Read KIMERU BIBLE PROTESTANT EDITION Joh 20 Bible Online

Joh 20 - KIMERU BIBLE PROTESTANT EDITION bible

Joh 20

¹Ntukû ya mbere ya kiumia, Maria Magidalina nî eetîre kaburiine rûkîîrî kaiinda, kûrî na muundu na aroona iiga rîriti mûromoone jwa kaburi.

²Tontû bûû, aroogîa na areeta kîrî Simioni Peterû na mûritwa ûngî ûrîa Jesû eendeete na arabeera atîrî, “Nî baritîre Mwathani kaburiine, na tûtiijî kûrîa bamwîkîte.”

³Peterû amwe na mûritwa ûu ûngî bareeta kaburiine.

⁴Bobaîrî nî baamatûkîre îndî mûritwa ûu ûngî aroogîa nkûrûki ya Peterû na arakinya kaburiine arî mbere.

⁵Rîrîa aakuamîre na arategeera ndeene nî oonere chuka injerû cia bamba îndî atatonyere ndeene.

⁶Rîu Simioni Peterû areeta amûthingatîte na aratonya kaburiine na aroona chuka iu njerû cia bamba irî nthî.

⁷Ningî nî oonere gîtambaa kîrîa Jesû aaogi nakîo mûtwe. Gîtambaa kîu gîtaarî amwe na chuka iu îndî nî gîaakûnjanîtue na kîaarî antû aakîo mwanya.

⁸Rîu mûritwa ûu ûngî ûrîa wakinyîre kaburiine mbere aratonya na aroona na areetîkia.

⁹Îgiita rîu bataarî bagûciûkîrwa bamenya Maandîko jarîa jaugaga atî no mwanka ariûke kuuma kîrî akuû.

¹⁰Rîu aritwa baraana kwaao.

¹¹Maria nî aarûngi oome ya kaburi akîrîraga. Nawe akîrîraga o ûu, nî akuamîre na arategeera kaburiine.

¹²Kûu ndeene nî oonere araîka baîrî beekîrîte nguû injerû bakari nthî arîa mwîrî jwa Jesû jwaarî: ûmwe aakari nthî arîa mûtwe jwaarî na ûngî arîa magûrû jaarî.

¹³Araîka bau nî baamûûrîrie, “Mwekûrû, nîmbi ûkûrîrîra?” Nawe arabacokeria, “Tontû nî bajûkîrie Mwathani waakwa na ntiijî kûrîa bamwîkîte.”

¹⁴Athiria kuuga ûu, nî aaciûgûrîre na aroona Jesû arûngi au îndî atîmenye këethîra nî Jesû.

¹⁵Jesû aaramûûria, “Mwekûrû, nîmbi ûkûrîrîra? Nûû ûgûcwaa?” Akîthûgaanagia atî nî mûmenyeeri wa muunda, Maria aramwîra, “Mûkaathe, këethîra nîgwe ûmûritîte aja, mbîîra nîkû ûmwîkîte, nîkenda mûjûkia.”

¹⁶Jesû aramwîta, “Maria.” Nawe aramwerekera na aramwîra na Kîhibirania, “Raboni.” Ûu nî ta kuuga Mûritani.

¹⁷Jesû aramwîra, “Ûkándingithia nîûntû ntîraamba gwitia kîrî Baaba. Îndî îta kîrî ataana ba baaba na ûbeere ndaitia îgûrû kîrî Baaba na noowe Abaagu, kîrî Mûrungu waakwa na noowe Mûrungu weenu.”

¹⁸Tontû bûû, Maria Magidalina areeta na areera aritwa atî akwona Mwathani na nîwe waarî akûmwîra mantû jau.

¹⁹Ûgoro bwa ntûkû îîu ya mbere ya kiumia, aritwa nî baacemenie nyomba îmwe na nî baaingîte mîrango nîûntû nî baakîraga atongeeria ba Ayahudi. Îndî Jesû nî eetîre na ararûngama gatîgatî kaao na arabeera, “Thîîrî îrokara naabuî.”

²⁰Athiria kuuga ûu, araboonia njara ciaawe na rwaru rwaawe. Nabo aritwa baragwîrua mono bakwona Mwathani.

²¹Jesû arabeera kaîrî, “Thîîrî îrokara naabuî. O ta ûrîa Baaba aantûmîre nou kinya ni nkûbûtûma.”

²²Athiria kuuga ûu, arabauîîra mîrukî arauga, “Jûkieni Roho Ûmûtheru.

²³ Këethîra bûkarekera antû meeyia, bakarekerwa na këethîra bûtîbarekera batîrekerwa.”

²⁴Ûmwe wa aritwa barîa îkûmi na baîrî ûrîa weetagwa Toma kana Maatha, ataarî amwe nabo rîrîa Jesû eetîre kîrî bo.

²⁵Tontû bûû, aritwa barîa bangî baramwîra, “Nî twonere Mwathani.” Îndî we arabeera, “Nkarega kwona irema bia mîchumaarî njareene ciaawe na ndingithia mamuntîrwa ja mîchumaarî na kaara gaakwa na ncoka ndingithia rwaru rwaawe na njara yaakwa, ntîtîkia.”

²⁶Nyuma ya ntukû inyanya aritwa nî baarî nyomba kaîrî na Toma nî aarî amwe nabo. Mîrango nî yaingi îndî Jesû areeta na ararûngama gatîgatî kaao arauga, “Thîîrî îrokara naabuî.”

²⁷Rîu areera Toma, “Toonyia kîara gîaaku aja na woone njara ciaakwa na ûreete njara yaaku ûringithie rwaru rwaakwa. Tiga kûrega gwîtîkia îndî îtîkia.”

²⁸Toma aramûcokeria, “Mwathani waakwa na Mûrungu waakwa!”

²⁹Jesû aramwîra, “Ka weetîkia nîûntû ûkûmbona? Nî batharimi barîa beetîkagia batîoneete.”

³⁰Jesû nî aaringîre biama bingî bibingî aritwa baawe bakîonaga. Biama biu bitîaandîki yukuune rîrî.

³¹Îndî biama bibi biaandîki nîkenda bwîtîkia atî Jesû nî Mesia, Mûtaana wa Mûrungu na nîkenda bweetîkia bwoona ûtûûro riîtweene rîaawe.