Read KIMERU BIBLE PROTESTANT EDITION Joh 5 Bible Online

Joh 5 - KIMERU BIBLE PROTESTANT EDITION bible

Joh 5

¹Nyumeene, nî kwaarî na thigûûnkû ya Ayahudi, nawe Jesû areeta Jerusalemu.

²Kûu Jerusalemu, akuî na mwîrîga jûrîa jwîtagwa Mwîrîga jwa ng'ondu, nî kwaarî na îriaa. Îriaa rîu rîeetagwa na Kîhibirania Bethisaida, na rîaarî na ndwembea ithaano.

³Aajie babaingî na atumuumu na ithua na bionje nî biakaraga ndwembeene iu. [Antû bau nî beetagîîra kwinainua kwa rûûjî.

⁴Nîkwîthîrwa magiita na magiita mûraîka nî eejaga akainainia îria. Muntû wonthe ûrîa weethagîrwa arî wa mbere gûtonya rûûjîîne nîwe wooragua mûrimo o jûrîa eethagîrwa arî najû.][1]

⁵Kûrî muntû waarî antû au waajîtue mîaka mîrongo îthatû na înaana.

⁶Rîrîa Jesû oonere muntû ûu na aramenya atî nî aamami o îgiita rîrîraaja mono, aramûûria, “Nî ûkwenda kworua?”

⁷Nawe aracokia, “Mûkaathe, ni ntî na muntû wa gûntombeka rûûjîîne rîrîa rwainainua. O rîrîa ndeenda gûtonya rûûjîîne muntû ûngî nî eethagîrwa agûtonya mbere yaakwa.”

⁸Jesû aramwîra, “Ûkîîra, jûkia mûgeka jwaaku ûciîtîre.”

⁹O rîo muntû ûu aroora na arajûkia mûgeka jwaawe araciîtîra. Ûntû bûu bwathithîkîre ntukû ya sabatû.

¹⁰ Tontû bûû, bamwe ba atongeeria ba Ayahudi bareera muntû ûu wooretue, “Naarua nî ntukû ya sabatû na Waatho bûtîtîkîîrîtie ûkamata mûgeka.”

¹¹Îndî we arabacokeria, “Muntû ûrîa ûmborerie nîwe ûmbîrîre, ‘Jûkia mûgeka jwaaku na ûciîtîre.’”

¹²Nabo baramûûria, “Muntû ûrîa ûkwîrîre, ‘Jûkia mûgeka na ûciîtîre nûû?’”

¹³Îndî muntû ûu ataijî ûrîa waamworerie nîûntû Jesû nî aarî agwîta na nî kwaarî na antû babaingî.

¹⁴Nyumeene Jesû aroona muntû ûu wooretue arî kîûrûûne na aramwîra, “Nandî ûkworua; ûkéeyia kaîrî ûntû bûbûthûûku nkûrûki bûtîkeeje gûkarîka kîrî gwe.”

¹⁵Rîu muntû ûu areeta na areera atongeeria ba Ayahudi atî nî Jesû waamworerie.

¹⁶Kîu nîkîo gîatûmîre Ayahudi baambîrîria kûthangîkia Jesû nîûntû aathithîrie ûntû bûu ntukû ya sabatû.

¹⁷Îndî Jesû arabeera, “Baaba aritaga ngûgî îgiita rîonthe, na kinya ni nou nkûrita ngûgî.”

¹⁸Tontû bûû, atongeeria ba Ayahudi nî baaciûmîrie nkûrûki gûcwaa njîra ya kûûraga Jesû. Bateendaga kûmûûraga nîûntû bwa kuuna waatho bwa sabatû akî, îndî mono nîûntû bwa kuuga atî Mûrungu nî Îthe, na bûu bûgatûma aing'anania na Mûrungu.

¹⁹Jesû arabeera, “Ga nkûbwîra na mma atî, gûtî u Mûtaana oomba kûthithia na bwaawe wenka. Îndî athithagia jarîa oonaga Îthe akîthithia. O ûrîa Îthe athithagia, nou Mûtaana athithagia.

²⁰Nîkwîthîrwa Îthe nî eendeete Mûtaana na nî amwonagia o ûntû bunthe bûrîa we wengwa athithagia. Ningî akamwonia mantû jamanene nkûrûki ya jaja nîkenda buî bûrigara mono.

²¹O ta ûrîa Baaba ariûkagia akuû na akabaa ûtûûro, o ûu nou Mûtaana aejaga barîa eendaga ûtûûro.

²²Gûtî we Baaba agiitagîra îgamba îndî Mûtaana nîwe ûgiitagîra antû bonthe îgamba,

²³nîkenda antû bonthe baejaga Mûtaana gîtîîo o ta ûrîa baejaga Îthe gîtîîo. Ûrîa ûtîejaga Mûtaana gîtîîo, atîejaga kinya Îthe ûrîa wamûtûmîre gîtîîo.

