Read KIMERU BIBLE PROTESTANT EDITION Joh 9 Bible Online

Joh 9 - KIMERU BIBLE PROTESTANT EDITION bible

Joh 9

¹Rîrîa Jesû akûrûkîte, nî oonere muntû ûmwe waarî mûtumuumu kuuma rîrîa aaciarîrwe.

²Rîu aritwa baawe baramûûria, “Mûritani, nîkî muntû ûûjû aaciarîrwe arî mûtumuumu? Nîwe weîrie kana nî aciari baawe?”

³Jesû arabacokeria, “Ûntû bûu bûtaathithîkîre nîûntû bwa meeyia jaawe kana ja aciari baawe. Îndî aaciarîrwe arî mûtumuumu nîkenda inya ya Mûrungu yonekana îkîrita ngûgî ndeene yaawe.

⁴No mwanka tûrite ngûgî ya ûrîa waantûmîre kûrî mûthenya nîûntû ûtukû nî bwîjîte na gûtî we ûkoomba kûrita ngûgî.

⁵ Îgiita rîonthe rîrîa nkeethîrwa ndî nthîgûrûûne, ûûni nî ni weerû bwa nthîgûrû.”

⁶Akuuga nteto iu, Jesû aratwîra mata nthî na arakima tûtaka na araaka mûtumuumu ûu meetho

⁷aramwîra, “Îta ûkathaambe îrieene rîa Siloamu.” (Siloamu nî kuuga “Ûtûmi”). Tontû bûû, mûtumuumu ûu areeta na arathaamba na aracoka akîonaga.

⁸Rîu atûûri baawe na bangî barîa baamwonaga akîrombaga barooria, “Ûûjû tî muntû ûrîa ûrakaraga nthî akîrombaga ûtethio?”

⁹Bamwe baao barauga, “Nîwe!” Bangî barauga, “Arî, tî we îndî ka ang'uanene nawe.” Muntû ûu waarî mûtumuumu arauga, “Nî ni.”

¹⁰Tontû bûû, baramûûria, “Nandî rî, nîatîa ûûmbîre kwona?”

¹¹Nawe arabacokeria, “Muntû ûrîa wîtagwa Jesû nîwe ûkimîre tûtaka aambaka tu meetho, aambîîra, ‘Îta ûkathaambe îrîeene rîa Siloamu.’ Rîu ndeeta, ndathaamba na ndaambîrîria kwona.”

¹²Nabo baramûûria, “Arîkû we?” Nawe arabacokeria, “Ni ntiijî.”

¹³Rîu baraikia muntû ûu waarî mûtumuumu kîrî Afarisayo.

¹⁴Ntukû îrîa Jesû aakimîre tûtaka na araaka muntû ûu meetho na aroona, yaarî ya sabatû.

¹⁵Rîu Afarisayo baramûûria ûrîa oombîre kwona. Nawe aarabeera, “Ambakîre tûtaka meetho, naani ndathaamba na nandî nî nkwona.”

¹⁶Afarisayo bamwe barauga, “Muntû ûu atiumîte kwa Mûrungu, tontû atîthingataga waatho bwa sabatû.” Îndî bangî barauga, “Nîatîa muntû ûrî na meeyia oomba kûringa biama bia mûthemba jûjû?” Rîu barambîrîria gûkararania na bararemwa kûgwatanîra.

¹⁷Tontû bûû, Afarisayo barooria muntû ûu o kaîrî atîrî, “Gwe ûriuga atîa bwegiî muntû ûu ûtûmîre woona?” Nawe arabeera, “Muntû ûu nî kîroria.”

¹⁸Amwe na bûu atongeeria ba Ayahudi bateetîkîrie atî muntû ûu nîwe waatwîre arî mûtumuumu na nandî nî akwona, mwanka rîrîa beetîre aciari baawe na

¹⁹barabooria, “Ûûjû nîwe mûtaana weenu ûrîa buugaga nî aaciarîrwe arî mûtumuumu? Nîatîa îndî nandî akûûmba kwona?”

