Read KIMERU BIBLE PROTESTANT EDITION Maj 1 Bible Online

Maj 1 - KIMERU BIBLE PROTESTANT EDITION bible

Maj 1

¹ Kîrî Theofilo, Yukuune rîa mbere, nî ndaandîkîre mantû jonthe jarîa Jesû aathithîrie na jarîa aaritanîre,

²mwanka rîrîa aitithîrue îgûrû. Mbere ya aitithua îgûrû nî aarî akwarîria atûmwa barîa aathuurîte oojûrîtwe nî Roho Ûmûtheru.

³Jesû akûriûka nî aacionanîrie kîrî atûmwa baawe kagiita ga ntukû mîrongo îna, na araritana mantû jegiî Ûnene bwa Mûrungu, nîkenda bamenya buru atî arî mwoyo.

⁴ Rîrîa boothûranîte amwe nî aabeerîre ûjû, “Bûkáuma Jerusalemu, îndî eteereni kîewa kîrîa Baaba eeranîrîte, nakîo nî kîrîa bwaigîrue nkîaria mantû jaakîo.

⁵ Nîkwîthîrwa Johana aabatithanagia na rûûjî, îndî nyuma ya ntukû inkai, buî bûkabatithua na Roho Ûmûtheru.”

⁶Rîrîa atûmwa baacemanîtie amwe na Jesû, nî baamûûrîrie, “Mwathani, îgiita rîrî nîrîo ûgacokeria Aisraeli ûnene bwaao kaîrî?”

⁷Îndî Jesû arabeera, “Gûtî gîtûmi gîa kwenda kûmenya, nîûntû îgiita kana kiingo kîa mantû jaja nî Baaba wenka ûtuîte kûringana na Waatho bwaawe.

⁸ Îndî rîrîa Roho Ûmûtheru akeeja kîrî buî bûkagwata inya, naabuî bwee akûûjî baakwa Jerusalemu, na Judea na Samaria na nthîgûrû yonthe.”

⁹ Akuuga ûu, araitia îgûrû bonthe bamûtegeete na îtu rîramwitha batîmwoone kaîrî.

¹⁰Bategeete îgûrû, baroona antû baîrî beekîrîte nguû injerû barabaumîîra ntûti na bararûngama akuî nabo barabeera,

¹¹“Antû ba Galili, nîmbi îtûmîte bûrûngama aja bûtegeete îgûrû? Jesû ûûjû wajûkua kuuma kîrî buî aitia îgûrû, agacoka kaîrî o ûu bwona aitia îgûrû.”

¹²Rîu atûmwa baracoka Jerusalemu kuuma kîrîmeene kîa Mîzeituni, kîrîa kîaarî ta kilomita îmwe kuuma ntûûreene.

¹³ Rîrîa baakinyîre ntûûreene, baraitia ngorobeene na barakûrûka nyomba îrîa baakaraga. Atûmwa bau baarî baba: Peterû, na Johana, na Jakubu, na Anderea, na Filipû na Toma, na Batholomeo na Mathayo, na Jakubu mûtaana wa Alifayo, na Simioni ûrîa Zeloti, na Juda mûtaana wa Jakubu.

¹⁴Bau bonthe amwe na eekûrû bamwe na kinya Maria ng'ina wa Jesû na ataana ba ng'ina ba Jesû nî baarombaga barî amwe.

¹⁵Nyuma ya ntukû inkai, barîa beetîkîtie nî baacemanîrie. Antû bau baarî îgana rîa mîrongo îîrî (120). Peterû nî aarûngamîre mbere yaao arauga,

¹⁶“Ataana na aarî ba baaba, kwaarî no mwanka Maandîko joojûre, jarîa Roho Ûmûtheru aatûmîre Daudi aarîa jegiî Judasi ûrîa waatongeererie antû barîa baagwatîre Jesû.

¹⁷Judasi aarî ûmwe weetû, ûrîa waathuuri arita ngûgî amwe naatuî.

¹⁸ (Nî aagûrîre muunda na mbeecha irîa oonere irî îrîi rîa ûthûûku bwaawe na aragwa nthî, na kîu kîaawe kîratambûka mara jaraumîra.

¹⁹Gûtî muntû ûtûûraga Jerusalemu ûtaigua ûntû bûbû. Tontû bûû, antû beetaga muunda jûu na rûthiomi rwaao Akelidama, ûu nî kuuga ‘Munda jwa tharike.’)

²⁰ Nîkwîthîrwa nî kwaandîki yukuune rîa Zaburi ûjû, ‘Nyomba yaawe nî îtigwe îrî întheri; gûkágîta muntû ûtûûra ku.’ Kaîrî nî kwaandîki: ‘Muntû ûngî nî ajûkie kaanya kaawe kûrîa aritaga ngûgî.’

²¹“Tontû bûû, nî tûthuure muntû ûmwe ûrîa waarî amwe naatuî kuuma rîrîa Jesû aarî aja nthîgûrû,

²² kwambîrîria rîrîa Johana aabatithanagia mwanka ntukû îrîa Jesû aitithîrue îgûrû. Ûu akaa ûmwe weetû wa gûkûûjîîra atî Jesû nî aariûkîre.”

²³Rîu baragweta mariîtwa ja antû baîrî; wa mbere aarî Josefu ûrîa weetagwa Baasaba (Kana riîtwa rîngî Jastasi), na wa baîrî aarî Mathia.

²⁴Nabo bararomba ûjû, “Mwathani, gwe nî wiijî nkoro cia antû bonthe. Tontû bûû, twonie nî ûrîkû kîrî baba bobaîrî ûthuurîte

²⁵nîkenda ajûkia kaanya ka Judasi, arita ngûgî ya ûtûmwa, îrîa Judasi aatiganîre nayo.”

²⁶Rîu bararinga kuura na kuura îragwîrîra Mathia, araa ûmwe wa gîkundi kîa atûmwa barîa îkûmi na ûmwe.