Read KIMERU BIBLE PROTESTANT EDITION Maj 2 Bible Online

Maj 2 - KIMERU BIBLE PROTESTANT EDITION bible

Maj 2

¹ Rîrîa ntukû ya Pentekoste yakinyîre, barîa beetîkîtie bonthe nî boothûranîte amwe.

²Ntûti îmwe mûruumo jûkari ta jwa ruuo rûrûnene nî jwejîre kuuma îgûrû na jûroojûra nyomba îrîa baarî.

³Rîu gîntû gîakari ta rûmûrî rwa mwanki kîroonekana na kîraigaana kunthe na o karûmûrî karakara îgûrû rîa o ûmwe waao.

⁴Bonthe baroojûrwa nî Roho Ûmûtheru, baraambîrîria kwaria na mîgambo mîgeni o ûrîa Roho aabombithagia kwaria.

⁵Îgiita rîu Ayahudi barîa baakîraga Mûrungu nî baarî Jerusalemu. Nabo baumîte nteere cionthe cia nthîgûrû.

⁶Rîrîa antû baigîrue mûruumo jûu, nî boothûranîre akuî na antû bau. Nî baarigarîre mono rîrîa o muntû aigîrue antû bau beetîkîtie bakîaria na rûthiomi rwaawe rungwa.

⁷Barigari na bamakîte mono nî booranagia, “Anga baba bonthe tûkwigua bakîaria tî ba kuuma Galili?

⁸Nîatîa îndî, o ûmwe weetû akwigua bakîaria na rûthiomi rweetû rungwa?

⁹Tûrî ba kuuma Pati, na Media, na Elamu na Mesopotamia, na Judea, na Kapadokia, Pontu na Asia,

¹⁰na Frijia na Pamfîlia, na Misri na Lîbia îrîa îrî akuî na Kurene na ageni ba kuuma Roma tabo Ayahudi na barîa baagarûkîte baa ba ndini ya Ayahudi.

¹¹Bangî baumîte Krete na Arabia. Twinthe nî tûkwigua bagîtwîra na mîgambo yeetû yongwa mantû jamanene jarîa Mûrungu athithîtie.”

¹²Bonthe barigari na bamakîte barooranîa, “Nîatîa ûntû bûbû bûgûtûritana?”

¹³Îndî bangî barathûmbia antû bau beetîkîtie bakiugaga, “Antû baba nîka boogiti.”

¹⁴Îndî Peterû amwe na barîa bangî îkûmi na ûmwe bararûngama, na araambîrîria gûteteera bangî kîrî ntundu na kajû gakanene, “Îbuî Ayahudi na bwinthe barîa batûûraga Jerusalemu, thikîîreeni bwega, rekeni mbwîre ûrîa kûrî.

¹⁵Antû baba batîogiti ûrîa bûkûthûgaania. Anga tî thaa ithatû cia rûkîîrî nandî?

¹⁶Ûû nîu kîroria Joeli aaugîîte:

¹⁷ ‘Mwathani ariuga ûjû; ntukûûne cia mûthia, ngatûûrîra antû bonthe Roho waakwa, ataana na aarî beenu bakaroria, na nthaka cieenu îkoona bioneki, na akûrû bakaroota irooto.

¹⁸Îî, kinya kîrî nthûûmba ciaakwa cia arûme na cia aka, nkabatûûrîra Roho waakwa ntukûûne iu, kinya bo bakaroria.

¹⁹Nkoonania mantû ja kûrigaria îgûrû, na mbonanie ndwano gûkû nthî; gûkeethîrwa kûrî na tharike, na mwanki na toogi înyingî;

²⁰riûa rîgatiga kûmûrîka kûgîe muundu, na mweri jûgatûnea ta tharike, mbere ya ntukû ya Mwathani, ntukû înene na îrî mwago îkinya.

²¹Rîu, ûrîa ûgakaîra riîtwa rîa Mwathani akoonokua.’

²²“Antû ba Israeli, thikîîreeni nteto iji: Jesû wa Nazarethi aarî muntû ûrîa waatûmîtwe nî Mûrungu, na inya yaawe nî yoonekanîre nîûntû bwa biama, na iriga, na mantû ja kûrigaria jarîa Mûrungu aamûtumîre kûthithia, o ta ûrîa buî bwingwa bwijî.

²³ Jesû ûûjû, kûringana na mûbango jwa Mûrungu, Mûrungu nî aijî atî bûkamûnenkanîra kîrî eeyia na bamwambe mûtharabeene.

²⁴ Îndî Mûrungu nî aamûriûkîrie kuuma kîrî gîkuû, na aramûthaûra kuuma kîrî înya yaakîo, nîûntû gîkuû gîtîngîûmba kûmûtheeka.