²⁰Aciari baawe baracokia, “Nî twijî atî ûûjû nî mûtaana weetû, na atî nî aaciarîrwe arî mûtumuumu.

²¹Îndî tûtiijî ûrîa oombîre kwona kana tûmenya ûrîa ûtûmîre oona. Mûûrieeni nîûntû we nî muntû mûgima na noo aciarîîrie wengwa.”

²²Aciari baawe baugîre ûu nîûntû nî baakîraga atongeeria ba Ayahudi nîkwîthîrwa atongeeria bau nî baarî bakûrîîkania atî muntû wonthe ûrîa ûkaumbûra atî Jesû nî Mesia, eengwe kîromberoone buru.

²³Kîu nîkîo gîatûmîre aciari baawe bauga: “We nî muntû mûgima, mûûrieeni.”

²⁴Tontû bûû, nî beetîre muntû ûu kaîrî na baramwîra, “Aria mma mbere ya Mûrungu! Tuî nî twijî atî muntû ûu nî mwîyia.”

²⁵Arabacokeria, “Ni ntiijî këethîra we nî mwîyia. Îndî kûrî ûntû bûmwe nkûmenya: ndîraarî mûtumuumu, îndî nandî nî nkwona.”

²⁶Rîu baramûûria, “Nîatîa akûthithîîrie? Nîatîa atûmîre woona?”

²⁷Muntû ûu arabacokeria, “Ndîkûthiria kûbwîra, naabuî bûtîrathikîîra. Nîkî bûkwenda kwîrwa kaîrî? Ka kinya buî bûkwenda kwaa aritwa baawe?”

²⁸Rîu baramûrumanga bakiugaga, “Gwe ûrî mûritwa waawe îndî tuî tûrî aritwa ba Musa.

²⁹Tuî nî twijî atî Mûrungu nî aarîrie na Musa îndî tûtîîjî kûrîa muntû ûûjû aumîte.”

³⁰Nawe arabacokeria, “Bûu nî ûntû bwa kûrigaria mono! Atî buî bûtiijî kûrîa aumîte na nîwe ûtûmîre mboona!

³¹Nî twijî atî Mûrungu atîthikagîîra eeyia, îndî nî athikagîîra muntû ûrîa ûmûthaathagia na akathithia wendi bwaawe.

³²Kuuma rîrîa nthîgûrû yoombîrwe, gûtî rîo twaigua atî kûrî muntû woomba gûtûma muntû waaciari arî mûtumuumu oona.

³³Këethîra muntû ûu ataumîte kîrî Mûrungu, gûtî u arîngîûmba kûthithia.”

³⁴Bo baramûcokeria, “Ûgwe waaciarîrwe na warererwa meeyiene, nîatîa ûûmba gûtûritana?” Rîu baramwînga kîromberoone.

³⁵Jesû nî aamwonere nyuma ya akwigua atî bakûmwînga na aramûûria atîrî, “Gwe nî ûgwîtîkia Mûtaana wa Muntû?”

³⁶Muntû ûu aracokia, “Mûkaathe, mbîîra nîwe ûrîkû nîkenda mwîtîkia.”

³⁷Jesû aramwîra, “Nî ûthirîtie kûmwona, na nîwe ûkwaria naagwe nandî.”

³⁸Rîu muntû ûu arauga, “Mwathani, nî ngwîtîkia!” Rîu aramûthaathayia.

³⁹Jesû arauga, “Ûûni ndeejîre nthîgûrûûne kûgiita îgamba, nîkenda barîa batîonaga boomba kwona, na barîa boonaga baa atumuumu.”

⁴⁰Afarisayo bamwe barîa baarî au bakwigua nteto iu baramûûria, “A rî, ka kinya tuî tûrî atumuumu?”

⁴¹Jesû arabacokeria, “Këethîra bûrî atumuumu, bûtîngîîthîrwa bûrî na meeyia jakûbûgambithia. Îndî nîûntû nî bûkuuga: ‘Tuî nî tûkwona,’ kûu nî kwonania atî bûrî na meeyia jakûbûgambithia kinya nandî.”