Read KIMERU BIBLE PROTESTANT EDITION Maj 14 Bible Online

Maj 14 - KIMERU BIBLE PROTESTANT EDITION bible

Maj 14

¹Paûlû na Baranaba barî kûu Ikoniamu nî baakûrûkîre kîromberoone kîa Ayahudi na baraaria na ûchamba bûbwingî mwanka Ayahudi na Agriiki babaingî bareetîkia.

²Îndî Ayahudi barîa baaregere gwîtîkia nî baaujîrîre antû barîa bataarî Ayahudi na barabathûkia mathûgaanio jaao nîkenda bameneeria ataana na aarî ba baaba.

³Paûlû na Baranaba nî beetîre na mbere gûkara ku îgiita rîrînene. Nî baarîrie nteto cia Mwathani na ûchamba, na Mwathani ararikithia rûteto rwaawe rwa ûtugi. Aarikithîrie na biama na mantû ja kûrigaria jarîa aabombithîrie kûringa.

⁴Antû ba ntûûra îîu nî baagaûkanîre baraa ikundi biîrî; bamwe bareethîrwa barî rûteere rwa Ayahudi, na bangî rûteere rwa atûmwa.

⁵Rîu antû barîa batî Ayahudi amwe na Ayahudi, baragwatanîra na anene baao, na barabanga atî bathithîrie atûmwa mantû jamaaî na baboorage na maiga.

⁶Rîrîa atûmwa baamenyere ûntû bûu, nî baamatûkîre bareeta Listra na Deebe, ntûûra irîa ciaarî Likonia, na nthîgûrû ingî irîa ciaarî akuî,

⁷na baratûmîîria Nteto Injega cia Mûrungu ku.

⁸Nî kwaarî na muntû ûmwe kûu Listra wonji magûrû kuuma gûciarwa kwaawe na gûtî rîo oomba gwîta na magûrû kinya rîmwe.

⁹Muntû ûu nî aakarîre athikîîrîte Paûlû agîtûmîîria. Paûlû nî aamûraithîrîrie kûnûû na akwona atî arî na wîtîkio bwa kûûmba kworua,

¹⁰arauga na kajû gakanene, “Rûngama na magûrû jaaku bwega!” Muntû ûu ararûngama ntûti na araambîrîria gwîta.

¹¹Rîrîa kîrîndî kîonere ûrîa Paûlû athithia kîraambîrîria kûringa gîtuma na rûthiomi rwa Kîlîkonia gîkiugaga, “Mîrungu îkwîja kîrî tuî îkari ta antû!”

¹²Bareeta Baranaba Zeusi na bareeta Paûlû Harimesi nîûntû nîwe waaragia mono.

¹³Mûthînjîri-mûrungu wa mûrungu jûrîa jweetagwa Zeusi, jûrîa kîûrû kîaaju kîaarî oome ya ntûûra, araikia ndeegwa na maûa mbere ya mpingîro akîendaga we amwe na antû bangî baritîra atûmwa bau kîgongwana.

¹⁴Rîrîa Baranaba na Paûlû baigîrue nteto iu baratambûranga nguû ciaao na baramatûka kîrî kîrîndî kîu bakiugaga na kajû gakanene:

¹⁵ “Itû antû beetû, nîmbi îgûtûma bûthithia mantû jaja? Kinya tuî tûrî antû o ta buî. Twîjîte aja gûtûmîîria Nteto Injega kîrî buî, nîkenda bûtîgana na mîng'uanano îîjî ya ûtheri, na bwambîrîria kûthaathayia Mûrungu ûrîa woombîre Îgûrû na nthîgûrû na îria amwe na into bionthe birîa birî ku.

¹⁶Karaaja Mûrungu nî eetîkîîrîtie antû ba mîgongo yonthe bathingatage nkuagaya ciaao.

¹⁷Îndî kinya rîo nî oonanagia atî we arî o nîûntû bwa mantû jameega jarîa aathithagia: akaurithia ngai kuuma îgûrû, na agatûma imera bikûra na biciara, na akabwaa biakûrîa na agatûma bûgwîrua mono.”

¹⁸Kinya këethîra nî baugîre mantû jau, nî kwaarî na inya kûrigîria antû bau batîkabaritîre igongwana.

¹⁹Îndî Ayahudi bamwe nî beejîre kuuma Antioki na Ikoniamu na baraujîîra antû na bararinga Paûlû na maiga, na baramûkuuria baramuumaria oome ya ntûûra bakîthûgaanagia atî nî aakuîte.

²⁰Îndî rîrîa eetîkia boothûranîre na baramûthiûrûkîra, nî aarûngamîre na aracoka ntûûreene. Rûûneene we amwe na Baranaba bareeta Deebe.

²¹Nyuma ya gûtûmîîria Nteto Injega cia Mûrungu kûu Deebe antû babaingî nî beetîkîrie. Rîu Paûlû na Baranaba baracokeera Listra na Ikoniamu na Antioki.

²²Nî beekîre antû barîa beetîkîtie inya nîkenda beeta na mbere gwîtîkia. Ningî barabeera, “No mwanka twinthe tûthangîkue mono nîkenda tûûmba gûkûrûka Ûneneene bwa Mûrungu.”

²³Rîu barathuura akûrû ba gûtongeeria o kanisa o kanisa, na nyuma ya kûromba na gûciata biakûrîa barabatiga ûrîîthine bwa Mwathani waao, ûrîa bo baarî bagwîtîkia.

²⁴Rîu barakûrûkîîra nthîgûrû ya Pisidia na barakinya Pamfîlia.

²⁵Rîrîa baathirîrie gûtûmîîria rûteto rwa Mûrungu kûu Paaga, bareeta Atalia.

²⁶Kuuma kûu nî baitîrie meriine baraacoka Antioki, kûrîa baarî bakûromberwa beekwa ûrîîthine bwa ûtugi bwa Mûrungu nîûntû bwa ngûgî îrîa beetîte kûrita na rîu nî baarî bakûthiria kûmîrita.

²⁷Rîrîa baakinyîre Antioki nî boothûranîrie antû ba kanisa amwe na barabeera mantû jonthe jarîa Mûrungu aabatumîîre kûthithia na barabeera ûrîa aarugûrîre njîra ya gûtûma antû barîa batî Ayahudi beetîkia.

²⁸Nî baakarîre na eetîkia bau îgiita rîrîraaja.