Read KIMERU BIBLE PROTESTANT EDITION Joh 6 Bible Online

Joh 6 - KIMERU BIBLE PROTESTANT EDITION bible

Joh 6

¹Nyuma ya mantû jau, Jesû arauna îrîa rîa Galili areeta rûteere rwa îria rîu rîrîa rîtagwa kaîrî Tiberia.

²Antû babaingî mono baramûthingata tontû nî baarî bakwona biama birîa aarî akûringa bia kworia antû babaajie.

³Jesû nî aitîrie karîmeene, arakara nthî amwe na aritwa baawe.

⁴Îgiita rîu thigûûnkû ya Ayahudi îrîa îtagwa Pasaka nî yaarî akuî gûkinya.

⁵Rîrîa Jesû araithîrîrie na aroona antû babaingî beetîte kîrî we, nî oorîrîe Filipû atîrî, “Nîkû tûûmba kûgûra mîgaate nîkenda antû baba barîa?”

⁶Aaugîre ûu akîgeria Filipû nîûntû we nî aijî ûrîa akathithia.

⁷Filipû aramûcokeria, “Mîgaate ya denari magana jaîrî îtîûmba kûng'ana antû baba kinya këethîra o muntû o muntû akarûma kang'enyua kaniini.”

⁸Ûmwe wa aritwa ba Jesû ûrîa weetagwa Anderea, mûtaana wa ng'ina wa Simioni Peterû, aramwîra atîrî,

⁹“Aja kûrî na mûtaana ûmwe ûrî na mîgaate îtaano ya mûnyaki na makûyû jaîrî; îndî biu bikang'ana antû babaingî ûjû?”

¹⁰Jesû arauga, “Îîreeni antû bakare nthî.” Antû aû nî kwaarî na nyaki înyingî. Tontû bûû, antû barîa baakarîre nthî baarî ûû ta arûme ngiri ithaano.

¹¹Rîu Jesû arajûkia mîgaate îîu aracokeria Mûrungu nkaatho, na aragaîra antû bau baakari nthî. Arathithia o ûu na makûyû jarîa jaîrî na o muntû aranenkerwa kûringana na ûrîa eendaga.

¹²Rîrîa antû baanyirîre, Jesû areera aritwa baawe, “Ûthûranieni tûng'enyua tûrîa twatigara tûtîkeeje kwînyanga.”

¹³Tontû bûû baroothûrania tûng'enyua twa mîgaate jwa mûnyaki îrîa îtaano tûroojûra ikabû îkûmi na biîrî.

¹⁴Rîrîa antû boonere kîama kîu Jesû aaringîre, barauga, “Nî mma ûûjû nîwe kîroria kîrîa tûrerîgîrîte gîkeeja nthîgûrûûne.”

¹⁵Rîrîa Jesû aamenyere atî nî beengerie kûmwethia mûnene kwa inya, arauma antû au areeta kîrîmeene arî wenka.

¹⁶Ûgoro bûgûkinya, aritwa baawe bareenama mwanka îrieene

¹⁷na baraitia gîtarûûne nîkenda bauna îrîa beeta Kaperinaumu. Rîu nî kwaarî gûkûgîa muundu îndî Jesû ataarî agûkinya kîrî bo.

¹⁸Îria nî rîambîrîrie kûgîa mîgombe îmînene nîûntû ruuo rûrûnene nî rwaurutanaga.

¹⁹Aritwa bagwîta ta kilomita ithaano kana ithanthatû îrieene, nî boonere Jesû eetîrîte îgûrû rîa rûûjî arî akuî na gîtarû, nabo barakîra mono.

²⁰Jesû arabeera, “Nî ni, bûgákîra!”

²¹Rîu baragwîrua mono Jesû agwitia gîtarûûne îndî nyuma ya kagiita gagakai barakinya nthî înjûmo kûrîa beetîte.

²²Rûûneene, antû barîa baatigi rûteere rûrîa rûngî rwa îria nî bamenyere atî nî gîtarû kîmwe gîonka gîatigi. Ningî nî baarî bakwona Jesû ataarî agûtonya gîtarûûne kîrîa kîaarî na aritwa baawe nîûntû aritwa nî baarî bagwîta barî boonka.

²³Itarû bingî bia kuuma Tiberia birakinya antû arîa antû baarîîrîte mîgaate îrîa Mwathani aarî akûtharima.

²⁴Rîrîa antû bau baamenyere atî Jesû ataarî antû au, na baramenya kinya aritwa baawe bataarî o, nî baitîrie itarûûne bareeta mwanka Kaperinaumu bakîmûcwaga.

