Read KIMERU BIBLE PROTESTANT EDITION Maj 16 Bible Online

Maj 16 - KIMERU BIBLE PROTESTANT EDITION bible

Maj 16

¹Paûlû agûkinya Deebe na Listra, nî eethîîre mûkristû ûmwe weetagwa Timotheo. Ng'ina aarî Mûyahudi na nî aarî mûkristû. Îndî îthe aarî Mûgriiki.

²Timotheo nî aarî na îgweta rîrîega kîrî ataana na aarî ba baaba ba Listra na ba Ikoniamu.

³Paûlû nî eendere Timotheo eetania nawe rûgendoone. Tontû bûû, aramûtaana. Aathithîrie ûu nîûntû Ayahudi bonthe barîa baatwîre gûntû kûu nî baijî îthe aarî Mûgriiki.

⁴Rîrîa baakûrûkîîrîte ntûûreene iu, nî beeraga antû mantû jarîa atûmwa na akûrû baaugîîte kûu Jerusalemu, na bakabeera bajaathîkagîre.

⁵Tontû bûû, kanisa iu ireeta na mbere kûrika wîtîkioone, na eetîkia bareeta na mbere kwongeereka o mûthenya o mûthenya.

⁶Nî baakûrûkîîrîre Frijia na Galatia, nîûntû Roho Ûmûtheru nî aarî akûbakania gûtûmîîria kûu Asia.

⁷Rîrîa baakinyîre mwankeene jwa Misia, nî baagererie gwîta Bithinia, îndî Roho wa Jesû arabarigîîria.

⁸Tontû bûû, barakûrûkîîra Misia na bareeta Troa.

⁹Ûtukû bûu, Paûlû amami aroona kîoneki kîa muntû ûmwe wa Makedonia arûngi akîmwerencaga: “Itû njû Makedonia ûtûteethie.”

¹⁰Paûlû akwona kîoneki kîu, tûraithuranîra na mpwîî gwîta Makedonia, tûtî na nkaanja Mûrungu nî atwîtîte gûtûmîîria Nteto Injega ku.

¹¹Kuuma Troa tûreeta na meri mwanka Samothirace na rûûneene tûrakinya Neapoli.

¹²Kuuma kûu, tûreeta mwanka Filipi, ntûûra îrîa nene ya Makedonia. Makedonia yaathagwa nî Aroma. Rîu tûrakara ku ntukû ing'anona.

¹³Ntukû ya sabatû tûraumagara oome ya ntûûra na tûreeta rûteere rwa mûuro, arîa twathûgaanagia nio aarî antû a kûrombera Mûrungu. Tûrakara nthî, na tûraaranîria na eekûrû barîa boothûranîte o.

¹⁴Kîrî eekûrû bau baatûthikîîrîte nî kwaarî na mwekûrû ûmwe waathaathagia Mûrungu. Mwekûrû ûu eetagwa Lidia. Nawe aarî wa kuuma ntûûreene ya Thiatira. Aarî mûbiashara wa nguû cia rangi ya mûkû. Mwathani nî aarugûrîre nkoro yaawe na areetîkia nteto irîa Paûlû aaragia.

¹⁵Mwekûrû ûu amwe na nja yaawe bakûbatithua, nî aatûgwatîre ûgeni agîtwîraga, “Këethîra bûkwona na mma atî ûûni ngwîtîkia Mwathani, njûûni bûkare gwaakwa.” Nawe aratûkinyîîria mwanka tûreetîkîîria.

¹⁶Ntukû îmwe tweetîte antû arîa Mûrungu aarombagîrwa, nî twaacemanîrie na mwarî ûmwe nkombo, waarî na roho înthûûku îrîa yaatûmaga oomba kûringia. Mwarî ûu nî oonagîra barîa aaritagîra ngûgî, mbeecha inyingî kuumania na kûringia kwaawe.

¹⁷Rîu mwarî ûu arathingata Paûlû amwe naatuî akiugaga na kajû gakanene, “Antû baba nî nthûûmba cia Mûrungu Ûrîa Ûrî Îgûrû buru! Barîbûtûmîîria nîkenda bûmenya ûrîa bûûmba kwonoka!”

¹⁸Mwarî ûu nî aathithîrie ûntû bûu ntukû inyingî mwanka ntukû îmwe Paûlû arathûûra na aramûgarûkîra areera roho îîu, “Ka ngûkwatha riîtweene rîa Jesû Kristû uume ndeene ya mwarî ûûjû!” Roho îîu îrauma o rîo.

