Read KIMERU BIBLE PROTESTANT EDITION Joh 8 Bible Online

Joh 8 - KIMERU BIBLE PROTESTANT EDITION bible

Joh 8

¹Îndî Jesû areeta kîrîmeene kîa Mîzeituni.

²Rûûneene, rûkîîrî kainda Jesû areeta kîûrûûne kaîrî na antû bonthe bareeta kîrî we, nawe arakara nthî kûbaritana.

³Akîritanaga, aritani ba Waatho na Afarisayo nî baamwikîîrie mûka ûmwe waagwati akithûngagîîra na baramwîka mbere yaawe

⁴na baramwîra atîrî, “Mûritani, mûka ûûjû aagwatwa akîthûngagîîra.

⁵ Waatho bwa Musa buugaga atî nî tûbuîri kûûraga mûka ta ûûjû na maiga. A gwe rî, ûriuga atîa?”

⁶Baugîre ûu nîkenda boona ûntû bwa kûmûthitangîra. Îndî Jesû nî eenamîîrie nthî na araandîka mûthetuune na kîara.

⁷Rîrîa baamwatîkîre na biûria, Jesû nî ookîîrîre na arabeera atîrî, “Ûrîa weenu ûtî na meeyia, nî aee wa mbere kûmûringa na iiga.”

⁸Rîu areenamîîria nthî kaîrî, na araandîka mûthetuune.

⁹Rîrîa baigîrue ûu, bonthe bareeta ûmwe ûmwe kwambîrîria na barîa akûrû mwanka Jesû aratigwa wenka na mûka ûu arûngi mbere yaawe.

¹⁰Rîu Jesû arookîîra na arooria mûka ûu, “Mwekûrû, antû barîa barîkû? Gûtî kinya ûmwe ûtigeere akûgambithia?”

¹¹Mûka ûu aracokia, “Mwathani, gûtî we!” Nawe aramwîra, “Kinya ni ntîkûgambithia. Ciîtîre na kuuma nandî ûkéeyia kaîrî.”][2]

¹² Jesû ararîîria Afarisayo kaîrî arabeera atîrî, “Ni nî ni weerû bwa nthîgûrû. Muntû wonthe ûrîa ûnthingataga atiitagîîra muunduune, îndî akagîa weerû bûrîa bûretaga ûtûûro.”

¹³ Rîu Afarisayo baramwîra, “Nîka ûgwikûûjîîra wengwa tontû bûû ûkûûjî bwaaku tî bwa mma.”

¹⁴Jesû arabacokeria, “Kinya këethîra ka ngwikûûjîîra, ûkûûjî bwaakwa nî bwa mma nîûntû ûûni nî mbijî kûrîa ndaumîre na nî nkûmenya kûrîa mbîtîte. Îndî buî bûtiijî kûrîa ndaaumîre kana bûmenya kûrîa mbîtîte.

¹⁵Buî bûtujanagîra îgamba kûringana na mathûgaanio jeenu, îndî ni gûtî muntû nkûgambithia.

¹⁶Kinya nkëeja kûgambithania, ûrîa nkagiita nî bwa mma nîûntû ntîgiitaga magamba ninka. Ngiitaga ndî na Baaba ûrîa waantûmîre.

¹⁷Nî kwaandîki Waathoone bweenu atî ûkûûjî bwa antû baîrî nî bwa mma.

¹⁸Ûûni nî ngwikûûjîîra ningwa, na Baaba ûrîa waantûmîre kinya we nî agûnkûûjîîra.”

¹⁹Rîu baramûûria, “Nîkû Abaagu arî?” Jesû aracokia, “Buî bûtîmbijî, na kinya Baaba bûtîmwijî. Këethîra nî bûmbijî, bûrîngîmenya kinya Baaba.”

²⁰Jesû augîre nteto iu arî kanyomba karîa biewa biekagwa kûu kîûrûûne. Aaritanaga arî ku na gûtî muntû ûrîngîmûgwata nîûntû îgiita rîaawe rîtaakinyi.

