Read KIMERU BIBLE PROTESTANT EDITION Maj 12 Bible Online

Maj 12 - KIMERU BIBLE PROTESTANT EDITION bible

Maj 12

¹Îgiiteene o rîu mûnene Herode araambîrîria kûthangîkia antû bamwe ba kanisa.

²Arooragithia Jakubu mûtaana wa ng'ina wa Johana na rûchiû.

³Rîrîa oonere ûntû bûu bûkûgwîria Ayahudi, aragwata kinya Peterû. Aathithîrie ûu îgiita rîa thigûûnkû ya Mîgaate îrîa îtiimbithîtue.

⁴ Peterû akûgwatwa, araingîrwa ncheera na arakarua nî ikundi bina bia asikarî bana bana. Herode aabangîte kûmûgambithia nyuma ya kîatho kîa Pasaka.

⁵Tontû bûû, Peterû araingîrwa ncheera îndî kanisa îraciûmia kûmûrombera Mûrungu.

⁶Kûrî ûtukû, mbere ya ntukû îrîa Herode aabangîte kûmûgambîthia mbere ya antû, Peterû nî aamami gatîgatî ka asikarî baîrî atheeki na nyororo ijîîrî, na asikarî bangî nî baakarîtie mwari jwa ncheera.

⁷Mûraîka wa Mwathani ararûngama akuî nawe na ncheera yonthe îroojûra weerû. Mûraîka araringithia Peterû aramwîra, “Ûkîîra ntûti!” O rîo nyororo irîa atheeki nacio njara iragwa nthî.

⁸Mûraîka aramwîra, “Îkîra nguû na iraatû.” Nawe arathithia u. Rîu mûraîka aramwîra, “Cioge chuka yaaku na ûnthingate.”

⁹Peterû aramûthingata na baraumagara ncheera. Ataamenyaga këethîra mantû jau mûraîka aathithagia jaarî ja mma îndî aathûgaanagia nî kîoneki akwoona.

¹⁰Rîrîa baakûrûkîre gîkundi kîa mbere kîa asikarî na kîa biîrî, barakinya mpingîroone ya chuuma îrîa yaakûrûkaga ntûûreene îîu. Mpingîro îîu nî yaarugûkîre yongwa na baraumagara oome. Peterû areetania na mûraîka ûu njîreene îmwe îndî areerûkîra Peterû ntûti.

¹¹Rîu nîrîo Peterû aaciûrîre jarîa jonthe jaathithîkîre arauga, “Nandî nkûmenya na mma atî nî Mwathani watûma mûraîka waawe nîkenda antunyûkia kuuma kîrî Herode na ambonokia kuuma kîrî mantû jonthe jarîa antû ba Israeli bareerîgîîrîte.”

¹²Akûmenya ûu, areeta mwanka nyomba ya Maria, ng'ina wa Johana, ûrîa weetagwa Maariko na arethîra antû babaingî boothûranîte ku bakîrombaga Mûrungu.

¹³Peterû araringaringa mûrango jwa mpingîro na mwarî ûmwe, nthûûmba yeetagwa Roda, îreeta kûmûrugûrîra.

¹⁴Mwarî ûu akûmenya kajû nî ka Peterû, aragwîrua mono na aroorîrua kûrugûra mpingîro na aramatûka ndeene kûbeera atî Peterû nî arûngi mpingîroone.

¹⁵Bareera mwarî ûu, “Ûrî na nthû?” Îndî we araciûmia kuuga atî nî bwa mma. Nabo baramwîra, “Ûu nî mûraîka waawe.”

¹⁶Îgiita rîu rîonthe Peterû noo aaringaringaga mûrango. Mûthieene bareeta bararugûra mûrango, na bakûmwona bararigara mono.

¹⁷Peterû arabakiria na njara arabeera ûrîa Mwathani aamûritîre ncheera. Akûbeera bamenyithie Jakubu na ataana ba baaba barîa bangî mantû jau, araumagara areeta gûntû kûngî.

¹⁸Rîrîa gwakeere asikarî baramaka mono bakîûranagia kûrîa Peterû aarî.

¹⁹Rîrîa Herode aaritîre Waatho atî Peterû acûûwe gûntû kunthe na baramwaga, nî augîre asikarî bau boorue biûria na ararita waatho atî booragwe. Rîu Herode arauma Judea, na areeta gûkara Kaisaria.

²⁰Herode nî aathûûrîrue mono nî antû ba Tiro na Sidoni mwanka baramûtûmîra atongeeria baao. Mbere mma, baraamba kwarîria na kwigithia Blasto nîkenda eethîrwa arî rûteere rwaao. Blasto nawe aarî mûrûngamîîri ûrîa mûnene wa nyomba îrîa mûnene aatûûraga. Rîu bareeta kîrî Herode baramûromba thîîrî, nîûntû nthîgûrû yaao yaatûûragua nî biakûrîa birîa biaumaga kûrîa mûnene Herode aathanaga.

²¹Ntukû îmwe îrîa, baatuîte kîatho, Herode areekîra ndwambambio ciaawe cia ûnene, arakarîra gîtî kîa ûnene, na araarîria antû barîa boothûranîte.

²²Antû bau baramûringîra nkemi bakiugaga, “Gaka nî kajû ka mûrungu, tî ka muntû.”

²³O au, mûraîka wa Mwathani araringa Herode aramûgwîthia nthî nîûntû ataaere Mûrungu ûkumio bûu. Nawe ararîîwa nî mang'inyo arakua.

²⁴Rûteto rwa Mûrungu rûreta na mbere gûtaamba na gûkûra.

²⁵Rîrîa Baranaba na Saûlû baathirîrie mantû jarîa baatûmi kûthithia Jerusalemu nî baajûkîrie Johana ûrîa weetagwa Maariko bareetania nawe.