Read KIMERU BIBLE PROTESTANT EDITION Maj 17 Bible Online

Maj 17 - KIMERU BIBLE PROTESTANT EDITION bible

Maj 17

¹Paûlû na Sailasi bagûkûrûkîîra Amfipoli na Apolonia, nî baakinyîre Thesalonike kûrîa kwaarî na kîrombero kîa Ayahudi.

²Paûlû nî aakûrûkîre kîromberoone o ta ûrîa aamenyeretie. Nî aaritanîre antû maandîko sabatû ithatû irîa ciathingateene, nabo bakîmûûragia biûria.

³Arabooneria bwega atî nî kwaarî no mwanka Kristû athangîkue na ariûke kuuma gîkuûûne. Ningî arabeera, “Jesû ûûjû, nkûbûtûmîîria nîwe Kristû.”

⁴Ayahudi bamwe bareetîkia na baragwatana na Paûlû na Sailasi. Ningî kinya Agriiki babaingî barîa baakîraga Mûrungu na kinya eekûrû babaingî barîa baarî îgweta baragwatana na Paûlû na Sailasi.

⁵Îndî Ayahudi bamwe baraigua rûriitho na baracwaa ntûrîka cia antû na baragwatana na antû bangî na baraa gîkundi gîkînene, bararingithia ntûûra yonthe gîtuma. Rîu baracîgîria nyomba ya Jasoni beerîgîîrîte kwîthîra Paûlû na Sailasi ku nîkenda babaumaaria oome.

⁶Îndî bataabonere. Tontû bûû, barakuruthûra Jasoni na ataana na aarî ba baaba bamwe na barabaikia kîrî athani ba ntûûra îîu, bakîringaga gîtuma bakiugaga, “Antû baba nîbo barîa bauruganîtie nthîgûrû yonthe, na nandî bagûkinya aja ntûûreene yeetû.

⁷Nawe Jasoni nîwe ûrabagwatîre ûgeni kwaawe. Bonthe nî baunîte waatho bwa Kaisarî bakiugaga atî kûrî na mûnene ûngî wîtagwa Jesû.”

⁸Nteto iu iramakia athani na antû bonthe ba ntûûra îîu.

⁹Aathani bau nî baajûkîrie mbeecha irîa ciendekaga mbere ya muntû arekeerua kuuma kîrî Jasoni na antû bau bangî, rîu barabarekeeria.

¹⁰Ûtukû bwakinya, eetîkia baraikia Paûlû na Sailasi mwanka Berea. Paûlû na Sailasi bagûkinya bareeta kîromberoone kîa Ayahudi o rîo.

¹¹Antû ba Berea nî beendaga kûmenya mantû bwega nkûrûki ya antû ba Thesalonike. Nî baathîkagîîra rûteto barî na wîru mono na bageeta gûcûnkûûna Maandîko o ntukû o ntukû nîkenda bamenya këethîra mantû jarîa baarîtanagwa nî ja mma.

¹²Babaingî baao bareetîkia, na kinya eekûrû Agriiki bamwe barîa baarî îgweta na arûme Agriiki bareetîkia.

¹³Îndî rîrîa Ayahudi ba Thesalonike baigîrue atî Paûlû nî aatûmîîragia rûteto rwa Mûrungu kûu Berea, nî beetîre ku, na bararingithia antû gîtuma bakîbaujîîraga.

¹⁴Rîu ataana na aarî ba baaba bararingîîria Paûlû mwanka îrîeene îndî Timotheo na Sailasi baratigwa Berea.

¹⁵Eetîkia barîa baaringîrîtie Paûlû, bareetania nawe mwanka Athene. Rîu baacokeete, Paûlû arabatûma kîrî Sailasi na Timotheo babeere atî bamûthingate na mpwîî ûrîa kûûmbîka.

¹⁶Rîrîa Paûlû eeteerete Sailasi na Timotheo kûu Athene, nî aaigîrue bûbûûî mono rîrîa oonere ntûûra îîu yûjûri mîrungu ya mîng'uanano.

¹⁷Tontû bûû, kûu kîromberoone araaranîria na Ayahudi na bangî barîa batarî Ayahudi îndî beetîkîtie Mûrungu. Nî eetaga thokoone ntukû cionthe gûtûmîrîria barîa beethagîrwa barî ku.

