Read KIMERU BIBLE PROTESTANT EDITION Maj 19 Bible Online

Maj 19 - KIMERU BIBLE PROTESTANT EDITION bible

Maj 19

¹Rîrîa Apolo aarî Korintho, Paûlû nî aakûrûkîrîîre bwa rugûrû rwa Korintho na areeta arakinya Efeso. Kûu Efeso nî eethîîre aritwa bang'anona.

²Nawe arabooria, “Nî bwajûkîrîe Roho Ûmûtheru rîrîa bwetîkîrie?” Nabo baramûcokeria, “Arî! Tûtaigua atî kûrî Roho Ûmûtheru.”

³Rîu Paûlû arabooria, “Nî ûbatithio bûrîkû îndî bwabatithîrue nabu?” Baramûcokeria, “Nî ûbatithio bwa Johana.”

⁴ Rîu Paûlû arabeera, “Ûbatithio bwa Johana bwaarî bwa kwonania atî antû nî bairirîte. Johana wengwa nî eerîre antû beetîkie muntû ûrîa ûkeeja nyuma yaawe, tawe Jesû.”

⁵Bakwigua ûu, barabatithua riîtweene rîa Mwathani Jesû.

⁶Rîu Paûlû arabarîkîîra njara, na baroojûrwa nî Roho Ûmûtheru na barambîrîria kwaria na mîgambo mîgeni na kûroria.

⁷Bonthe baarî ta antû îkûmi na baîrî.

⁸Paûlû nî eetîre kîromberoone kagiita ka mîeri îthatû. Îgiita rîu rîonthe nî aaranagîria na antû arî na ûchamba akîgeragia kûbakuucia beetîkia nteto ciegiî Ûnene bwa Mûrungu.

⁹Îndî bamwe barîa boomîtie mîtwe yaao bararega gwîtîkia, na barambîrîria kwaria nteto înthûûku bakîmenagîîria Njîra ya Mwathani, mbere ya kîûthûrano kîa antû bonthe. Tontû bûû, Paûlû arauma kîrî bo na araajûkia antû barîa beetîkîtie kuuma kîrî bo, na areeta nabo kwaranîria nabo o ntukû o ntukû barî nyomba ya gûtirimanîra ya Tirano.

¹⁰Nî eetîre na mbere kûthithia ûu antû a mîaka îîrî mwanka antû bonthe ba Asia, Ayahudi na antû ba mîgongo ingî, baraigua rûteto rwa Mwathani.

¹¹Mûrungu nî aaringîre biama bia kûrigaria agîtumagîra Paûlû.

¹²Antû nî baajûkagia itambaa bia mamira na nguû ingî îrîa Paûlû aaringithagia na bagaciikia kîrî aajie na aajie bau bakoora mîrimo yaao, na barîa baarî na roho inthûûku ikauma.

¹³Ayahudi bamwe barîa baîjîwe atî nî beengaga roho inthûûku barathiûrûka nteere cionthe bakîgeragia gûtumîra riîtwa rîa Mwathani Jesû kwînga roho inthûûku kîrî barîa baarî nacio, bakiugaga, “Nî nkûbwinga riîtweene rîa Jesû ûrîa Paûlû atûmagîîria.”

¹⁴Ataana mûgwanja ba Skeva, ûrîa waarî Mûyahudi na mûthînjîri-Mûrungu ûrîa mûnene, nî baathithagia ûu.

¹⁵Roho înthûûku irabacokeria ûjû, “Jesû nî tûmuijî, na kinya Paûlû nî tûkûmûmenya, îndî buî bûrî bau?”

¹⁶Muntû ûu waarî na roho înthûûku arabathûngûthîra, arabakîria inya, araboomba bonthe. Ataana bau ba Skeva baramatûka kuuma nyomba îrîa baarî barî ithûnû na beekîri ngûma inyingî.

¹⁷Antû bonthe kûu Efeso, Ayahudi na barîa bataarî Ayahudi nî baaigîrue nteto iu. Bonthe baraigua ûguaa na barakumia riîtwa rîa Mwathani Jesû.

¹⁸Antû babaingî barîa baarî bagwîtîkia baraciumîria weerûûne na baraumbûra mantû jonthe jarîa baathithagia.

¹⁹Agaa babaingî nî baareetere mauku jaao, na barajothûrania amwe na barajaîthîîria antû bonthe bakîonaga. Baratara ûgûri bwa mauku jau na baroona, jarîngîuma ngiri mîrongo îtaano (50,000) cia fetha.

²⁰Tontû bûû, rûteto rwa Mwathani rûrataamba na rûragea na inya nkûrûki.

²¹Mantû jau jagûkarîka, Paûlû atongeeretue nî Roho, aragiita îgamba atî no mwanka akûrûkîîre Makedonia na Akaia rîu eete Jerusalemu. Ningî arauga, “Ndakinya ku, no mwanka mbîte kinya Roma.”

