Read KIMERU BIBLE PROTESTANT EDITION Joh 21 Bible Online

Joh 21 - KIMERU BIBLE PROTESTANT EDITION bible

Joh 21

¹Nyuma ya mantû jau, Jesû nî aacionanîrie kaîrî kîrî aritwa baawe rûteere rwa îria rîa Tiberia. Ûjû nîu gwakarîre:

²Simioni Peterû na Toma, ûrîa weetagwa Maatha, na Nathanieli, ûrîa wa Kana ya Galili, na ataana baîrî ba Zebedii, na aritwa bangî baîrî baawe nî baarî amwe.

³ Simioni Peterû nî abeerîre atîrî, “Ndeeta kûgwatia makûyû.” Nabo baramwîra, “Tûgeetania naagwe.” Rîu bareeta baraitia gîtarûûne, îndî ûtukû bûu bunthe bataagwatia noo mbi.

⁴Rûkîîrî gûgîkea, Jesû ararûûngama rûteere rwa îria, îndî aritwa bataamenyaga atî nî Jesû.

⁵Rîu Jesû arabooria, “Ciana, gûtî kîo bûragwatia?” Baramûcokeria, “Arî, gûtî kîo tûragwatia.”

⁶ Jesû arabeera, “Gereni neeti rûteere rwa ûrîo rwa gîtarû, naabuî bûkaagwatia makûyû.” Tontû bûû, baragera neeti na bararemwa kûmîkuucia nîûntû bwa ûrîa yaagwatîrie makûyû jamaingî.

⁷Rîu mûritwa ûrîa Jesû eendeete areera Peterû atîrî, “Nî Mwathani!” Simioni Peterû akwigua atî nî Mwathani, aracioga nguû ciaawe nîûntû aarî kîthûnû na araigera îrieene na arathambîra mwanka rûteere rwa îrîa.

⁸Îndî aritwa barîa bangî bareeta barî gîtarûûne na bakucîîtie neeti îrîa yoojûri makûyû nîûntû bataarî kûraaja na nthî înjûmo, baarî ta mita îgana rîmwe (100m) kuuma nthî înjûmo.

⁹Baakinya nthî înjûmo baroona mwanki jwa makara jwaakîtue na îgûrû rîaaju nî kwarîkîîri makûyû na nî kwaarî na mîgaate.

¹⁰Jesû arabeera, “Reeteeni makûyû jamwe ja jarîa bwagwatia.”

¹¹Rîu Simioni Peterû araitia gîtarûûne arakuucia neeti mwanka nthî înjûmo. Neeti îîu yoojûri makûyû jamanene îgana rîmwe rîa mîrongo îtaano na jathatû. Kinya këethîra makûyû nî jaarî jamaingî ûu, neeti îtaatwîkanga.

¹²Jesû arabeera, “Îjeeni bwigagûre.” Gûtî kinya ûmwe waao woomîîria kûmûûria we nûû tontû nî baamenyere atî nî Mwathani.

¹³Jesû areeta na arajûkia mûgaate na arabanenkera na aracoka arabanenkera makûyû.

¹⁴Rîrî rîaarî îgiita rîa jathatû rîa Jesû gûcionania kîrî aritwa baawe nyuma ya akûriûka kuuma kîrî akuû.

¹⁵Bakûthiria kûrîa, Jesû arooria Simioni Peterû, “Simioni, mûtaana wa Johana! Nî ûmpendeete nkûrûki ya baba bangî.” Nawe aracokia, “Îî Mwathani, gwe nî wiijî atî nî nkwendeete.” Jesû aramwîra, “Rîîthagia tûng'ondu twaakwa.”

¹⁶Rîu aramûûria rîa jaîrî, “Simioni, mûtaana wa Johana nî ûmpendeete?” Peterû aramûcokeria, “Îî Mwathani, gwe nî wiijî atî nî nkwendeete.” Jesû aramwîra, “Menyagîîra ng'ondu ciaakwa.”

¹⁷Jesû aramûûria rîa jathatû, “Simioni, mûtaana wa Johana, nî ûmpendeete?” Rîu Peterû araigua bûbûûî tontû nî aamûûrîrie rîa jathatû, “Nî ûmpendeete?” Peterû aramwîra, “Mwathani, nî wiijî mantû jonthe. Gwe nî wiijî atî nî nkwendeete.” Jesû aramwîra, “Rîîthagia ng'ondu ciaakwa.

¹⁸Ka ngûkwîra na mma atî, rîrîa waarî ûmwîthî nî wombaga kwithuranîra na ûgeeta o kûrîa weendaga. Îndî rîrîa ûgakûra ûrîtua gûtambûrûkagia njara ciaaku ûkatheekwa na ûgaikua kûrîa ûtîkwenda.”

¹⁹Aaugîre ûu nîûntû bwa kwonania ûrîa Peterû agaakua nîkenda akumithia Mûrungu. Rîu aramwîra, “Nthingata.”

²⁰ Peterû araciûgûra na aroona mûritwa ûngî, ûrîa Jesû eendeete, abathingatîte. Mûritwa ûu nawe nî ûrîa waakarîre nthî akuî mono na Jesû îgiita rîrîa baarîjaga biakûrîa bia ûgoro. Nîwe ûrîa woorîrie Jesû, “Mwathani, nûû ûgagûkunyanîra?”

²¹Rîrîa Peterû oonere mûritwa ûu arooria Jesû, “Mwathani, a ûûjû mantû jaawe nîatîa?”

²²Jesû aramûcokeria, “Nkëenda atûûra mwanka rîrîa nkeeja rî, bûu bûkwegie atîa? Gwe nthingata!”

²³Rîu nteto irataamba kîrî ataana na aarî ba baaba atî mûritwa ûu atîkua. Îndî Jesû ateerîre mûritwa ûu atî atîkua, ka augîre, “Nkëeja kwenda atûûra mwanka rîrîa nkeeja, bûu bûkwegiî atîa?”

²⁴Mûritwa ûu nîwe woonere mantû jaja na kûjaandîka. Naatuî nî twijî atî bûrîa aaugîre nî bwa mma.

²⁵Kûrî na mantû jangî jamaingî jarîa Jesû aathithîrie. Këethîra jarîngîaandîkwa jonthe, bûmwe o bûmwe, ndîthûgaania atî kinya nthî yongwa îtîngîûmba kûng'ana ya gwîka mauku jau jonthe jarîa jarîngîaandîkwa.