¹⁹Rîrîa barîa mwarî ûu oonagîra mbeecha boonere batîona mbeecha kaîrî, baragwata Paûlû na Sailasi na barabakururia na barabaikia kîeniine arîa anene baarî.

²⁰Barabathitanga kîrî mûgambi bakiugaga, “Antû baba nî Ayahudi na nî baretete thîîna inyingî ntûûreene yeetû.

²¹Barîritana nkuagaya irîa tuî Aroma tûkaanîtue nî waatho bweetû gûciîtîkîîria kana kûthingata.”

²²Antû bonthe bareetîkania nabo, na barageria kûûra Paûlû na Sailasi. Rîu mûgambi baratambûranga nguû cia Paûlû na Sailasi na baraathana atî baûûrwe ibooko.

²³Nyuma ya kûûrwa mpûûrwa înene baraingîrwa ncheera na asikarî araathwa abakarie bûbûbwega ûrîa batîûmba kûûra.

²⁴Tontû bûû, asikarî akwigua waatho bûu arabaikia kanyomba ka ndeene buru ka ncheera na aratheekeera magûrû jaao mîgogoone îmînene.

²⁵Îndî ûtukû gatîgatî Paûlû na Sailasi nî baarombaga na kwina ndwîmbo cia gûkumia Mûrungu, na abuungwa bangî bathikîîrîte.

²⁶O rîo nthîgûrû îrainaina na mîsingi ya ncheera îrainaina. Mîari îrarugûka o rîmwe na nyororo irîa ciatheekete abuungwa bau bonthe îragitûkanga.

²⁷Rîrîa asikarî wa ncheera ookîrîre na aroona mîrango îrugûki, nî aathûgaanîrie atî abuungwa nî baarî bakûmatûka. Tontû bûû, aracinûra rûchiû rwaawe akîenda gûciûraga.

²⁸Îndî Paûlû arauga na kajû gakanene, “Ûgáciûraga nîûntû twinthe tûrî aja!”

²⁹Mûkaria ûu arauga aewe taa na aramatûkanga ndeene na araigwithia magûrûûne ja Paûlû na Sailasi akiinainaga nî ûguaa.

³⁰Rîu arabaumaaria oome arabooria, “Atongeeria, nthithie atîa nîkenda mbonokua?”

³¹Nabo baramûcokeria, “Îtîkia Mwathani Jesû naagwe ûkoonokua amwe na antû ba mûciî jwaaku bonthe.”

³²Rîu baratûmîîria rûteto rwa Mwathani kîrî we na kinya kîrî antû ba mûciî jwaawe bonthe.

³³Asikarî ûu arabajûkia thaa o iu ciongwa, kûrî ûtukû na arabathambia ironda biaao na we amwe na antû ba mûciî jwaawe bonthe barabatithua o rîo.

³⁴Rîu arabakûrûkia nyomba yaawe na arabaa biakûrîa. We na antû ba mûciî jwaawe bonthe baragwîrua mono nîûntû bwa gwîtîkia Mûrungu.

³⁵Rîrîa gwakere, mûgambi baratûma asikarî bakiugaga, “Rekeerieni antû bau beete.”

³⁶Asikarî ûu wa ncheera areeta areera Paûlû, “Mûgambi bagûtûmana baûga bûthaûrwe. Tontû bûû, ûmagareeni bwîte na thîîrî.”

³⁷Îndî Paûlû arabacokeria, “Ee atîa? Nî baraatûûrîre ibooko mbere ya antû na tûtîraarî na maatia kinya këthîra tuî tûrî Aroma na baatûgera ncheera. Ka rîu bakwenda tuuma na witho? No mwanka bo bongwa beeje batûrekeerie.”

³⁸Asikarî bau bareera mûgambi bau nteto iu. Bakwigua atî Paûlû na Sailasi nî Aroma barakîra mono.

³⁹Rîu mûgambi bau bareeta kîrî Paûlû na Sailasi bararomba ûrekeri na nyuma ya kûbarita ncheera, barabaromba baume ntûûreene îîu.

⁴⁰Tontû bûû, Paûlû na Sailasi barauma ncheera, na bareeta kûriûngîra Lidia. Nî boonanîre na antû bangî barîa beetîkîtie na bakûbekîra inya baraciîtîra.