²⁵ Nîkwîthîrwa Daudi nî aaugîre mantû jamwegiî ûjû: ‘Nî ndoonere Mwathani arî mbere yaakwa magiita jonthe; nî nkûmwona arî akuî naani nîkenda ntinainua noo nîmbi.

²⁶Tontû bûû, nkoro yaakwa nî yaagwîrîrue; na ndîraina na nkeerû. Kinya mwîrî jwaakwa jûgakara jûrî na wîrîgîîro;

²⁷nîûntû gwe ûtîreekeria mwoyo jwaakwa jwîta mwankiine jwa kenya na kenya, kana ûrekeeria nthûûmba yaaku îrîa mbagîru yoora.

²⁸Nî ûmbonetie njîra cia mwoyo, ûkambûjûria kûgwîrua ndakwona.’

²⁹“Ataana ba baaba, ndîenda kûbwîra mantû mpûmîîrîtie atî jûûjû weetû Daudi, nî aakuîre na arathikwa; kinya kaburi kaawe karî aja gweetû kinya naarua tûrî.

³⁰ Tontû aarî kîroria, nî aijî atî Mûrungu nî aamûciîtîrîtie atî ûmwe wa nchiarwa ciaawe akaa mûnene na aathanage.

³¹Daudi nî aarî akwona na aaria auga atî Krîstû akarîûka na ‘ataatiganîîrue akara gwa akuû kana mwîrî jwaawe jwoora.’

³²Jesû o ûûjû nîwe Mûrungu aariûkîrie, naatuî twinthe tûrî akûûjî ba ûntû bûu.

³³Jesû nî aitithîrue îgûrû mwanka njara ya ûrîo ya Mûrungu na araewa kîewa kîrîa eerîîri nî Îthe kîa Roho Ûmûtheru. Mantû jarîa bûkwona na kwigua nandî nî kîewa kîa Roho ûrîa atûîtûûrîrîtie.

³⁴ Nîkwîthîrwa tî Daudi waaitîrie îgûrû îndî we nî aaugîre: ‘Mwathani nî eerîre Mwathani waakwa; kara rûteere rwaakwa rwa ûrîo,

³⁵mwanka mpeethie anthû baaku, gîkinyithio kîa magûrû jaaku.’

³⁶“No mwanka antû bonthe ba Israeli bamenye na mma atî Jesû ûrîa buî bwaambithîrie, nîwe wengwa Mûrungu aeetherie Mwathani na Kristû.”

³⁷Rîrîa antû baigîrue mantû jau, baratwîka nkoro, na barooria Peterû na atûmwa barîa bangî: “Ataana ba baaba, nîatîa bûkwenda tûthithia?”

³⁸Peterû arabacokeria, “O muntû nî airire na abatithue riîtweene rîa Jesû Kristû nîkenda bûrekerwa meeyia jeenu na bûkajûkia kîewa kîa Roho Ûmûtheru.

³⁹Tontû kîewa gîkî nî kîeenu na kîa aana beenu na kîa barîa barî kûraja, barîa Mwathani Mûrungu weetû eetaga beeta kîrî we.”

⁴⁰Peterû araaria na nteto ingî inyingî na arabeerenca arabeera atîrî, “Cionokieni buume nthukîîne îîjî nthûûku.”

⁴¹Antû babaingî nî beetîkîrie nteto ciaawe na barabatithua ntukû o îîu. Antû ngiri ithatû baroongeereka kîrî barîa beetîkîtie.

⁴²Bau bonthe baracieejana kûthingata ûritani bwa atûmwa, na gûkara barî ngwatanîroone îmwe na kûrîa biakûrîa barî amwe na kûromba Mûrungu.

⁴³Atûmwa nî baaringîre biama bibingî na barathithia mantû jamaingî ja kûrigaria mwanka antû baroojûrwa nî ûguaa.

⁴⁴ Barîa beetîkîtie bonthe nî beetîre na mbere gûtûûra barî amwe na barî ngwatanîroone îmwe na bakîgaanaga into biaao bionthe.

⁴⁵Nî beendagia birîa baarî na bio na bakagaîra bangî mbeecha kûringana na ûbatu bwa o muntû o muntû.

⁴⁶Nî baacemanagia kîûrûûne ntukû cionthe na baacemanagia nyomba ciaao kûrîa biakûrîa barî amwe bagwîrîtue na barî na nkoro intheru,

⁴⁷bagîkaathaga Mûrungu, na bakîendagwa nî antû bonthe. O mûthenya o mûthenya Mwathani nî oongagîîra antû barîa boonokaga kîrî bo.