²¹Jesû arabeera kaîrî atîrî, “Ûûni nîka mbîtîte, na bûgancwaa, îndî bûgaakua bûrî na meeyia. Kûrîa mbîtîte buî bûtîumba gûkinya.”

²²Rîu atongeeria ba Ayahudi barauga, “Ka agaciûraga? A nîatîa îndî akuuga: ‘Kûrîa mbîtîte buî bûtîûmba gûkinya?’”

²³Jesû arabeera, “Buî bûrî ba aja nthî, îndî ûûni mpuumîte îgûrû; buî bûrî ba nthîgûrû îîjî, îndî ûûni ntî wa nthîgûrû îîjî.

²⁴Kîu nîkîo gîtûmi nkûbwîra atî bûgaakua bûrî na meeyia. Nîkwîthîrwa tiga bûgeetîkia ni nî ni we, bûgaakua bûrî na meeyia.”

²⁵Nabo baramûûria, “A gwe nîgwe ûû?” Jesû arabacokeria, “No ûrîa ndaabwîrîre kuuma kîambîrîria!

²⁶Ndî na jamaingî ja kwaria jabwegiî na jamaingî jagûtûma mbûgambithia. Îndî ûrîa waantûmîre nî wa mma. Nî mbîraga nthîgûrû nteto irîa mbigîtue kuuma kîrî we cionka.”

²⁷Bataaciûkîîrwe atî Jesû aaragia mantû jegiî Îthe.

²⁸Tontû bûû, Jesû arabeera atîrî, “Rîrîa bûgookîîria Mûtaana wa Muntû îgûrû, nîrîo bûkamenya atî ‘Ûûni nî ni we,’ na atî gûtîkîo nthithagia na bwaakwa ningwa, îndî mbaragia nteto irîa Baaba aanditanîre.

²⁹Ûrîa waantûmîre arî amwe naani; we ataantiganîria ninka nîûntû nthithagia mantû jarîa jamûgwîragia magiita jonthe.”

³⁰O akîaragia antû babaingî nî baamwîtîkîrie.

³¹Rîu Jesû areera Ayahudi barîa bamwîtîkîtie, “Bwathingata mooritani jaakwa nîrîo bûkaa aritwa baakwa ba mma.

³²Bûkamenya ûûma, nabu ûûma bûkabûkûûra kuuma ûkomboone.”

³³ Nabo baramûcokeria, “Tuî tûrî ba rûrîîjo rwa Abrahamu, na gûtî rîo tweethîrwa tûrî nkombo cia muntû noo ûrîkû. Nandî nîatîa ûkwenda gûtwîra rîrîa ûkuuga: ‘Bûgakûûrwa kuuma ûkomboone!’”

³⁴Jesû arabacokeria, “Ga nkûbwîra na mma, muntû ûrîa ûthithagia meeyia nî nkombo ya meeyia.

³⁵Nkombo îtîtaragwa îrî ya nja îrîa îrî îgiita rîonthe, îndî mûtaana nî ataragwa arî wa nja îîu îgiita rîonthe.

³⁶Tontû bûû, Mûtaana akëeja kûbûkûûra kuuma ûkomboone, bûkauma ku buru.

³⁷Ûûni nî mbijî atî bûrî ba rûrîîjo rwa Abrahamu îndî amwe na bûu buî nî bûkwenda kûmbûraga nîûntû bûtîtîkagia mooritani jaakwa.

³⁸Ûûni mbaragia mantû jarîa mboneete kuuma kîrî Baaba, îndî buî bûthithagia jarîa bwigîtue kuuma kîrî abaagu.”

³⁹Nabo baramûcokeria bakiugaga, “Baaba weetû nî Abrahamu.” Jesû nawe arabeera, “Këethîra buî bûrî aana ba Abrahamu, bûrîngîthithia ûrîa Abrahamu aathithîrie.

⁴⁰Ûûni nî mbwîrîte ûûma bûrîa ndaaigîrue kuuma kîrî Mûrungu; îndî buî nî bûkwenda kûmbûraga. Abrahamu ataathithia ûntû ta bûu.

