Read KIMERU BIBLE PROTESTANT EDITION Joh 7 Bible Online

Joh 7 - KIMERU BIBLE PROTESTANT EDITION bible

Joh 7

¹Nyuma ya mantû jau, Jesû nî aakarîre Galili agîtaga kuuma ntûûreene îmwe mwanka îngî. Ateendaga gwîta Judea nîûntû Ayahudi nî baamûcwaga nîkenda bamûûraga.

² Îgiita rîu thigûûnkû ya tûgaanda ya Ayahudi nî yaarî akuî gûkinya.

³Tontû bûû, ataana ba ng'ina baramwîra, “Uma aja wîte Judea nîkenda aritwa baaku boona ngûgî irîa ûritaga.

⁴Muntû atîthithagia mantû na witho, këethîra nî akwenda antû bamûmenya. Këethîra nî ûthithagia mantû jaja, imenyithanie kîrî antû.”

⁵Nîkwîthîrwa kinya ataana ba ng'ina bataamwîtîkagia!

⁶Tontû bûû, Jesû arabeera atîrî, “Îgiita rîaakwa rîrîa rîagîrîte rîtîrakinya, îndî kîrî buî magiita jonthe nî jagîrîte.

⁷Nthîgûrû îtîûmba kûbûthûûra, îndî ni nî înthwîre nîûntû nî mîîraga atî mathithio jaayo nî jamathûûku.

⁸Buî îteeni thigûûnkûûne îîu. Ûûni ntîîta, nîûntû îgiita rîaakwa rîrîa rîagîrîte rîtîrakinya.”

⁹Akuuga nteto iu, aratigwa Galili.

¹⁰Ataana ba ng'ina bagwîta thigûûnkûûne, Jesû kinya we nî eetîre ku. Îndî eetîre na witho, atîkwonwa nî antû.

¹¹Atongeeria ba Ayahudi nî baamûcwaga thigûûnkûûne îîu bakîûragia, “Nîkû arî?”

¹²Antû babaîngî nî baaragia nteto imwegiî na kîoe. Bamwe nî baugaga, “Nî muntû ûmwega.” Îndî bangî bakauga, “Ka akwatithia antû njîra.”

¹³Amwe na jau, gûtî muntû womagîîria kwaria nteto ciaawe akiigîgagua nîûntû bwa gûkîra atongeeria ba Ayahudi.

¹⁴Rîrîa thigûûnkû yakinyîre gatîgatî, Jesû nî aatonyere kîûrûûne na araambîrîria kûritana.

¹⁵Rîu Ayahudi bararigara mono barooria, “Nîkû muntû ûûjû aritîte ûûme bûbû na atîthomeete?”

¹⁶Tontû bûû, Jesû arabacokeria atîrî, “Mooritani jarîa nkûritana tî jaakwa, îndî nî ja ûrîa waantûmîre.

¹⁷Muntû wonthe ûrîa wendaga kûthithia ûrîa Mûrungu eendaga, akaamenya këethîra jarîa nkûritana jaumîte kîrî Mûrungu, kana nî jaakwa ningwa.

¹⁸Muntû wonthe ûrîa waaragia agîtumagîra Waatho bwaawe wengwa eethagîrwa agîcwaga gûkumua. Îndî muntû ûrîa ûcwaga gûkûmithia ûrîa waamûtûmîre, aaragia ûûma na atîaragia ûrongo noo bûrîkû.

¹⁹Musa nî aabwere Waatho îndî gûtî kinya ûmwe weenu ûbwathîkagîra. Nîmbi îgûtûma bwenda kûmbûraga?”

²⁰Rîu antû baramûcokeria baramwîra, “Ûrî na roho înthûûku! Nûû ûkwenda gûkûûraga?”

²¹Jesû arabacokeria, “Ndingîre kîama kîmwe akî na kîabûrigaria bwinthe!

²² Musa nî aabwere waatho bwa gûtaana ataana beenu (tî Musa waambîrîrie ûntû bûu îndî nî biûjûjû bieenu) na nî bûbataanaga kinya mûthenya jwa sabatû.

²³ Këethîra muntû nî ataanagwa mûthenya jwa sabatû nîkenda Waatho bwa Musa bûûjûrua, nîkî îndî bûkûng'eenteera nîûntû bwa kwooria muntû mûthenya jwa sabatû?

²⁴Bûkagiiteni îgamba kuumania na ûrîa bûkwona îndî giitaageni îgamba na îota.”

²⁵Antû bamwe ba Jerusalemu barauga, “Muntû ûûjû tî we ûrîa bakwenda kûûraga?

²⁶Tî we ûrîa ûkwarîria antû atîciithîte na gûtî we ûkûûmîîria kûmûûria noo atîa? A kwoombîka gûkeethîrwa atî atongeeria nî bamenyete na mma atî ûûjû nîwe Mesia?

