Read KIMERU BIBLE PROTESTANT EDITION Maj 13 Bible Online

Maj 13 - KIMERU BIBLE PROTESTANT EDITION bible

Maj 13

¹Kaniseene îrîa yaarî Antioki antû bamwe nî baarî iroria na bangî aritani. Bamwe baabo baarî Baranaba na Simioni ûrîa weetagwa Ûmwirû, na Lucio kuuma Kurene na Manaeni ûrîa waakûranîrîtie amwe na mûnene Herode, na Saûlû.

²Îgiita rîmwe rîrîa baarombaga Mwathani, na baciatîte biakûrîa, Roho Ûmûtheru arauga, “Mbathûrîreni Baranaba na Saûlû nîûntû bwa ngûgî îrîa mbeetîte barita.”

³Bakûthiria kûromba na gûciata biakûrîa, bararîkîîra Baranaba na Saûlû njara na barabarekeeria baciîtîra.

⁴Baranaba na Saûlû bagûtûmwa nî Roho Ûmûtheru, bareenama mwanka Selucia. Rîu baraitia meri bareeta mwanka Saiprasi, nthîgûrû îrîa yaacîgîîrîîtue nî rûûjî.

⁵Rîrîa baakinyîre Salamisi baratûmîîria rûteto rwa Mûrungu iromberoone bia Ayahudi. Johana nî aarî nabo akîbateethagîîria.

⁶Nî beetîre kuuma rûteere rûmwe rwa Saiprasi mwanka Pafo, rûteere rûrîa rûngî, na kûu baratirima mûringi-biama ûmwe, ûrîa waarî kîroria kîa ûrongo, nawe aarî Mûyahudi weetagwa Barijesû.

⁷Muntû ûu aarî mûcoore wa Sagio Paûlû ûrîa waarî mûnene wa Saiprasi. Sagio Paûlû aarî muntû ûmûûme mono. Sagio Paûlû nî eetîre Baranaba na Saûlû nîûntû nî eendaga kûthikîîra rûteto rwa Mûrungu.

⁸Îndî mûringi-biama ûu Elimasi (tontû ûu nîu eetagwa na rûthiomi rwa Kîgriiki) arageria kûrigîria mûnene ûu nîkenda atîkeeje kwigua nteto iu na eetîkia aa mûkristû.

⁹Rîu Saûlû, ûrîa weetagwa Paûlû, oojûri Roho Ûmûtheru arakûûrîra mûringi biama ûu meetho na

¹⁰arauga, “Gwe mûtaana wa Nkoma, mûnthû wa waagîru. Gwe ûûjûri waayia na ûrongo. Gûtî rîo waatiga kwaîria antû na kûgeria kûgarûra ûûma bwa Mwathani nîkenda bwaa ûrongo.

¹¹Nandî Mwathani agagûkanûkia; ûkaa mûtumuumu, na ûtîûmba kwona weerû kagiita kang'anona.” O rîo araambîrîria kwona marwîrwî, aroojûrwa nî muundu, na araambîrîria gwataata nteere cionthe agîcwaa wa kûmûgwata njara.

¹²Rîrîa mûnene ûu wa Saiprasi oonere ûrîa gwakara, areetîkia na araa mûkristû nîûntû nî aarigarîrue mono nî ûritani bûrîa aigîrue bwegiî Mwathani.

¹³Paûlû na antû bangî barîa beetanîtie nawe bakuuma Pafo, nî baitîrie meri bareeta Paaga îrîa îrî nthîgûrû ya Pamfîlia. Rîu Johana arabatiga, na aracoka Jerusalemu.

¹⁴Îndî bo barauma Paaga bareta ntûûreene ya Antioki îrîa îrî Pisidia. Mûthenya jwa sabatû jûgûkinya barakûrûka kîromberoone na barakara nthî ku.

¹⁵Nyuma ya ithomo kuuma Waathoone bwa Musa na kuuma kîrî maandîko ja iroria, atongeeria ba kîrombero nî baatûmanîre kîrî bo barauga atîrî, “Ataana ba baaba këethîra bûrî na nteto cia kwîra antû nîkenda bûbeekîra inya, ugeni.”

