Read KIMERU BIBLE PROTESTANT EDITION Maj 21 Bible Online

Maj 21 - KIMERU BIBLE PROTESTANT EDITION bible

Maj 21

¹Tûkûbeera nî bwega, nî twaitîrie meri tûreeta tûtîgwaûkîra tûrakinya Kosi. Rûûneene tûreeta Rodesi na kuuma au tûreeta Patara.

²Kûu, tûreethîra meri îmwe yeetîte Foenicia na tûraitia ku tûreeta nayo.

³Rîrîa twakinyîre antû arîa twoonaga Saiprasi îrî kûraaja, tûragarûka rûteere rwa ûmotho na tûreeta bwa Sîria. Meri îrarûngîkwa ntûûreene ya Tiro nîkenda îritwa mîrigo îrîa yaakamatîte.

⁴Nî twaacûîre eetîkia barîa baarî ntûûreene îîu na tûrakara nabo ntukû mûgwanja. Bagîteethagua nî inya ya Roho, eetîkia bau nî beerîre Paûlû agéeta Jerusalemu.

⁵Îndî ntukû cieetû cia gûkara nabo ikûthira, eetîkia bonthe barî na eekûrû baao na twaana baratûringîîria mwanka oome ya ntûûra. Tûrî au rûteere rwa îria, twinthe tûraturia maru tûraromba na tûrabeera batigwe bwega na tûraciîtîra.

⁶Rîu tûraitia meeriine, nabo baraana.

⁷Tûkuuma Tiro tûreeta mwanka Tolemi. Kûu tûrakeethia barîa beetîkîtie na tûrakara nabo ntukû îmwe.

⁸ Rûûneene, tûrauma au tûreeta Kaisaria na tûrakûrûka nyomba ya mûtûmîîria ûmwe weetagwa Filipû. We aarî ûmwe wa barîa mûgwanja, barîa baathûûri gûteethereria kûu Jerusalemu.

⁹Nî aarî na aarî bana bataagûri, na baarî na kîewa kîa ûroria.

¹⁰ Tûgûkara kûu ntukû inkaai, kîroria kîmwe gîetagwa Agabasi kîrakinya kîumîte Judea.

¹¹Kîreeja arîa twaarî, na kîrajûkia mûcibi jwa Paûlû, kîraitheeka njara na magûrû, na kîrauga, “Roho Ûmûtheru ariuga ûjû: ‘Ûu nîu Ayahudi barîa barî Jerusalemu bakaoga mwene mûcibi jûjû na bamûnenkanîre kîrî antû barîa batî Ayahudi.’”

¹²Rîrîa twaigîrue nteto iu, tuî na barîa bangî baarî o, tûreerenca Paûlû atîgeete Jerusalemu.

¹³Îndî we aracokia, “Nîatîa bûkûthithia? Ka bûkûrîra nîkenda bûmbîkîra ûguaa? Ni nî ndiithuranîrîte, guikua ncheera na kûûragwa ndakinya Jerusalemu, nîûntû bwa Mwathani Jesû.”

¹⁴Rîrîa twaaremerwe nîwe, tûraikirîra na tûrauga, “Nî gûkare o ta ûrîa Mwathani akwenda.”

¹⁵Nyuma ya gûkara kûu îgiita rîng'anona, tûraithuranîra na tûreeta mwanka Jerusalemu.

¹⁶Aritwa bamwe ba kuuma Kaisaria nî beetanîrie naatuî na baratwikia nyomba ya muntû ûmwe wa kuuma Saiprasi, weetagwa Munasoni, nîkenda tûkara kwaawe. Muntû ûu aarî ûmwe wa barîa beetîkîrie barî ba mbere.

¹⁷Rîrîa twakinyîre Jerusalemu, eetîkia nî baatûgwatîre ûgenî bûbwega mono.

¹⁸Rûûneene Paûlû amwe naatuî tûreeta kûriûngîra Jakubu; na akûrû bonthe ba kanisa nî baarî o.

¹⁹Paûlû akûbakeethia, nî aabamenyithîrie mantû jonthe bwega, jarîa Mûrungu aathithîtie kîrî antû barîa batî Ayahudi kuumania na ntûmîîri yaawe.

²⁰Rîrîa baigîrue nteto iu barakumia Mûrungu. Rîu bareera Paûlû, “Mûtaana wa baaba, nî ûkwona wengwa atî Ayahudi ngiri inyingî nî baretîkîrie na bonthe barî na wîru mono kûthingata Waatho bwa Musa.