²⁷Rîrîa Mesia akeeja gûtî muntû ûkeethîrwa akîmeenyaga kûrîa aumîte, îndî tuî nî twijî kûrîa muntû ûûjû aumîte.”

²⁸Rîu Jesû akîritanaga kîûrûûne, aratûmîîria na kajû gakanene arauga, “Buî bûrîthûgaania nî bûmbijî, na nî bwijî kinya kûrîa mpuumîte. Ni ntîîjîte na Waatho bwaakwa ningwa, îndî ûrîa waantûmîre nî wa mma na bûtîmwijî.

²⁹Îndî ûûni nî mwijî nîûntû mpuumîte kîrî we, na nîwe waantûmîre.”

³⁰Îgiita rîu antû bareenda kûmûgwata îndî gûtî we womîîria kûmûringithia nîûntû îgiita rîaawe rîtaarî rîgûkinya.

³¹Antû babaingî kuuma kîrî ntundu iu baramwîtîkia na barauga, “Ka rîrîa Mesia akeeja akoomba kûringa biama bibingî nkûrûki ya birîa muntû ûûjû akûringa?”

³²Rîrîa Afarisayo na athînjîri-Mûrungu barîa anene baigîrue antû bakîaria na bioe nteto ciegiî Jesû, nî baatûmîre asikarî barîa baarî akaria ba kîûrû beeta kûgwata Jesû.

³³Jesû arauga, “Ntigeerie kagiita gagakai ga kwîthîrwa ndî amwe naabuî, rîu ncoke kîrî ûrîa waantûmîre.

³⁴Buî bûgancwa îndî bûtîmbona, tontû kurîa ûûni nkeethîrwa ndî, buî bûtîumba kwîja.”

³⁵Atongeeria ba Ayahudi baroorania, “Nîkû muntû ûûjû eetîte kûrîa tûtîûmba kûmwona? Ka ageeta ntûûreene cia Agriiki kûrîa antû beetû batwîre akaritane Agriiki?

³⁶Nîatîa akwenda kuuga rîrîa agûtwîra, ‘Buî bûgancwaa îndî bûtîmbona, na kûûrîa ûûni nkeethîrwa ndî buî bûtîûmba kwîja?’”

³⁷ Ntukû ya mûthia ya thigûûnkû îîu, nî yaarî înene mono. Ntukû îîu Jesû nî aarûngamîre na ararîria antû na kajû gakanene arabeera, “Muntû ûrîa ûrî na nyoonta nî eeje kîrî ni na anyue.

³⁸ O ta ûrîa Maandîko jakuuga: ‘Ûrîa ûûmbîtîkîtie, mîuro ya rûûjî rûrî ûtûûro îgatua kuumaga ndeene yaawe.’”

³⁹Augîre ûu akîaragia mantû jegiî Roho ûrîa barîa baamwîtîkîtie baarî baeewe. Kagiiteene kau Roho ataarî akweejanwa, tontû Jesû ataarî agûûkîîrua akumithua.

⁴⁰Rîrîa antû bamwe kîrî ntundu îîu baigîrue nteto iu Jesû aaragia nî baugîre, “Nî mma ûûjû nî kîroria.”

⁴¹Bangî nî baugîre, “Ûûjû nîwe Mesia!” Ningî bangî barauga, “Ka Mesia oomba kuuma Galili?”

⁴² Maandîko jaugaga atîrî, “Mesia akauma rûrîîjoone rwa Daudi, na agaciarîrwa Bethlehemu, ntûûra ya Daudi!”

⁴³Tontû bûû, antû bau nî baremerwe kûgwatanîra nîûntû bwaawe.

⁴⁴Antû bamwe bareenda kûmûgwata, îndî gûtî we womîîria kûmûringithia.

⁴⁵Rîu asikarî barîa baatûmi baracoka kîrî athînjîri-Mûrungu barîa anene na Afarisayo, nabo barooria asikarî, “Nîkî bûtîramûreta?”

⁴⁶Asikarî barabacokeria, “Gûtî muntû ûngî waaria ta ûrîa muntû ûu akwaria!”

⁴⁷Afarisayo barabacokeria, “Ka bwaatithua njîra kinya buî?

⁴⁸Bûrona mûtongeeria kinya ûmwe wa antû kana Mûfarisayo ûmwîtîkîtie?

⁴⁹Kîrîndî gîkî gîtijî Waatho bwa Musa, nî gîkîrume!”

⁵⁰ Mûfarisayo ûmwe ûrîa weetagwa Nikodemu, ûrîa waarî agwîta kîrî Jesû mbere, areera bangî atîrî,

⁵¹“Ka Waatho bweetû bûgitagîra muntû îgamba mbere ya aiteetera na kûmenyewa ûrîa athithîtie?”

⁵²Nabo baramûcokeria atîrî, “Kinya gwe ka ûrî wa kuuma Galili? Îta ûcûnkûûne Maandîko bûbwega, naagwe ûkoona atî gûtî rîo kîroria gîkauma Galili!” [

⁵³Rîu antû bonthe baraana.