¹⁸Aritani bamwe barîa baathingataga Filosofia yeetagwa Epikuriani[4] na îngî yeetagwa Stoiki[5] nî baacemanîrie na Paûlû. Bamwe baao barauga, “Nîatîa muntû ûûjû ûkûtherûka mantû oomba kuuga?” Bangî barauga, “Arîkara ta mûtûmîîria mîrungu tûtiijî nîûntû arîtûmîîria nteto injega ciegiî Jesû na kûriûkua.”

¹⁹Tontû bûû, baragwata Paûlû na baramwikia Aeropagasi[6] na barauga, “Nî tûkwenda kûmenya ûrîa ûritani bûbû bwerû ûkûritana bûkarakari?

²⁰Nîkwîthîrwa mantû jamwe jarîa tûkwigua ûkîarîa jarîonekana jarî mageni. Tontû bûû, nî tûkwenda kûmenya gîtûmi kîaajo.”

²¹Antû barîa baatûûraga Athene amwe na ageni barîa baatwîre ku nî beendeete mono gûkara bakîranaga nteto ngeni kana bakîthikagîîra nteto ngeni îgiita rîonthe.

²²Rîu Paûlû ararûngama mbere ya kîama kîrîa gîacemanîtie Areopagasi na arauga, “Antû ba Athene! Nî nkwona atî bûrî athingati ba ndini mantûûne jeenu jonthe.

²³Nîkwîthîrwa rîrîa ngûkûrûkîte nî ntegere gûntû kûrîa bûrombagîra, na ndoona kîritîro kîa igongwana kîaandîki ûjû: ‘Kîrî mûrungu ûrîa ûtiijîwe.’ Mûrungu ûu bûrombaga na bûtîkûmûmenya nîwe wengwa ngûtûmîîria kîrî buî.

²⁴ Mûrungu ûrîa woombîre nthîgûrû na into bionthe birîa birî ku, nîwe Mwathani wa îgûrû na nthî. We atîtûûraga nyomba ciaki nî antû.

²⁵Ningî atîîrîgagîîra muntû amûteethia noo atîa nîûntû nîwe weejaga antû ûtûûro na inya ya gwikia mîrukî na akaeejana into bionthe.

²⁶Kuumania na muntû ûmwe, we nî oombîre antû bonthe ba nthîgûrû. Nî aatuîre magiita na gûntû kûrîa babuîri gûtûûra

²⁷nîkenda antû bamûcwaa na kûrî na wîrîgîîro atî boomba kûmwigua na kûmwona. Îndî Mûrungu atîkûraaja naatuî.

²⁸Nîkwîthîrwa ‘Ndeene yaawe nî tûtûûraga na gwîtaîta na kwîthîrwa tûrî mwoyo,’ O ta ûrîa aandîki bamwe beenu baugîîte: ‘Kinya tuî tûrî nchîarwa ciaawe.’

²⁹“Tontû bûû, këethîra tuî tûrî aana ba Mûrungu, tûtîbuîrîte kûthûgaania atî Mûrungu akari ta thaabu, kana fetha kana iiga rîaji rîkathithua ûrîa muntû akûthûgaania.

³⁰Rîrîa antû gûtî u baijî, Mûrungu aakaraga teeka atîkwona meeyia jaao, îndî nandî ariuga no mwanka antû bonthe ba kuuma gûntû kunthe bairire meeyia jaao

³¹nîûntû nî eekîte ntukû îmwe îrîa akagitîra nthîgûrû îgamba na îota agîtumagîra muntû ûmwe ûrîa aathuurîre. Mûrungu nî aarikithîrie ûntû bûû kîrî antû bonthe rîrîa aariûkîrie muntû ûu kuuma kîrî akuû!”

³²Rîrîa baigîrue Paûlû akîaria nteto ciegiî kûriûka kuuma kîrî akuû, antû bamwe nî baathekere, îndî bangî barauga, “Tûkeenda gûkûthikîîra kaîrî ûkîaria nteto iu!”

³³Rîu Paûlû arabatiga, araciîtîra.

³⁴Îndî antû bamwe bareetîkia na bareetania nawe. Bamwe baabo baarî Dionisio wa kîama kîrîa gîacemanîtie Areopagasi, na mwekûrû ûmwe weetagwa Damarisi na kinya antû bangî.