²⁴“Ga nkûbwîra na mma atî, ûrîa wigagua rûteto rwaakwa, na ageetîkia ûrîa waantûmîre, arî na ûtûûro bwa kenya na kenya, na atîgambithua nîûntû nî athirîtie kuuma gîkuûne na aatonya ûtûûroone.

²⁵Ga nkûbwîra na mma atî kagiita gagakinya, na kinya nandî nî gakinyîte, rîrîa akuû bakaigua kajû ka Mûtaana wa Mûrungu, na barîa bagakaigua bagatûûra mwoyo.

²⁶O ta ûrîa Baaba arî kaumo ga ûtûûro, o ûu nou aethetie Mûtaana waawe kaumo ga ûtûûro.

²⁷Ningî nî amweete waatho bwa gûtujanîra îgamba nîûntû we nî Mûtaana wa Muntû.

²⁸Bûkarigareni mono nî ûntû bûbû; nîkwîthîrwa îgiita nî rîîjîte rîrîa bonthe barîa barî tûburiine bakaigua kajû kaawe,

²⁹ Antû barîa bathithîtie mantû jameega bakariûka na batûûre; na barîa bathithîtie mantû jamaaî bakariûka na bagambithue.

³⁰“Gûtî u ûûni mpûûmba kûthithia na bwaakwa ningwa. Ûûni ngambithanagia kûringana na ûrîa mbigîtue kuuma kîrî Baaba, na ngiitaga îgamba na îota nîûntû ntîcwaga kûthithia ûrîa mpendaga îndî ni mpendaga kûthithia wendi bwa ûrîa waantûmîre.

³¹“Nkëeja gûikûûjîîra ningwa, ûkûûjî bwaakwa bûtîîthîrwa bûrî bwa mma.

³²Îndî kûrî ûngî weejanaga ûkûûjî bwaakwa na nî nkûmenya atî ûkûûjî bûrîa aritaga nî bwa mma.

³³ Buî nî bwatûmanîre kîrî Johana, nawe arakûûjîîra atî nî ni ûûma.

³⁴Tî atî ûûni ka mbîrîgîîrîte ûkûûjî kuuma kîrî muntû, îndî ndiuga ûu nîkenda buî bwonokua.

³⁵Johana aakari ta taawa yaakanîte na îtharîte, naabuî nî bwagwîrîîrue weerû bûu kagiita gagakai.

³⁶Îndî ndî na ûkûûjî bûbûnene nkûrûki ya bûrîa Johana aaritîre. Nîkwîthîrwa nthithagia mantû jarîa Baaba aanenkeere ndita na mantû jau jongwa nîjo jakûûjagîîra atî nî Baaba ûntûmîte.

³⁷ Nawe Baaba ûrîa waantûmîre nîwe mûkûûjî waakwa. Buî bûtaigua kajû kaawe kana bûmwona.

³⁸Buî bûtîîkaga rûteto rwaawe ndeene yeenu nîkwîthîrwa bûtîîtîkagia ûrîa waantûmîre.

³⁹Buî nî bûcûnkûûnaga Maandîko bûkîthûgaanagia atî bûkoona ûtûûro bwa kenya na kenya kuuma kîrî jo. Maandîko jau jongwa nî ni jakûûjagîîra.

⁴⁰Amwe na bûu, buî nî bûregete kwîja kîrî ni nîkenda bwona mwoyo.

⁴¹“Ni ntîcwaga ûkumio kuuma kîrî antû.

⁴²Îndî ni nî mbijî atî wendo bwa Mûrungu bûtî nkoroone cieenu.

⁴³Ûûni mbîjîte ndî na Waatho bwa Baaba, îndî buî bûtîmbîtîkagîra. Îndî muntû ûngî akëeja na inya yaawe wengwa, buî nî bûmwîtîkagîra.

⁴⁴Nîatîa buî bûûmba gwîtîkia o rîrîa buî bwendeete gûcwaa ûkumio o muntû kuuma kîrî ûngî, na bûtîcwaga ûkumio kuuma kîrî Mûrungu wenka?

⁴⁵Bûkáthûgaania atî ûûni nkabûthitanga kîrî Baaba. Musa ûrîa buî bwingwa bwîkîte wîrîgîîro bweenu kîrî we nîwe ûkabûthitanga.

⁴⁶Këethîra nî bwetîkîrie Musa, kînya ni bûrîngîmbîtîkia, nîûntû Musa aandîkîre mantû jambegiî.

⁴⁷Îndî këethîra bûtîtîkîtie mantû jarîa Musa aandîkîre rî, nîatîa bûgeetîkia nteto ciaakwa?”