¹⁶Rîu Paûlû ararûngama na arabakiria na njara na arauga atîrî, “Îbuî antû ba Israeli na bangî bonthe barîa bakîraga Mûrungu, thikîîreeni!

¹⁷ Mûrungu wa antû baba ba Israeli nî aathuurîre biûjûjû bieetû na arabaethia antû babaingî rîrîa baarî kûu Misri. Mûrungu nî aabaritîre kûu agîtumagîra inya yaawe înene.

¹⁸ Îgiita ta rîa mîaka mîrongo îna nî aabamenyereere barî kûu rwanda.

¹⁹ Ningî arathiria mîgongo mûgwanja ya nthîgûrû ya Kanaani na aranenkera antû baawe nthîgûrû îîu, îrî rûgai rwaao. Nî baatûûrîre ku mîaka magana jana ja mîrongo îtaano.

²⁰ Rîu baratongeerua nî agambi mwanka îgiita rîa kîroria Samueli.

²¹ Nyuma ya ûu barooria baeewe mûnene waao, na Mûrungu arabaa Saûlû, mûtaana wa Kishi, wa mwîrîga jwa Benjamini. Saûlû nî aabaathîre mîaka mîrongo îna.

²² Rîrîa Mûrungu aaritîre Saûlû, arathuura Daudi aee mûnene waao. Ûjû nîu Mûrungu aakûûjîrîre bûmwegiî, ‘Nkwona Daudi, mûtaana wa Jesii, arî muntû ûrîa nkoro yaakwa îcwaga, ûrîa ûkoojûria mantû jonthe jarîa mpendaga jathithua.’

²³Kuumania na rûrîîjo rwa muntû ûu, Mûrungu nî aretete Mwonokia nthî ya Israeli, tawe Jesû, o ta ûrîa eeranîrîte.

²⁴ Mbere ya kwîja kwa Jesû, Johana nî aarî agûtûmîîria kîrî antû bonthe ba Israeli atî no mwanka bairire na babatithue.

²⁵ Rîrîa Johana aarî akuî gûkinyia mûthia jwa ntûmîîri yaawe nî eerîre antû atîrî, ‘Bûrîthûgaania ni ndî ûu? Ni tî ni ûrîa bweteerete. Îndî kûrî ûmwe ûkeeja nyuma yaakwa, ûrîa ni ntîagîrîte gûkundûra mîrigi ya iraatû biaawe.’

²⁶“Ataana ba baaba, buî aana ba rûrîîjo rwa Abrahamu, na kinya buî barîa bakîraga Mûrungu, nî baatuî twatûmîîrwe ntûmîîri îîjî ya wonokio.

²⁷Nîkwîthîrwa atûûri ba Jerusalemu amwe na anene baao bataamenyere atî nîwe Mwonokia, kana baciûra mantû jarîa iroria biaugîre, jarîa baathomaga mîthenya yonthe ya sabatû. Îndî nî baatûmîre maandîko ja iroria joojûra bakûmûgitîra îgamba bûbûûî.

²⁸ Kinya këethîra bataamûgwatîre na ûntû noo bûmwe bwa gûtûma ooragwa, nî boorîrie Pilatû amûûragithie.

²⁹ Bakûûjûria jonthe jarîa jaandîki jamwegiî, baramûcuurûkia kuuma mûtharabeene, na baramwîka kaburiine.

³⁰Îndî Mûrungu nî aamûriûkîrie kuuma kîrî akuû.

³¹ Nawe nî aacionanîrie ntukû inyingî kîrî antû barîa baamûthingatîre kuuma Galili mwanka Jerusalemu. Bau nîbo nandî baeete akûûjî baawe kîrî antû ba Israeli.

³²Nandî tuî twîjîte aja kûbûreetera Nteto Injega îrîa Mûrungu aarîîkanîrie na biûjûjû bieetû,

³³ nî oojûrîtie mantû jau kîrî tuî nandî, tuî nchiarwa ciaao, akûriûkia Jesû kuuma kîrî akuû. O ta ûrîa kwaandîki ndeene ya Zaburi ya ijîîrî: ‘Gwe ûrî Mûtaana waakwa, naarua nkwaa abaagu.’