²⁵Rîrîa antû bau beethîîre Jesû arî rûteere rûrîa rûngî rwa îria nî baamûûrîrie atîrî, “Mûritani, nîrî wîîjîre gûkû?”

²⁶Jesû arabacokeria, “Ga nkûbwîra na mma atî bûtîgûncwaa nîûntû bwa biama birîa bûroneere, îndî bûrîncwaa nîûntû nî bûrarîîre mîgaate na bwanyira.

²⁷Bûkáithangîkieni bûgîcwaa biakûrîa birîa bithûûkaga, îndî cweeni biakûrîa birîa bitîthûûkaga nîkenda bwona ûtûûro bwa kenya na kenya. Biakûrîa biu nî Mûtaana wa Muntû ûkabwaa nîûntû nîwe Mûrungu Baaba aeete inya îîu.”

²⁸Rîu baramûûria, “Nîatîa tûbuîrîte kûthithia nîkenda tûûmba kûthithia ûrîa Mûrungu eendaga tûthithia?”

²⁹Jesû arabacokeria “Ûrîa Mûrungu eendaga bûthithia nî ûjû; îtîkieni ûrîa aatûmîre.”

³⁰Tontû bûû, baramûûria atîrî, “Nî kîama kîrîkû ûkaaringa nîkenda twakîona tûgwîtîkia? Nî ûntû bûrîkû ûkathithia?

³¹ Biûjûjû bieetû nî biarîre manna birî rwanda, o ta ûrîa Maandîko jaugîîte, ‘Nî aabaeere mûgaate kuuma îgûrû.’”

³²Jesû arabeera, “Ga nkûbwîra na mma atî tî Musa waabûeere mûgaate kuuma îgûrû îndî nî Baaba waabwere mûgaate jwa mma kuuma îgûrû.

³³Nîkwîthîrwa mûgaate jwa mma nî ûrîa uumaga îgûrû na akaa nthîgûrû ûtûûro.”

³⁴Tontû bûû, baramwîra; “Mwathani, tweejage mûgaate jûjû magiita jonthe.”

³⁵Jesû arabeera, “Ni nî ni mûgaate jwa ûtûûro. Muntû ûrîa ûkeeja kîrî ni atîkoroigua mpara. Ningî ûrîa ûkambîtîkia atîkoroigua nyoonta kinya rî.

³⁶Îndî nî ndaabwîrîre atî kinya këethîra nî bûmboneete bûtîîtîkagia.

³⁷Barîa bonthe Baaba ampeete bakeeja kîrî ni; na muntû wonthe ûrîa ûkeeja kîrî ni ntîkoromûta.

³⁸Nîkwîthîrwa ntaumîre îgûrû mbîja kûthithia ûrîa nkwenda îndî ndeejîre kûthithia wendi bwa ûrîa waantûmîre.

³⁹Wendî bwa ûrîa waantûmîre nî atî ntîbuîrîte gûta muntû kinya ûmwe wa barîa ampeere, nîkenda nkabariûkia bonthe ntukû ya mûthia yakinya.

⁴⁰Tontû wendi bwa Baaba nî bûbû: atî o muntû wonthe ûrîa woonaga Mûtaana na akamwîtîkia no mwanka oone ûtûûro bwa kenya na kenya. Naani nkamûriûkia ntukû ya mûthia yakinya.”

⁴¹Rîu Ayahudi barambîrîria kûnûng'una nîûntû nî aarî akuuga, “Ni nî ni mûgaate jûrîa jwaumîre îgûrû.”

⁴²Nabo barauga atîrî, “Anga ûûjû tî Jesû, mûtaana wa Josefu? Anga tûtiijî îthe na ng'ina? Nîatîa îndî akuuga atî nî aaumîre îgûrû?”

⁴³Rîu Jesû arabeera, “Tigeeni kûnung'una.

⁴⁴Gûtî muntû ûûmba kwîja kîrî ni tiga Baaba ûrîa waantûmîre akamûreeta kîrî ni. Naani nkariûkia muntû ûu ntukû ya mûthia.

⁴⁵ Iroria nî biaandîkîre atî: ‘Antû bonthe bakaritanwa nî Mûrungu.’ Muntû wonthe ûrîa ûthikagîîra ûrîa Baaba akuuga na akairitana kuuma kîrî we, nî ejaga kîrî ni.

⁴⁶Ûu tî kuuga atî kûrî we woona Baaba, tiga ûrîa waumîre kîrî Mûrungu. Nîwe wenka wonete Baaba.

⁴⁷Ga nkûbwîra na mma atî muntû wonthe ûrîa wîtîkagia arî na ûtûûro bwa kenya na kenya.

