Read KIMERU BIBLE PROTESTANT EDITION Joh 4 Bible Online

Joh 4 - KIMERU BIBLE PROTESTANT EDITION bible

Joh 4

¹Rîrîa Jesû aamenyere atî Afarisayo nî baarî bakwigua atî nî aabatithanagia na nî aarî na aritwa babaingî nkûrûki ya Johana

²(mma nî atî Jesû we wengwa ataabatithanagia îndî nî aritwa baawe baabatithanagia.)

³Nî aumîre Judea na aracoka Galili.

⁴Îndî nî kwaarî no mwanka akûrûkîîre Samaria.

⁵ Agûkinya Samaria, nî eetîre ntûûreene yeetagwa Saika. Ntûûra îîu yaarî akuî na kîthaka kîrîa Jakubu aeete mûtaana waawe Josefu.

⁶Kûu nîku kîthima kîa Jakubu kîaarî. Tontû Jesû nî aanogi nîûntû bwa gwîta rûgendo rûrûraaja, nî aakarîre nthî rûteere rwa kîthima kîu. Rîu kwaarî ta thaa thita cia mûthenya.

⁷Mûka ûmwe Mûsamaria nî eetîre gûtaa rûûjî, na Jesû aramwîra, “Nkundia rûûjî nyue.”

⁸Aritwa baawe nî baarî bagwîta kûgûra biakûrîa ntûûreene.

⁹ Mûka ûu aramûcokeria, “Ûgwe ûrî Mûyahudi, naani ndî Mûsamaria! Nîatîa ûûmba kûndomba rûûjî?” Oorîrie ûû nîûntû Ayahudi bataiganagua na Asamaria.

¹⁰Jesû aramûcokeria, “Ûrîngîmenya kîewa kîa Mûrungu, na ûkamenya nûû we ûgûkûromba rûûjî, gwe nîgwe ûrîngîmûromba na agagûkundia rûûjî rûrî na mwoyo.”

¹¹Mûka ûu arauga, “Mûkaathe, gwe ûtî na ndoo ya gûtaa rûûjî, na kîthima nî kîorokeri mono. Nîkû ûkarita rûûjî rûrî na mwoyo?

¹²Ka ûrî ûmûnene nkûrûki ya kîûjûjû gîeetû Jakubu? Jakubu nî aatweere kîthima gîkî na we wengwa amwe na aana baawe na ndîîthia ciaawe cionthe baanyunyaga rûûjî kuuma kîthimeene gîkî.”

¹³Jesû aramûcokeria, “Muntû wonthe ûrîa ûnyunyaga rûûjî rwa kîthima gîkî nî aigagua nyoonta kaîrî.

¹⁴Îndî ûrîa ûkaanyua rûûjî rûrîa nkamûkundia, atîkoroigua nyoonta kaîrî. Rûûjî rûrîa nkamûkundia rûkaa kîthima kîa rûûjî rûrî na mwoyo ndeene yaawe mwanka oone ûtûûro bwa kenya na kenya.”

¹⁵Mûka ûu aramwîra, “Mûkaathe, nkundia rûûjî rûu nîkenda ntiigua nyoonta kaîrî, kana mbîja gûtaa rûûjî aja kaîrî.”

¹⁶Jesû aramwîra, “Îta wîte mûkûrû waaku, bwîjanie nawe aja.”

¹⁷Mûka ûu aramwîra, “Ni ntî na mûrûme.” Jesû aramwîra, “Ûkuuga mma atî gwe ûtî na mûrûme.

¹⁸Nîkwîthîrwa nî waagûri nî arûme bataano, na kinya ûu ûrî nawe nandî tî mûkûrû waaku. Au ûkwaria mma.”

¹⁹Mûka ûu arauga, “Mûkaathe, nî nkwona atî ûrî kîroria.

²⁰Biûjûjû bieetû nî biarombagîra Mûrungu kîrîmeene gîkî îndî buî buugaga atî nî Jerusalemu akî Mûrungu abuîri kûrombagîrwa.”

²¹Jesû aramwîra, “Mûka, mbîtîkia; îgiita nî rîîjîte rîrîa bûtîtua kûrombagîra Baaba kîrîmeene gîkî kana Jerusalemu.

²²Buî bûrombaga ûrîa bûtiijî, îndî tuî nî twijî ûrîa tûrombaga, tontû wonokio buumîte kwa Ayahudi.

²³Îndî îgiita nî rîîjîte; na ningî nî rîthirîtie gûkinya, rîrîa athaathayia ba mma bakathaathayia Baaba ndeene ya Roho na mma, nî kwîthîrwa bau nîbo Baaba acwaga bamûthaathagia.

²⁴Mûrungu nî Roho na barîa bamûthaathagia nî babuîrîte kûmûthaathayia ndeene ya Roho.”

²⁵Mûka ûu aramwîra, “Nî mbijî Mesia, ûrîa wîtagwa Kristû nî ejîte, na eeja agatûmenyithia mantû jonthe.”

²⁶Jesû aramwîra, “Ûûni nkwaria nagwe nî ni we.”