³⁴ “Ningî mantûûne jegiî ûrîa aamûriûkîrie kuuma kîrî akuû, nîkenda atîkoorere kaburiine, Mûrungu nî aaugîîte, ‘Ngakwaa itharimo bibitheru na bia mma, birîa ndeerîîre Daudi.’

³⁵ “Ningî nî augîîte kinya kîrî Zaburi ingî, ‘Ûtîrekeeria Ûrîa Mûtheru waaku, oorera kaburiine.’

³⁶“Nîkwîthîrwa Daudi nî aathithîrie ûrîa Mûrungu eendaga nthukîîne yaawe, rîu arakua na arathikwa o ta biûjûjû biaawe na mwîrî jwaawe jûroora.

³⁷Îndî ûrîa Mûrungu aariûkîrie kuuma kîrî akuû atoora.

³⁸Tontû bûû, menyeni atîrî ataana na aarî ba baaba, bûrîtûmîîrua ntûmîîri yegiî kûrekerwa kwa meeyia nîûntû bwa Jesû ûu,

³⁹na atî muntû wonthe ûrîa ûmwîtîkîtie nî arekeeri meeyia jonthe. Waatho bwa Musa bûtîngîûmba kûrekera muntû meeyia.

⁴⁰Tontû bûû, imenyeereni nîkenda nteto irîa ciaarîrue nî iroria itîkeeje kûbûgwata:

⁴¹ ‘Tegeeni buî barîa bamenaga bangî, makeeni na bûthire! Tontû nkathithia ûntû nandî, ûntû bûtîîtîkia kinya bwerwa nûû.’”

⁴²Rîrîa Paûlû na Baranaba baumaga kîromberoone kîu, antû nî baabeerencere beete ku ntukû ya sabatû îîu îngî nîkenda babamenyithia mantû jau nkûrûki.

⁴³Mûcemanio jûkûthira, Ayahudi babaingî na antû babaingî batî Ayahudi barîa baarî bakûgarûka baatonya ndiniine ya Ayahudi nî baathingatîre Paûlû na Baranaba. Atûmwa bau nabo barabaarîria bakîbekagîra inya nîkenda beeta na mbere gûtûûra beerîgîîrîte ûtugi bwa Mûrungu.

⁴⁴Ntukû ya sabatû îîu îngî îgûkinya akuî, antû bonthe ba ntûûra îîu nî beetîre kûthikîîra rûteto rwa Mwathani.

⁴⁵Îndî rîrîa Ayahudi boonere antû babaingî, nî baigîrue rûriitho mono, na barakararia jonthe jarîa Paûlû augaga na bakîmûrumangaga.

⁴⁶Îndî Paûlû na Baranaba baraaria na ûchamba nkûrûki barabeera, “No mwanka rûteto rwa Mûrungu rwambe rûtûmîîrue kîrî buî. Îndî nîûntû bûkûrûrega na bûtîgwituîra bwingwa bwona atî nî bûbuîri kûewa ûtûûro bwa kenya na kenya rî, tûrîbûtiga twîte kîrî antû barîa batî Ayahudi.

⁴⁷ Nîkwîthîrwa Mwathani nî atwathîte ûjû: ‘Nî nkûthuurîte wîthîrwa ûrî weerû bwa antû barîa batî Ayahudi, nîkenda antû bonthe nthîgûrûûne boonoka.’”

⁴⁸Rîrîa antû barîa batî Ayahudi baigîrue nteto iu baragwîrua mono na barakumia rûteto rwa Mûrungu. Antû bonthe barîa baarî bakûthuurwa nîkenda baeewa ûtûûro bwa kenya na kenya baraa eetîkia.

⁴⁹Rûteto rwa Mûrungu rûrataamba gûntû kûu kunthe.

⁵⁰Îndî Ayahudi baraujîîra eekûrû barîa beetîkîtie mono na baarî îgweta, na kinya arûme barîa baarî îgweta ntûûreene îîu barambîrîria kûthangîkia Paûlû na Baranaba, na barabeenga kwa inya barauma ntûûreene yaao.

⁵¹ Rîu atûmwa bararingaringa tîîri îrîa yaarî magûrûûne jaao îrî îkanûkia, na bareeta Ikoniamu.

⁵²Antû barîa beetîkîtie baragwîrua mono mono na baroojûrwa nî Roho Ûmûtheru.