Read KIMERU BIBLE PROTESTANT EDITION Maj 15 Bible Online

Maj 15 - KIMERU BIBLE PROTESTANT EDITION bible

Maj 15

¹ Antû bamwe nî baakinyîre Antioki baumîte Judea na baraambîrîria kûritana ataana na aarî ba baaba bakîbeerega, “Tiga bûgataanwa kûringana na Waatho bwa Musa, bûtîûmba kwonoka.”

²Paûlû na Baranaba nî baabakararîrie na bakûremwa kûgwatanîra mantûûne jegiî rûtaano, kanisa îragwatanîra atî Paûlû na Baranaba amwe na eetîkia bamwe beete Jerusalemu kîrî atûmwa na akûrû ba kanisa, baboorie ûrîa babuîrîte kûthithia.

³Tontû bûû, kanisa îrabatûma. Nabo barakûrûkîîra Foenicia na Samaria bakîîraga antû ûrîa antû barîa batî Ayahudi baagarûkîte na beetîkia Mûrungu. Nteto iu nî ciagwîrîrie mono barîa bonthe beetîkîtie.

⁴Bagûkinya Jerusalemu nî baagwatîrwe ûgeni nî kanisa yonthe na kinya atûmwa na akûrû ba kanisa. Rîu barabeera mantû jonthe jarîa Mûrungu aabatumîîre kûthithia.

⁵Îndî eetîkia bamwe ba barîa baarî ba gîkundi kîa Afarisayo nî baarûngamîre barauga, “No mwanka antû barîa batî Ayahudi bataanwe na baritanwe kûthingata Waatho bwa Musa.”

⁶Rîu atûmwa amwe na akûrû bareetana mûcemanio jûmûnene nîkenda baarîîria mantû jau.

⁷ Bakwarîîria ûntû bûu îgiita rîrîraaja, Peterû nî aarûngamîre arauga, “Ataana ba baaba, buî nî bwijî atî tene mma Mûrungu nî aanthuurîre kuuma kîrî buî nîkenda mbîta gûtûmîîria Nteto Injega ciegiî Jesû nîkenda beetîkia.

⁸ Mûrungu ûrîa wiijî nkoro cia antû, nî aakûûjîrîre atî akûbetîkîîria rîrîa aabaeere Roho Ûmûtheru o ta ûrîa aatweere kinya tuî.

⁹Mûrungu atî kîmenyano; tuî nabo tûkari ûmwe. Nî aabarekeere meeyia jaao rîrîa beetîkîrie.

¹⁰Nîmbi îndî îgûtûma bûgeria Mûrungu bûkîenda gûkamatithia eetîkia baba mûrigo jûrîa biûjûjû bieetû na kinya tuî twingwa twaremerwe gûkamata?

¹¹Nî tûgwîtîkia atî tûkoonokua nîûntû bwa ûtugi bwa Mwathani Jesû, o ta ûrîa kinya bo bakoonokua.”

¹²Antû bonthe barîa boothûranîte barakira ki, na barathikîîra Baranaba na Paûlû bakîeejana nteto ciegiî ûrîa Mûrungu aabatumîîre kûringa biama na kûthithia mantû ja kûrigaria kîrî antû barîa batî Ayahudi.

¹³Bakûthiria kwaria, Jakubu arauga, “Ataana ba baaba, nthikîîreeni!

¹⁴Simioni agûtwîra ûrîa Mûrungu aambîre kwonania nî eendeete antû barîa batî Ayahudi, rîrîa aathuurîre bamwe baao baa antû baawe.

¹⁵Ûntû bûbû nî bûringeene na nteto irîa ciarîrue nî iroria, o ta ûrîa kwaandîki:

¹⁶ ‘Mantû jaja jaathira ngacoka, na mbake kaîrî nyomba ya Daudi îrîa yaagwîre. Kuuma maganjoone nkamîaka kaîrî, na mîcokanîîrie kaîrî

¹⁷nîkenda antû bangî bonthe bacwaa Mwathani, na antû barîa batî Ayahudi bonthe barîa bagwetanagîrua na riîtwa rîaakwa bagacwaa Mwathani.

¹⁸Ûu nîu Mwathani akuuga, ûrîa ûtûmîte mantû jaja jonthe jamenyeka kuuma tene.’

¹⁹“Tontû bûû, ni ndîona atî tûtîbuîrîte kûthangîkia antû barîa batî Ayahudi, barîa bagarûkîte beetîkia Mûrungu.