²⁷O rîu aritwa baawe baracoka. Bararigara mono mono boona akîaria na mûka. Îndî gûtîwe waabo wooria, “Nîmbi ûkwenda?” Kana, “Nîkî tontû ûkwaria na mûka ûû?”

²⁸Rîu mûka ûu aratiga mûtûngi jwaawe, na areeta ntûûreene areera antû,

²⁹“Njûni bûkoone muntû ûrîa wambîîra mantû jonthe jarîa ndaathithia. A kwombîka akeethîrwa atî nîwe Mesia?”

³⁰Antû baraumagara ntûûreene bareeta kîrî Jesû.

³¹Kagiita o kau kongwa aritwa baawe nî bamwerencaga bakiugaga, “Mûritani, rîa biakûrîa.”

³²Îndî arabeera atîrî, “Ûûni kûrî biakûrîa ndî nabio birîa bûtiijî bwaabio.”

³³Tontû bûû, aritwa baroorania, “Ga kûrî muntû ûramûretera biakûrîa?”

³⁴Rîu Jesû arabeera, “Biakûrîa biaakwa nî kûthithia wendi bwa ûrîa waantûmîre na kûrita ngûgî yaawe.

³⁵Buî buugaga: ‘Tî mîeri îna akî îtigeere, na îgiita rîa maketha rîkinye!’ Îndî ûûni ndîbwîra, tegeeni, irio nî bikinyîtie îgiita rîa gûkethwa.

³⁶Kinya nandî ûrîa ûgûketha nî akwewa mûchaara jwaawe, na nî agûketha nîûntû bwa ûtûûro bwa kenya na kenya nîkenda mwaandi na mûkethi bakagwîrua barî amwe.

³⁷Tontû bûû, ngerekano îîjî nî ya mma: ‘Muntû ûmwe nî aandaga na ûngî agaketha.’

³⁸Ûûni nî mbûtûmîte bûgakethe maketha bûtîthithinîrîte. Bangî nîbo baritîte ngûgî, îndî buî bûrigunîka kuumania na rûûya rwaao.”

³⁹Asamaria babaingî ba ntûûra îîu nî beetîkîrie Jesû nîûntû bwa nteto irîa mûka ûu aabeerîre, “Nî ambîîrîre mantû jonthe jarîa ndaathithia.”

⁴⁰Rîu Asamaria bareeta kîrî Jesû baramûûria akare nabo; nawe arakara kûu ntukû ijîîrî.

⁴¹Antû babaingî nkûrûki nî bamwîtîkîrie nîûntû bwa nteto iria aarîrie.

⁴²Bareera mûka ûu, “Tuî tûtîîtîkîtie nîûntû bwa nteto ciaaku akî, tuî twingwa tûkwigua, na twamenya na mma atî ûûjû nîwe Mwonokia wa nthîgûrû.”

⁴³Nyuma ya ntukû ijîîrî, Jesû arauma au areeta Galili.

⁴⁴ Jesû wengwa nî aarî akûûga atî “Kîroria gîtî, nkuma kwaao.”

⁴⁵ Tontû bûû, rîrîa aakinyîre Galili, Agalilaya babaingî nî baamûgwatîre ûgeni nîûntû kinya bo nî baarî Jerusalemu îgiita rîa thigûûnkû ya Pasaka na baroona mantû jonthe jarîa Jesû aarî akûthithia.

⁴⁶ Jesû nî eetîre Kana îrîa îrî Galili kaîrî. Gûntû kûu nîku aarî akûgarûra rûûjî rûraa ndibei. Nî kwaarî na mûtongeeria ûmwe wa kuuma Kaperinaumu waarî na mûtaana waawe ûûmwajie.

⁴⁷Rîrîa mûtongeeria ûu aaigîrue atî Jesû nî aarî akuuma Judea eeja Galili, nî eetîre kîrî we na aramwerenca akamworerie mûtaana waawe ûrîa waarî akuî gûkua.

⁴⁸Jesû aramwîra, “Tuuge bûkarega kwona biama na mantû ja kûrigaria bûtîtîkia?”

⁴⁹Mûtongeeria ûu aramwîra, “Mûkaathe, itû wenda twîte mbere ya mûtaana waakwa akua.”

⁵⁰Jesû aramwîra, “Ciîtîre, mûtaana waaku atîkua.” Muntû ûu areetîkia rûteto rwa Jesû na araciîtîra.

⁵¹Arî njîreene ariti ngûgî baawe baratirimana nawe na baramwîra atî mûtaana waawe nî arabuîre.

⁵²Nawe arabooria nî thaa ing'ana mûtaana waawe araigîrue bûbwega. Nabo baramwîra, “Arabuîre îgoro thaa mûgwanja cia mûthenya ciongwa.”

⁵³Rîu îthe aramenya atî îgiita rîu rîongwa nîrîo Jesû aamwîrîre; “Mûtaana waaku atîkua.” Tontû bûû, we amwe na antû ba nja yaawe bonthe bareetîkia Jesû.

⁵⁴Kîu kîaarî kîama kîa biîrî kîrîa Jesû aaringîre arî Galili akuuma Judea.