²²Rîu aratûma Timotheo na Erastasi, barîa baamûteethagia, arabeera beete Makedonia barî mbere yaawe. Îndî aratigwa arakara Asia kagiita gagakai.

²³Îgiita rîu nîrîo antû baaregere waatho na bararinga gîtuma gîkînene kûu Efeso nîûntû bwa Njîra ya Mwathani.

²⁴Nî kwaarî na mûturi wa into bia fetha weetagwa Demetiriasi, ûrîa wathithagia tûritîro twa igongwana twa fetha, twa mûrungu jwakari ta mûka jweetagwa Atemisi. Ngûgî îîu nî yoonagîra Demetiriasi amwe na ariti baawe ba ngûgî mbeecha inyingî mono.

²⁵Rîu Demetiriasi aroothûrania antû bangî bonthe barîa baaritaga ngûgî ta îîu yaawe na arabeera atîrî, “Akûrû, buî nî bwijî atî ûtonga bweetû buumanîtie na biashara îîjî tûkûringa.

²⁶Îndî nandî buî bwingwa nî bwigîîtue na bwacionera mantû jarîa Paûlû athithîtie Efeso; tî Efeso gunka îndî nî Asia yonthe. Nî agarûrîte antû babaingî mono na atûma beetîkia atî mîrungu îîjî îthithîtue nî antû, tî mîrungu kinya aniini.

²⁷Tontû bûû, ngûgî yeetû îrî ûgwatiine bwa kûmeneerua. Tî bûu bunka, kinya kîûrû kîa mûrungu jwa Atemisi gîkaa gîntû kîa ûtheri na mûthieene nkuma yaaju îthire Asia na nthîgûrûûne yonthe, kûrîa jûthaathagîrua.”

²⁸Baathiria kwigua nteto iu, baraakana nî mûthûûro na barambîrîria kûringa gîtuma bakiugaga, “Atemisi, mûrungu jwa antû ba Efeso nîjû mûnene!”

²⁹Ntûûra yonthe îroojûra gîtuma. Baragwata Gaiasi na Aristakasi barîa baarî ba kuuma Makedonia na beetanagia na Paûlû ngendoone ciaawe, na barabakururia na mpwîî mwanka kîeni kîa matinda.

³⁰Paûlû nî eendaga gwîta kûu antû baarî, îndî eetîkia baramûgiria.

³¹Atongeeria bamwe ba nthîgûrû îîu ya Asia, barîa baarî acoore ba Paûlû baratûmana kîrî we bakîmwerencaga ageeta kîeniine kîu.

³²Îgiita rîu antû nî baaringaga gîtuma o ûu ûtheri; bamwe bakiugaga bûbû, bangî bakiugaga bûrîa bûngî mwanka mûcemanio jûrambîrîria kûthûûka nîkwîthîrwa babaingî baabo bataijî kîrîa gîatûmîte boothûrana antû au.

³³Rîrîa Ayahudi baatûmîre Alexanda aumîra mbere ya antû, babaingî nî baathûgaanîrie atî nîwe ûu. Rîu Alexanda araboneeria na njara atî bakire nîkenda aiteteera.

³⁴Îndî rîrîa baamenyere atî we nî Mûyahudi, antû bonthe bararinga gîtuma akuî mathaa jaîrî bakiugaga, “Atemisi, mûrungu jwa antû ba Efeso nîjû mûnene!”

³⁵Mûthieene, karani wa ntûûra îîu nî oombîre kûbakiria na arabeera, “Îbuî antû ba Efeso, buî bwinthe nî bwijî atî ntûûra îîjî ya Efeso nîyo îtûûragia kîûrû kîa Atemisi ûrîa mûnene, na ntûûra îîjî nîyo kaiga karîa katheru kaagwîre kaumîte îgûrû.

³⁶Gûtî muntû ûûmba gûkaana ûntû bûu. Tontû bûû, borereeni na bûkáthithia ûntû kinya bûrîkû bûtîambîte kûthûgaania bwega.

³⁷Bûretete antû baba aja, kinya këethîra gûtî gîntû baraiya kuuma kîûrûûne kîa mûrungu jweetû, kana baruma mûrungu jweetû jwa mûka.

³⁸Këethîra Demetiriasi na antû barîa baritaga ngûgî ta yaawe, barî na mantû ja kûthitangîra antû baba, nî beete kotini na bakeethîra atongeeria ba ntûûra ku na bathitange.

³⁹Îndî bûkëethîrwa bûrî na mathîîna jangî, jaikieni Kîameene.

⁴⁰Twinthe tûrî ûgwatiine bwa kûthitangwa nîûntû bwa kûrega kwathîka na kûringa gîtuma mûthenya jwa naarua. Tûtî na gîtûmi gîa kûng'ana kîrîa tûûmba kweejana nîûntû bwa gîtuma gîkî tûkûringa.”

⁴¹Akuuga ûu, areera antû baane.