Read KIMERU BIBLE PROTESTANT EDITION Maj 10 Bible Online

Maj 10 - KIMERU BIBLE PROTESTANT EDITION bible

Maj 10

¹Nî kwaarî na muntû ûmwe kûu Kaisaria weetagwa Korinelio. Aarî mûnene wa asikarî ba gîkundi kîrîa gîetagwa Njûûrî ya Italia.

²We nî eetîkîtie mono na nî aathîkagîra Mûrungu. Kinya nja yaawe yonthe nî yathaathagia Mûrungu. Nî aateethagia nkîa mono na akaromba Mûrungu magiita jonthe.

³Mûthenya jûmwe ta thaa kenda nî oonere kîoneki kîa mûraîka wa Mûrungu atonya nyomba na aramwîta, “Korinelio!”

⁴Korinelio aramûtega kûnûû amakîte mono na arauga, “Nîatîa ûkwenda Mwathani?” Mûraîka ûu aramwîra, “Mûrungu nî aigîtue maromba jaaku na oona mathithio jaaku ja kîaao. Tontû bûû, arî akuî gûgûcokeria maromba jaaku.

⁵Nandî tûma antû Jopa bageete muntû ûmwe wîtagwa Simioni kana na riîtwa rîngî ageetwa Peterû.

⁶Peterû arî kwa muntû ûmwe wîtagwa Simioni, ûrîa mûtaguti wa mîgûûta. Nyomba yaawe îrî akuî na îria.”

⁷Mûraîka ûrîa wamwarîîrie agwîta, Korinelio areeta nthûûmba ciaawe ijîîrî, na asikarî ûmwe ûrîa weetîkîtie Mûrungu mono na waarî ûmwe wa barîa baamûkaragia.

⁸Arabamenyithia mantû jonthe jarîa oonere, rîu arabatûma Jopa.

⁹Rûûneene, barî akuî gûkinya ntûûreene îîu, Peterû araitia nyomba ngorobeene îgûrû kûromba Mûrungu. Thaa iu ciaarî ta thaa thita cia mûthenya.

¹⁰Peterû nî aigîrue mpara mono mwanka araigua gwîta gûcwaa biakûrîa. Îndî mbere ya biakûrîa biya, aragwatwa nî toro îndito mono

¹¹na aroona îgûrû rîrugûki, na gîntû gîkari ta chuka înene kîreenamua kîgwati nteere cio inya mwanka nthî.

¹²Chukeene îîu, nî kwaarî na nyomoo cia mîthemba yonthe: irîa cionkagia na irîa irî mathendû na nyoni.

¹³Rîu araigua kajû gakîmwîra, “Peterû, ûkîîra ûthînje nyomoo iji na ûrîe!”

¹⁴Peterû aracokia, “Itû arî Mwathani! Nîkwîthîrwa ûûni ntaarîa gîntû gîtîtheri kana kîrî mûgiro.”

¹⁵Kajû kau karaigîîgua kaîrî gakîmwîra: “Ûkorouga gîntû kîrîa Mûrungu atheretie kîrî na mûgiro!”

¹⁶Ûntû bûu bwathithîkîre maita jathatû, rîu chuka îîu îracokua îgûrû kaîrî.

¹⁷Ningî o Peterû arigari na agîciûragia gîtûmi kîa kîoneki kîu, antû barîa baatûmi nî Korinelio, nî baarî bakûûrîthîria nyomba ya Simioni na bakinya mûrangoone.

¹⁸Nî beetanîre barooria, “Aja kûrî na mûgeni ûgwîtwa Simioni Peterû?”

¹⁹Îgiita rîu, Peterû no aathûgaanagia gîtûmi kîa kîoneki kîu. Roho aramwîra, “Thikîîra! Kûrî na antû bathatû bagûkûûrîthîria.

²⁰Înama na mpwîî na wîîtanie nabo ûtî na nkaanja nîûntû nî ni mbatûmîte.”

²¹Rîu Peterû areenama areera antû bau, “Nî ni muntû ûrîa bûgûcwaa. Nîmbi îtûmîte bwîja?”

²²Nabo baracokia, “Nî mûnene wa asikarî, ûrîa wîtagwa Korinelio, ûrîa mwagîru na wîîtîkîtie Mûrungu, na ûtîîtwe mono nî Ayahudi bonthe, watûtûma. Nî areerîrwe nî mûraîka wa Mûrungu agwîte mûciî jwaawe nîkenda aigua jarîa jonthe ûrî najo ja kûmwîra.”

²³Tontû bûû, Peterû arabeera bakûrûke nyomba abaee kîraaro ûtukû bûu. Rûûneene, Peterû amwe na antû bamwe barîa beetîkîtie ba kuuma Jopa bareetania nabo.

²⁴Mûthenya jwa îîrî barakinya Kaisaria na bareethîra Korinelio amwe na antû ba nja yaawe na kinya acoore baawe bamwetereete.

²⁵Peterû arî akuî gûtonya nyomba, Korinelio aramûthagaana na aramûturîria maru aramûthaathayia.

²⁶Îndî Peterû aramûûkîîria na aramwîra, “Ûkîîra, ûûni ndî muntû ta gwe.”