²⁰ Îndî, tûbaandîkîreni barûga tûkîbakanagia: kûrîa biakûrîa biritîri mîrungu ya mîng'uanano nîûntû birî na mûgiro; na batigane na ûthûngîîri; na bakárîa nyama cia nyomoo îiiti; na bakányua tharike.

²¹Nîkwîthîrwa Waatho bwa Musa nî bûtwîre gûtûmîîrua ntûûreene cionthe na kûthomwa iromberoone bionthe ntukû cia sabatû îgiita rîrîraaja mono.”

²²Rîu atûmwa, na akûrû na kanisa îrî yonthe baroona kwagîrîte bathuure antû bamwe kuuma kîrî bo na babatûme Antioki barî amwe na Paûlû na Baranaba. Barathuura Judasi ûrîa weetagwa Baasaba, na Sailasi. Bau nîbo baaeei gîtîîo mono kîrî ataana na aarî ba baaba.

²³Nî baanenkeerwe barûga îîjî: “Baatuî, atûmwa na akûrû, ataana na aarî ba baaba beenu, nî tûkûbûkeethia buî ataana na aarî ba baaba beetû barîa batî Ayahudi, buî barîa bûrî Antioki, na Sîria na Cilicia.

²⁴Tûkwigua atî kûrî na antû bamwe kuuma kîrî tuî babûrigicanîtie na ndwaria ciaao na batûma bûgîa nkaanja nkoroone cieenu. Bo bathithîtie ûu batî na rûûtha kuuma kîrî tuî.

²⁵Tontû bûû, tûkwona kwagîrîte tûthuure antû bamwe na tûbatûme kîrî buî barî amwe na acoore beetû Baranaba na Paûlû,

²⁶barîa baacieejanîte gûtumîkîra Mwathani weetû Jesû Kristû kinya kûrî na ûgwati bwa kûûragwa.

²⁷Tontû bûû, tûkûbûtûmîra Judasi na Sailasi nabo bakaabwîra bongwa mantû jaja twaandîkîte.

²⁸Nîkwîthîrwa Roho Ûmûtheru na kinya tuî nî twonere tûtîagîrîte kûbwaîkia mûrigo jûmûrito tiga no mwanka bûthingate mantû jaja:

²⁹Bûkárîa biakûrîa biritîri mîrungu ya mîng'uanano birî kîgongwana—na bûkányua tharike; bûkárîa nyama cia nyomoo îiiti; bûtigane na ûthûngîîri. Bûkëeja kwimenyeera kuumania na jau twabwîra, bûkeethîrwa bûkûthithia bwega. Tigweni bwega?”

³⁰Antû bau baratûmwa na bagûkinya Antioki bareetana mûcemanio jwa kîûthûrano gîa eetîkia na barabanenkera barûga îîu.

³¹Rîrîa baamîthomere, baragwîrua mono nîûntû nî yaabeekîre inya.

³²Judasi na Sailasi, barîa baarî iroria, nî baabaarîîrie îgiita rîrîraaja bakîbaejaga ûchamba na kûbeekîra inya.

³³Bagûkara ku kagiita gagakai, ataana na aarî ba baaba barabeera bacoke na thîîrî kîrî barîa baabatûmîte. [

³⁴Îndî Sailasi nî oonere kwagîrîte gûtigwa ku.][3]

³⁵Paûlû na Baranaba nî beetîre na mbere gûkara Antioki bakîritanaga na gûtûmîîria rûteto rwa Mwathani barî amwe na antû bangî babaingî.

³⁶Nyuma ya îgiita rîrîkai, Paûlû areera Baranaba, “Twîte tûkariûngîre ataana na aarî ba baaba barîa barî ntûûreene irîa twatûmîrîîrie rûteto rwa Mwathani twoone ûrîa beetîte na mbere.”

³⁷Baranaba nî eendaga beetania na Johana ûrîa weetagwa Maariko,

³⁸ îndî Paûlû ateendaga beetania nawe nîûntû Maariko nî aarî akûbatiga barî Pamfîlia na aracoka antû a kûritanîria ngûgî nabo.

³⁹Tontû bûû, barakararania mono bobaîrî mwanka baraathûkana. Baranaba arajûkia Maariko, baraitia meri bareeta Saiprasi.

⁴⁰Nawe Paûlû arathuura Sailasi, na bakûromberwa nî ataana na aarî ba baaba babeeka ûrîîthine bwa ûtugi bwa Mûrungu, bareeta.

⁴¹Paûlû na Sailasi nî baakûrûkîîrîre Sîria na Cilicia bagîîkagîra kanisa iu inya.