Read KIMERU BIBLE PROTESTANT EDITION Maj 20 Bible Online

Maj 20 - KIMERU BIBLE PROTESTANT EDITION bible

Maj 20

¹Gîtuma gîkûthira, Paûlû areeta aritwa na arabeekîra inya, rîu arabatiga areeta Makedonia.

²Rîrîa aakûrûkîîrîre gûntû kûu nî oomagîîria antû ba ku mono mwanka arakinya nthîgûrû ya Griiki.

³Nî aakarîre ku mîeri îthatû. Rîrîa aithuranagîra eeta Sîria, aramenya Ayahudi nî bairebete kûmûthithîria bûbûûî. Tontû bûû, aroona nî bwega acoke bwa Makedonia.

⁴Sopateri, mûtaana wa Pirusi wa kuuma Berea, nî eetanîrie nawe barî na Aristakasi na Sekundu barîa baarî ba kuuma Thesalonike, na Gaiasi wa kuuma Deebe; na Timotheo, na Takikasi na Trofimasi barîa baarî ba kuuma Asia.

⁵Antû bau nî beetîre barî mbere nîkenda batweteera kûrîa Troa.

⁶Naatuî, nyuma ya thigûûnkû ya Mîgaate îrîa îtiimbithîtue, nî twaitîrie meri kuuma Filipi na nyuma ya mîthenya îtaano, tûrakinya Troa na tûrakara ku mîthenya mûgwanja.

⁷Ntukû ya mbere ya kiumia nî twothûranîte nîûntû bwa kîatho gîa kuunanga mîgaate. Paûlû nî aarîîrie antû na areeta na mbere gûtûmîîria mwanka ûtukû gatîgatî nîûntû nî eendaga gwîta rûûneene.

⁸Nyomba îrîa twaarî ngorobeene, nî kwaarî na taawa inyingî ciaakanaga.

⁹Mûthaka ûmwe weetagwa Eutikasi nî aakari nthî ndiriceene rîrîa Paûlû aaragia. Nî aaîrue nî toro mwanka aramama buru. Nî aagwîre nthî kuuma ngorobeene ya ithatû na antû baramûkamatanîra arî ûmûkuû.

¹⁰Îndî Paûlû areenama na arakuama na aragwata mûthaka ûu na arauga, “Bûkámaka nîûntû arî mwoyo.”

¹¹Rîu Paûlû araitia ngorobeene kaîrî na akûng'enyûranga mîgaate na aarîa, areeta na mbere gûtûmîîria îgiita rîrîraaja mwanka kûrakea. Rîu araabatiga na araciîtîra.

¹²Antû bau barajûkia mûthaka ûu na baraana nawe arî mwoyo na baraborerua mono.

¹³Nî twaitîrie meeriine na tûreeta mwanka Asosi, kûrîa twaarî tûjûkie Paûlû, nîûntû we aabangîte gwîtîîra nthîgûrû înjûmo.

¹⁴Rîrîa aatwîthîre Asosi, tûramûjûkia na tûreeta mwanka Mitilene.

¹⁵Twauma kûu, tûragwata rûgendo rwa gwîta Kiosi na tûrakinya rûûneene. Ntukû îîu îngî tûrakinya Samosi na rûûneene tûrakinya Miletasi.

¹⁶Paûlû ateendaga gûkinya nthî Efeso nîkenda atîgaakare nkûrûki kûu Asia. Ningî nî aarî na mpwîî cia gûkinya Jerusalemu nîûntû bwa thigûûnkû ya Pentekoste këethîra kwombîka.

¹⁷Paûlû arî o kûu Miletasi nî aatûmanîre Efeso akîîraga akûrû ba kanisa beete bacemanie nawe.

¹⁸Bagûkinya arabeera, “Buî nî bûkûmenya ûrîa ndaatûûrîre amwe naabuî kuuma ntukû îrîa ndakinyîre Asia.

¹⁹Nî bûkûmenya ûrîa ndaaritîîre Mwathani ngûgî ndiinyiîtie mono, na nkîrîraga na nkîonaga magerio jamaingî kuumania na nkireba cia Ayahudi.