⁴⁸Ni nî ni mûgaate jwa ûtûûro.

⁴⁹Biûjûjû bieenu nî biarîîre manna rwanda, îndî nî biakuîre.

⁵⁰Jûjû nîju mûgaate jûrîa jwaumîre îgûrû nîkenda muntû ûrîa ûkajûrîa atîgaakue.

⁵¹Ni nî ni mûgaate jûrîa jûrî mwoyo jûrîa jwaumîre îgûrû. Muntû wonthe akëeja kûrîa mûgaate jûjû agaatûûra kenya na kenya. Mûgaate jûrîa nkanekanîra nî mwîrî jwaakwa jûrîa ni nditîte nîkenda antû boona mwoyo.”

⁵²Rîu Ayahudi baraambîrîria gûkararania bakîûranagia, “Nîatîa muntû ûûjû oomba gûtwaa mwîrî jwaawe tûrîa?”

⁵³Jesû arabeera, “Ga nkûbwîra na mma atî bwarega kûrîa mwîrî jwa Mûtaana wa Muntû na bûnyua tharike yaawe, bûtîîthîrwa bûrî na ûtûûro ndeene yeenu.

⁵⁴Ûrîa ûrîjaga mwîrî jwaakwa na akanyua tharike yaakwa arî na ûtûûro bwa kenya na kenya, naani nkamûriûkia ntukû ya mûthia.

⁵⁵Tontû mwîrî jwaakwa nîju biakûrîa bia mma na tharike yaakwa nîyo biakûnyua bia mma.

⁵⁶Ûrîa ûrîjaga mwîrî jwaakwa na akanyua tharike yaakwa nî atûûraga ndeene yaakwa, naani ngatûûra ndeene yaawe.

⁵⁷Nî Baaba ûrîa ûtûûraga mwoyo waantûmîre, na kinya ni ntûûraga mwoyo nîûntû bwaawe. Tontû bûû muntû wonthe ûrîa ûrîjaga mwîrî jwaakwa agatûûra mwoyo nîûntû bwaakwa.

⁵⁸Jûjû nîju mûgaate jûrîa jwaumîre îgûrû na jûtîkari ta manna îrîa biûjûjû bieenu biarîîre îndî nyumeene birakua. Muntû wonthe ûrîa ûrîjaga mûgaate jûjû agatûûra kenya na kenya.”

⁵⁹Jesû augîre mantû jau rîrîa aaritanaga kîromberoone kûu Kaperinaumu.

⁶⁰Tontû bûû, rîrîa athingati babaingî baawe baigîrue nteto iu barauga, “Mantû jaja nî jamoomo mono! Nûû ûûmba kûjeetîkîîria?”

⁶¹Jesû akûmenya wengwa atî athingati baawe nî bakûnung'una nîûntû bwa ûntû bûu, arabooria, “Ka ûntû bûu bwa bûthûûria?

⁶²A këthîra kabwona Mûtaana wa Muntû agiitia îgûrû kûrîa aatwîre rî, buuga atîa?

⁶³Roho nîwe weejanaga ûtûûro; inya ya mwîrî îtîumba kûthithia no atîa. Nteto irîa ndabwîra nîcio igatûma bûgîa Roho ûrîa weejanaga ûtûûro.

⁶⁴Îndî kîrî buî kûrî bamwe batîgwîtîkia.” Jesû aaugîre ûu nîûntû nî aaijî kuuma tene barîa batîtîkia na ûrîa ûkamûkunyanîra.

⁶⁵Rîu arauga, “Kîu nîkîo gîtûmîre mbwîra atî gûtî we ûûmba kwîja kîrî ni atîreti nî Baaba.”

⁶⁶Akuuga mantû jau, antû barîa bamûthingataga nî baamûtigîre na baratiga gwîtania nawe.

⁶⁷Rîu Jesû arooria barîa îkûmi na baîrî, “Kinya buî nî bûkwenda gwîta?”

⁶⁸ Simioni Peterû aramûcokeria, “Mwathani, tûgeeta kîrî ûu? Gwe nîgwe ûrî na nteto irîa iretaga ûtûûro bwa kenya na kenya.

⁶⁹Tuî nî twîtîkîtie na twathiria kûmenya atî nîgwe Mûtheru wa Mûrungu.”

⁷⁰Jesû arabeera, “Nî ni ndaabûthuurîre buî îkûmi na baîrî îndî ûmwe weenu nî Nkoma.”

⁷¹Jesû aaragia mantû jeegiî Judasi, mûtaana wa Simioni Iskarioti, ûmwe wa barîa îkûmi na baîrî, nîûntû nîwe waarî amûkunyanîre.