe nî baaririkanîre atî Maandîko nî jaugîîte: “Îgwe Mûrungu, wendo bwaakwa nîûntû bwa nyomba yaaku nî bûmpîthagia ndeene ta mwanki.”

¹⁸Ayahudi bamwe nî boorîrie Jesû atîrî, “Nî kîama kîrîkû ûkaringa nîkenda ûtwonia atî ûrî na waatho bwa kûthithia mantû jau?”

¹⁹ Jesû arabeera, “Koborangeni kîûrû gîkî, naani ngaagîaka na mîthenya îthatû.”

²⁰Rîu Ayahudi barauga, “kîûrû gîkî kîajûkîrie mîaka mîrongo îna na îtantatû gûgîaaka, nagwe nî ûkuuga ûgaagîaka na ntukû îthatû?”

²¹Îndî rîrîa Jesû aaragia mantû jegiî kîûrû, aaragia mantû jegiî mwîrî jwaawe.

²²Rîrîa Jesû aariûkîre kuuma kîrî akuû, aritwa baawe nî baaririkanîre atî nî aarî akuuga ûu. Nabo bareetîkia Maandîko na mantû jarîa Jesû augaga.

²³Rîrîa Jesû aarî Jerusalemu îgiita rîa thigûûnkû ya Pasaka, antû babaingî nî baamwîtîkîrie nîûntû bwa kwona biama birîa aaringaga.

²⁴Îndî Jesû ataabetîkîrie nîûntû nî aabaijî bwega.

²⁵Tontû Jesû nî aijî antû bonthe bwega, ataarî na ûbatu bwa kwîrwa ûntû bwegiî muntû kinya ûmwe nîûntû nî aijî kîrîa kîaarî nkoroone cia antû.