²⁰Nî bwijî atî ûûni ntaatirikama nkîbwîra ûntû kinya bûrîkû bwa kûbûguna na nkîbûritana tûrî biûthûranoone kana ngîîtanagia na mîciî.

²¹Nî ndaakûûjagîîra kîrî Ayahudi na antû barîa batî Ayahudi mantû jegiî kwirira na gûcokeera Mûrungu na jegiî gwîtîkia Mwathani Jesû Kristû.

²²Nandî thikîîreeni! Ûûni mbîtîte Jerusalemu nîûntû ka mbathîkîrîte Roho Ûmûtheru buru na ntiijî mantû jarîa nkoona ndakinya ku.

²³Ûrîa mbijî nî atî Roho Ûmûtheru nî ampumbûrîrîte atî ntûûreene cionthe irîa ngakûrûkîîra, nkathangîkua na mpiingîrwe ncheera.

²⁴ Îndî, ntîgûtara ûtûûro bwaakwa teeka bûrî na gîtûmi kîrî ni. Ûrîa nkwenda nî kûûjûrîa mwîto jwaakwa na kûthiria ngûgî yaakwa îrîa Mwathani Jesû aampeere, tayo gûtûmîîria Nteto Injega ciegiî ûtugi bwa Mûrungu.

²⁵“Nî nkûmenya atî gûtî kinya ûmwe weenû kîrî buî barîa ntwîre gûtûmîîrîria Ûnene bwa Mûrungu, ûkambona kaîrî.

²⁶Tontû bûû, naarua ga nkûbwîra na mma atî ûmwe weenu akëeja kûûra, nî ntîûrua.

²⁷Nîkwîthîrwa ntaatirikama nkîbûtûmîîria kîrîra kîonthe kîa Mûrungu.

²⁸Imenyereeni buî bwingwa na bûmenyeere antû barîa Roho Ûmûtheru abûnenkerete bûmenyagîîra. Eeni arîîthi ba kanisa ya Mûrungu îrîa aacioneere nîûntû bwa tharike ya Mûtaana waawe.

²⁹Nî nkûmenya bwega atî ndaauma kîrî buî, mbawa ing'entu ikeeja kîrî buî na itîcaîîra antû barîa bûmenyagîîra.

³⁰Îgiita rîgaakinya rîrîa antû bamwe kuuma gîkundiine kîeenu bakaaria nteto cia ûrongo nîkenda boogora eetîkia bamwe babathingata.

³¹Tontû bûû, kareni bûciûki, bûkîririkanaga atî nî ndaritanîre o ûmwe weenu, ûtukû na mûthenya, mîaka îthatû, nkîrîraga meethori.

³²“Nandî ga nkûbûîka ûrîîthine bwa Mûrungu na kîrî ntûmîîri ya ûtugi bwaawe, bûrîa bûkoomba kûbûkûria, na kûbûaa ithaarîmo birîa Mûrungu eekîrîte antû baawe bonthe.

³³Gûtî rîo ndairîrîria fetha, kana thaabu, kana nguû cia muntû kinya ûrîkû.

³⁴Buî bwingwa nî bwijî atî ndîraritaga ngûgî na njara ciaakwa ningwa, nîkenda nthiria moobatu jaakwa na ja antû barîa ndîraarî nabo.

³⁵Nî mbwoneretie mantû jonthe atî bûritage ngûgî na inya nîkenda bûteethagia barîa batî na inya, bûkîriikanaga nteto irîa Mwathani Jesû wengwa aaugîre: ‘Kweejana nî kûtharimi nkûrûki ya kûewa.’”

³⁶Rîrîa Paûlû aathirîrie kwaria, we amwe nabo nî baaturîrie maru na bararomba.

³⁷Bonthe nî baarîraga bamûkumbatîrîtie na kûmûcûnca bakîmwîraga eete bwega.

³⁸Ûntû bûrîa bwaatûmîre baigua bûbûûî mono nî kûbeera atî batîmwona kaîrî. Amwe na bûu, nî baamûringîrîrie mwanka meeriine.