Read KIMERU BIBLE PROTESTANT EDITION Maj 11 Bible Online

Maj 11 - KIMERU BIBLE PROTESTANT EDITION bible

Maj 11

¹Atûmwa na eetîkia bangî barîa baarî Judea nî baaigîrue atî antû barîa batî Ayahudi kinya bo baarî bagwîtîkia rûteto rwa Mûrungu.

²Tontû bûû, rîrîa Peterû aacokere Jerusalemu, Ayahudi barîa beetîkîtie na beekîîrîte rûtaano, baramûtetia bakiugaga,

³“Nîkî ûreetîre mûciî jwa antû batîtaani na warîjanîra nabo biakûrîa?”

⁴Rîu Peterû arabataarîria bûbwega ûrîa gwakarakarîre kuuma mwambîrîrio

⁵na arabeera, “Ntukû îmwe nî ndaarombaga Mûrungu ndî ntûûreene ya Jopa. Nî ndaagwatîrwe nî toro înene na ndîroona kîoneki gîa gîntû gîakari ta chuka înene înamîtue, kuuma îgûrû îgwati nteere cio-inya, na îreekwa akuî na arîa ndaarî.

⁶Ndaaraithîria bwega, ndîroona nyomoo irîa cionkagia na irîa irî mathendû na nyoni.

⁷Rîu ndîraigua kajû gakîmbîîra: ‘Peterû ûkîîra! Thînja na ûrîe.’

⁸Îndî ndîrauga, ‘Arî Mwathani; nîkwîthîrwa gûtî gîntû gîtîtheri kana kîrî mûgiro gîatonya kanyua gaakwa kinya rî.’

⁹Kajû kau nî kaarîrîe kaîrî kuuma îgûrû karauga, ‘Ûkorouga gîntû kîrîa Mûrungu atheretie kîrî na mûgiro.’

¹⁰Ûntû bûu nî bwathithîkîre maita jathatû, rîu into biu bionthe birajûkua biraitithua îgûrû.

¹¹Kagiita o kau kongwa, antû bathatû barîa baatûmi kîrî ni baumîte Kaisaria, barakinya oome ya nyomba îrîa ndaarî.

¹²Nawe Roho Ûmûtheru arambîîra mbîtanie nabo ntî na kîûria. Ataana ba baaba batantatû ba kuuma Jopa bareetania naani mwanka Kaisaria na tûrakûrûka nyomba ya Korinelio.

¹³Korinelio aratwîra ûrîa aarî akwona mûraîka arûngi nyomba yaawe akîmwîraga: ‘Tûma muntû Jopa ageete Simioni, ûrîa wîtagwa na riîtwa rîngî Peterû

¹⁴na agakwîra nteto irîa igatûma gwe gwengwa amwe na nja yaaku bwonokua.’

¹⁵Rîrîa ndaambîrîrie kwaria, baroojûrwa nî Roho Ûmûtheru o ta ûrîa twojûrîrwe nîwe kîambîrîriene.

¹⁶ Rîu ndîraririkana rûteto rwa Mwathani rûrîa augîre: ‘Johana aabatithanagia na rûûjî îndî buî bûkabatithua na Roho Ûmûtheru.’

¹⁷Këethîra Mûrungu nî aaere antû barîa batî Ayahudi kîewa o kîrîa aatweere kinya tuî rîrîa tweetîkîrie Mwathani Jesû Kristû rî, ni ndî ûû ndegana na jarîa Mûrungu akwenda?”

¹⁸Rîrîa baigîrue mantû jau, barakira ki na barakaatha Mûrungu bakiugaga, “Mûrungu akwaa kinya antû barîa batî Ayahudi kaanya ga kwirira meeyia jaao nîkenda boona mwoyo.”

¹⁹ Eetîkia barîa baanyaganîrue nîûntû bwa mîthangîko rîrîa Stefano ooragîrwe, bamwe baao nî beetîre mwanka Foenicia, na bangî Saiprasi na bangî Antioki, bagîtûmagîîria rûteto rwa Mûrungu kîrî Ayahudi bonka.

²⁰Îndî eetîkia bangî barîa baumîte Saiprasi na Kurene nî beetîre Antioki na baratûmîîria rûteto kîrî antû barîa batî Ayahudi bakîbeeraga Nteto Injega ciegiî Mwathani Jesû.

²¹Mwathani nî aabaeere inya na antû babaingî bareetîkia na barairira baracokeera Mwathani.

²²Nkuma yegiî antû bau îrakinyîra kanisa ya Jerusalemu. Tontû bûû, kanisa îîu îratûma Baranaba kûu Antioki.

²³Rîrîa aakinyîre ku aracionera ûrîa baarî na ûtugi bwa Mwathani, aragwîrua mono na arabeekîra wîru akîbeeraga bathingate Mwathani na mma barî na nkoro îmwe na mworoto jûmwe.

²⁴Baranaba aarî muntû ûmwega na woojûri Roho Ûmûtheru na weetîkîtie mono. Antû babaingî nî beetîkîrie na baracokanîîrua kîrî Mwathani.

²⁵Rîu Baranaba areeta Tarisû gûcwaa Saûlû.

²⁶Akûmwona, aramwikia Antioki. Bobaîrî barakara kaniseene îîu mwaka jûmwe junthe na bararitana antû babaingî. Kûu Antioki nîku antû barîa beetîkîtie beetîrwe akristû îgiita rîa mbere.

²⁷Kagiiteene o kau kongwa, iroria bing'anona nî biaumîre Jerusalemu bireeta Antioki.

²⁸ Ûmwe waao, ûrîa weetagwa Agabasi, ararûngama na inya ya Roho areera antû atî gûkagîa mpara înene gûntû kunthe. Mpara îîu yeejîre rîrîa Klaudiû aathanaga.

²⁹Rîu antû barîa beetîkîtie barauga atî o muntû arite kîrîa akoomba, baikie birî ûteethio kîrî eetîkia barîa baatûûraga Judea.

³⁰Nabo barathithia ûu na baratûma Baranaba na Saûlû baikia into birîa baaritîte kîrî akûrû ba kanisa.