⁴¹Buî bûthithagîa mantû o jarîa jongwa abaagu aathithîrie.” Nabo baramûcokeria, “Tuî tûtîciaari kumaania na ûthûûngîîri. Baaba weetû nî ûmwe na nî Mûrungu.”

⁴²Jesû arabeera, “Këethîra Mûrungu nî abaagu, kinya ni bûrîngîmpenda, nîûntû ndaumîre kîrî we ndîreeja kîrî buî. Nteejîre na bwaakwa ningwa, îndî nîwe waantûmîre.

⁴³Nîkî bûtîgûciûra mantû jarîa nkûbwîra? Gîtûmi nî atî bûtîkûûmba kûthikîîra jarîa nkûbwîra.

⁴⁴Buî bûrî aana ba abaagu tawe Nkoma, na bûrîenda kûthithia wendî bwa abaagu. We aarî mûûragani kuuma tene; atîeendaga mantû ja ûûma nîûntû mma îtî ndeene yaawe. Rîrîa aaragia ûrongo, abwaragia nîûntû nî wîthîre bwaawe. Nîkwîthîrwa we nî mûrongo na nî kaumo ka ûrongo bunthe.

⁴⁵Îndî ni mbaragia ûûma, na kîu nîkîo gîtûmaga bûrega kûmbîtîkia.

⁴⁶Nûû kîrî buî ûûmba kûrikithia atî ndî mwîyia? Këethîra mbaragia ûûma rî, nîkî bûtîkûmbîtîkia?

⁴⁷Muntû wonthe ûrîa ûrî wa Mûrungu nî athikagîîra nteto cia Mûrungu. Îndî buî bûtîthikagîîra nteto iu nîûntû bûtî ba Mûrungu.”

⁴⁸Nabo Ayahudi baramûcokeria atîrî, “Anga tûtî kuuga ûntû bûrîo rîrîa tûkuuga atî gwe ûrî Mûsamaria na ûrî na roho înthûûku?”

⁴⁹Rîu Jesû arabacokeria, “Ûûni ntî na roho înthûûku îndî nî Baaba ntîîaga îndî buî bûtîntîîaga.

⁵⁰Ûûni ntîcwaga gwikumithia ningwa, îndî kûrî we ûrîa ûcwaga gûnkumithia na nîwe ûgambithanagia.

⁵¹Ga nkûbwîra na mma atî muntû wonthe ûrîa waathîkagîra nteto ciaakwa atîkorookua.”

⁵²Rîu Ayahudi baramwîra atîrî, “Nandî tûkûmenya na mma atî ûrî na roho înthûûku. Abrahamu nî aakuîre, na kinya iroria nî biakuîre, na nî ûkuuga atî, ‘Ûrîa ûkaathîkîra nteto ciaakwa atîkorookua!’

⁵³Ka ûrî ûmûnene nkûrûki ya Abrahamu, kîûjûjû gîeetû? We nî akuîre na kinya iroria nî biakuîre. Gaûkûthûgaania gwe ûrî ûû?”

⁵⁴Jesû arabacokeria, “Këethîra ga ncwaga gwikumithia, ûkumio bwaakwa nî bwa ûtheri. Baaba o ûrîa buî buugaga atî nîwe Mûrungu weenu, nîwe ûnkumithagia.

⁵⁵Buî bûtamûmenya îndî ni nî mwijî. Nkëeja kuuga ntîmwijî mbîthîrwa ndî mûrongo o ta buî. Ni nî mwijî na nî mwathîkagîra.

⁵⁶Kîûjûjû kîeenu, Abrahamu nî kîagwîrîrue mono nîûntû nî kîaarî gîkoona ntukû yaakwa. Nî kîamîonere na kîragwîrua mono.”

⁵⁷Rîu Ayahudi baramwîra “Ûgwe ûtîkinyîtie mîaka mîrongo îtaano. Îndî nîatîa ûkuuga ûroona Abrahamu?”

⁵⁸Jesû arabeera, “Ga nkûbwîra na mma atî mbere ya Abrahamu aciarwa, ni nî ndaarî o.”

⁵⁹Bakwigua ûu barooja maiga bamûringa najo îndî Jesû araiciitha na arauma kîûrûûne.