²⁷Peterû arakûrûka nyomba akîaragia na Korinelio. Agûkûrûka areethîra antû babaingî boothûranîte ku.

²⁸Nawe arabeera, “Buî bwingwa nî bwijî atî Waatho bûtîîtîkîritie Mûyahudi ariûngîra kana aungana na antû barîa batî Ayahudi. Îndî Mûrungu nî aramenyithîrie atî ntibuîrîte kûthûgaania muntû kinya ûrîkû tî ûmûtheru kana nthûgaania arî na mûgiro.

²⁹Tontû bûû, nî bûrantûmanîîre naani ndîkwîja na ntîrooria kîûria. Mbîîreeni kîrîa bûrambîtîrîte.”

³⁰Korinelio arauga, “Ntukû inya ithiri, thaa kenda o ta iji cia mûthenya nî ndaarî nyomba yaakwa nkîrombaga Mûrungu. O rîo, muntû waarî na nguû cienagia mono ararûngama mbere yaakwa,

³¹arambîîra, ‘Korinelio! Mûrungu nî eetîkîîrîtie maromba jaaku na aririkana ûrîa ûteethagia nkîa.

³²Ningî ambîra ntûme muntû Jopa, oorithîrie muntû ûmwe wîtagwa Simioni, ûrîa wîtagwa na riîtwa rîngî Peterû. Muntû ûu arî nyomba ya muntû ûmwe wîtagwa Simioni, mûtaguti wa mîgûûta, ûrîa ûtûûraga akuî na îria.’

³³Tontû bûû, ndîratûmana kîrî gwe ntûti, naagwe ûkûthithia bwega weeja. Nandî-rî, tuî twinthe tûrî aja mbere ya Mûrungu, twigua mantû jonthe jarîa Mwathani akwîrîte ûtwîre.”

³⁴ Peterû araambîrîria kwaria arauga: “Nandî nkûmenya na mma atî Mûrungu atîendeete bamwe na athûûra bangî.

³⁵Îndî muntû wonthe ûrîa ûmûkîraga na akathithia jarîa jaagîrîte, kinya akeethîrwa arî wa mûgongo jûngî nî eetîkîrîkaga kîrî Mûrungu.

³⁶Nî bwijî rûteto rûrîa Mûrungu aatûmîîre antû ba Israeli, atî batûmîîrie Nteto Injega cia thîîrî, kuumania na Jesû Kristû, ûrîa ûrî Mwathani wa antû bonthe.

³⁷Nî bwijî rûteto rûrîa rwatumîîrîrue Judea yonthe kwambîrîria Galili, kuuma Johana agûtûmîîria mantû jegiî kûbatithua.

³⁸Ningî nî bwijî ûrîa Mûrungu oojûrîrie Jesû wa Nazarethi Roho Ûmûtheru na aramwaa inya. Nîkwîthîrwa Mûrungu nî aarî nawe, nî eetaga gûntû kunthe akîthithagia mantû jameega na akîoragia antû bonthe barîa baathangîkagua nî Nkoma.

³⁹Tuî tûrî akûûjî ba mantû jonthe jarîa aathithîrie nthîgûrû ya Ayahudi na Jerusalemu. Nawe nîwe antû booragîre rîrîa baamwambîre mûtharabeene.

⁴⁰Îndî Mûrungu aramûriûkia mûthenya jwa îthatû, aratûma acoka kwonwa,

⁴¹nî antû babakaî akî, tabo barîa Mûrungu aarî akûthuura baa akûûjî baawe, tuî barîa baarî bakûrîa na baanyua amwe nawe kuuma akûriûka kuuma kîrî akuû.

⁴²Nawe nî aatwîrîre atî tûtûmîîrie Nteto Injega kîrî antû na tûkûûjagîîre atî we nîwe Mûrungu aathuurîre nîkenda aa mûgambi wa barîa barî mwoyo na barîa bakuîte.

⁴³Iroria bionthe nî biakûûjagîîra bikiugaga atî muntû wonthe ûrîa ûkamwîtîka akarekerwa meeyia jaawe jonthe kuumania na riîtwa rîaawe.”

⁴⁴Rîrîa Peterû aaragia nteto iu, antû bonthe barîa baamûthikîîrîte nî boojûrîrwe nî Roho Ûmûtheru.

⁴⁵Ayahudi barîa beetîkîtie na baumîte Jopa barî na Peterû, nî baarigarîre mono bakwona Mûrungu agwîtûûrîria antû barîa batî Ayahudi kîewa kîa Roho Ûmûtheru.

⁴⁶Nîkwîthîrwa nî baaigîrue antû bau bakîaria na mîgambo mîgeni bagîkumagia Mûrungu Peterû nî aaugîre,

⁴⁷“Antû baba bakûjûrwa nî Roho Ûmûtheru o ta ûrîa tuî twoojûrîrwe. Nûû îndî ûûmba kûrigîîria batîkabatithue na rûûjî?”

⁴⁸Tontû bûû, arauga babatithue riîtweene rîa Jesû Kristû. Nyuma ya jau baramwerenca akare nabo ntukû ing'anona.