Read KIMERU BIBLE PROTESTANT EDITION Maj 18 Bible Online

Maj 18 - KIMERU BIBLE PROTESTANT EDITION bible

Maj 18

¹Nyuma ya mantû jau, Paûlû nî aaumîre Athene na areeta Korintho.

²Kûu Korintho nî eethîîre Mûyahudi ûmwe weetagwa Akuila, waciarîri Pontu. Akuila na mwekûrû waawe weetagwa Prisila, bataarî bagûkarakara mono bakuuma Italia kûrîa Kaisarî Klaudiasi aarî akûrita waatho atî Ayahudi bonthe bathaame Roma. Paûlû nî eetîre kûboona,

³na nîûntû bo baarî atumi ba maema o ta ûrîa kinya we aarî mûtumi waajo, arakara nabo na bararita ngûgî iu barî amwe.

⁴Mîthenya yonthe ya sabatû nî aaragia nteto cia Mûrungu kîromberoone akîgeragia gûkuucia Ayahudi o na Agriiki beetîkia.

⁵Rîrîa Sailasi na Timotheo baakinyîre baumîte Makedonia, Paûlû nî aambîrîrie gûtumîra îgiita rîonthe gûtûmîîria, agîkûûjagîîra kîrî Ayahudi atî Jesû nîwe Kristû.

⁶Îndî rîrîa baambîrîrie kûmûkararia na kûmûruma, nî ainainîrie nguû ciaawe akîbeeraga, “Buî bwaûra nî îgûrû rîeenu bwingwa; ûûni ntî na maatia noo jarîku. Kuuma nandî ngeeta kîrî antû barîa batî Ayahudi.”

⁷Rîu arauma au aarî areeta gûkara nyomba ya muntû ûmwe weetagwa Tito Jastasi, ûrîa waathaathagia Mûrungu. Nyomba yaawe yaarî akuî na kîrombero.

⁸Krisipasi, ûrîa waarî mûnene wa kîrombero, nî eetîkîrie Mwathani, na kinya antû bonthe ba mûciî jwaawe bareetîkia. Akorintho babaingî bakwigua Paûlû agîtûmîîria nî beetîkîrie na barabatithua.

⁹Ûtukû bûmwe, Mwathani nî aarîrie Paûlû na njîra ya kîoneki: “Ûgákîra! Îta na mbere gûtûmîîria na ûgáitîjîra,

¹⁰nîkwîthîrwa ûûni ndî amwe naagwe. Gûtî muntû kinya ûrîkû ûgakûthithîria ûntû bûbûûî nîûntû antû babaingî ntûûreene îîjî nî baakwa.”

¹¹Rîu Paûlû arakara gûntû kûu mwaka jûmwe na mîeri îtantatû akîbaritanaga rûteto rwa Mûrungu.

¹²Îndî rîrîa Galio aarî mûnene wa Akaia, Ayahudi bonthe nî baagwatanîîre na bareeta baragwata Paûlû baramwikia kotini,

¹³bakîugaga, “Muntû ûûjû nî akwarîria antû akîbakuucagia bathaathayia Mûrungu ûrîa Waatho bweetû bûtîgwîtîkîîria.”

¹⁴Mbere ya Paûlû auga noo atîa, Galio nî eerîre Ayahudi, “Thikîîreeni buî Ayahudi! Gûkëethîrwa kûrî ûntû bûthithîtue bûbûthûûku kana Waatho buuni, ûûni ndîngî kûbûthikîîra.

¹⁵Îndî nîûntû nîka bûkûringa nkaanja mantûûne jegiî mîgambo na mariîtwa na Waatho bweenu bwingwa, giiteni îgamba rîu bwingwa. Ni nkûrega kwaa mûgambi mantûûne jau!”

¹⁶Nawe arabeenga kotini.

¹⁷Nabo bonthe baragwata Sosithenesi, ûrîa waarî mûtongeeria wa kîrombero na baramûûrîra au mbere ya koti. Îndî Galio atoonere teeka bûu bwaarî ûntû bûbûnene.

¹⁸ Paûlû agûkara na antû barîa beetîkîtie ntukû inyingî kûu Korintho, nî aabatigîre na araitia meri areeta Sîria arî amwe na Prisila na Akuila. Agûkinya Kenkerea nî eenjere mûtuundu jwaawe nîûntû bwa mûciîtio jûrîa aarî agûciîtia.

¹⁹Rîrîa baakinyîre Efeso, Paûlû nî aatigîre Prisila na Akuila ku na areeta kîromberoone kwaranîria na Ayahudi.

²⁰Antû nî baamwerencere akare nabo kagiita gakaraaja îndî ararega.

²¹Rîrîa aabatigaga nî aabeerîre atîrî, “Mûrungu eenda nkeeja kîrî buî kaîrî.” Rîu arauma Efeso na meri areeta.

²²Agûkinya Kaisaria, arauma meeriine areeta gûkeethia kanisa kûu Jerusalemu, na nyumeene areeta Antioki.

²³Agûkara Antioki kagiita gagakai, areeta na mbere na rûgendo rwaawe na arakûrûkîîra nthîgûrû ya Galatia na Frijia agîkagîra aritwa bonthe inya.

²⁴Mûyahudi ûmwe weetagwa Apolo, ûrîa waciarîri Alexandria, nî eetîre Efeso. Aarî mwaria wa bata mono na nî aijî Maandîko bwega mono.

²⁵Muntû ûu nî aaritani mantû jegiî njîra ya Mwathani, na nî aarî na wîru bûbwingî nî aaragia na akaritana mantû jegiî Jesû atîkûatia. Amwe na jau we aaijî ûbatithio bwa Johana akî.

²⁶Rîrîa Prisila na Akuila baigîrue akîaria na ûchamba kîromberoone, nî baamûjûkîrie na baramûritana Njîra îîu ya Mûrungu na baramûtarîria mantû bûbwega nkûrûki.

²⁷Rîrîa Apolo eendaga gwîta Akaia, eetîkia nî baamwîkîîre inya nkûrûki, na baraandîkîra aritwa ba kûu Akaia nîkenda bamûgwata ûgeni. Rîrîa aakinyîre ku, nî aateetherie antû barîa baarî bagwîtîkia nîûntû bwa ûtugi bwa Mûrungu,

²⁸nîûntû we nî aacindîre Ayahudi ndwariene ciaao mbere ya antû bonthe agîtumagîra Maandîko kwonania atî Jesû nîwe Kristû.