²¹Ningî nî beeri atî nî ûritanîte Ayahudi bonthe barîa batûûraga kîrî antû barîa batî Ayahudi, bagátindanîra na Waatho bwa Musa, ûkîbeeraga bagátaana aana baao kana bathingata nkuagaya cia Kîyahudi.

²²Nandî rî, nîatîa kûbuîrîte kûthithua? Gûtî nkaanja bakaigua atî nî ûreejîre.

²³ Tontû bûû, thithia ûrîa tûgakwîra. Aja tûrî na antû bana bathirîtie gwîka mûciîtio.

²⁴Îtania nabo na wiitherie bakiitheria na ûbarîîre beenjwe mîtwe yaao. Waathithia ûu, antû bonthe bakamenya atî nteto irîa baraigîtue ikwegiî tî cia mma na bakamenya atî nî ûthingataga Waatho bwa Musa.

²⁵ Mantû jegiî antû barîa batî Ayahudi, barîa bathirîtie kwaa eetîkia nî twaabatûmîîre barûga tûkîbeeraga ûrîa twaatuîre atî: bakárîa biakûrîa biritîrî mîrungu ya mîng'uanano birî kîgongwana; na bakányua tharike; na bakárîa nyama cia nyomoo îiiti; na batigane na ûthûngîîri.”

²⁶Rîu Paûlû arajûkia antû bau, na rûûneene arathithia mambura ja kwitheria arî amwe nabo. Aracoka arakûrûka kîûrûûne na araringa ribooti kuuga ntukû irîa ciatigeere mambura ja kwitheria jathira, nîkenda barita kîgongwana kîa o muntû o muntû.

²⁷Rîrîa ntukû iu mûgwanja ciaarî akuî kûthira, Ayahudi bamwe barîa baaumîte Asia nî boonere Paûlû arî kîûrûûne na baraujîîra antû bonthe mwanka baramûgwata

²⁸bakiugaga, “Antû ba Israeli, itû tûteethieni! Muntû ûûjû nîwe ûraritanaga gûntû kunthe mantû ja kûthûûmbia antû beetû, na kûthûûmbia Waatho bwa Musa na kinya kûmenithia kîûrû. Amwe na jau, nandî agûkûrûkia antû barîa batî Ayahudi kîûrûûne eekîrithia antû aja atheru mûgiro.”

²⁹ Baaugîre ûu nîûntû nî baarî bakwona Trofimasi wa kuuma Efeso arî na Paûlû ntûûreene na barathûgaania atî Paûlû nî aarî akûmûkûrûkia kîûrûûne.

³⁰Ntûûra yonthe îraringa gîtuma na antû baramatûka kuuma nteere cionthe na baragwata Paûlû, na baramûkururia na baramuumagaria oome ya kîûrû na mîari ya Kîurû îraingwa o rîo.

³¹Barî akuî kûmûûraga, nteto irakinyîra mûtongeeria wa asikarî ba Kîroma atî Jerusalemu yonthe nî yaaringaga gîtuma.

³²Ntûti îmwe mûtongeeria ûu wa asikarî arajûkia asikarî bamwe na bareenamanga nao na rwîro. Rîrîa antû boonere asikarî amwe na mûtongeeria waao baratiga kûûra Paûlû.

³³Mûtongeeria ûu wa asikarî areeta kîrî Paûlû aramûgwata na araathana atheekwe na nyororo ijîîrî. Rîu arooria, “Muntû ûûjû nûû, na nî atîa athithîtie?”

³⁴Antû bamwe baaugaga ûntû bûmwe, na bangî bakauga bûngî. Nîkwîthîrwa nî kwaarî na gîtuma gîkiingî mono mûtongeeria ûu wa asikarî nî aaremerwe kûmenya carûrûkû ûrîa gwakarîkîte. Tontû bûû, araatha antû bamwe baikie Paûlû nyomba îrîa asikarî baararaga.

³⁵Asikarî nî baamûkamatîre mwanka nkathîîne cia gwîtia nyomba îîu, nîûntû antû nî beendaga kûmûûraga.

³⁶Antû bonthe nî baamûthingatîre bakiugaga na kajû gakanene, “Nî ooragwe buru!”

³⁷Rîrîa aarî akuî gûkûrûkua nyomba, arooria mûtongeeria wa asikarî ûjû, “Ndoomba gûkwîra gaûntû?” Mûtongeeria ûu aramûcokeria, “Ka wiijî kwaria Kîgriiki?

³⁸Anga gwe tî Mûmisri ûrîa o rua rua ûratûmîre antû barema na atongeeria ooragani ngiri inya (4,000) beeta rwanda?”

³⁹Paûlû aramûcokeria, “Ûûni ndî Mûyahudi, na nciarîri Tarisû, îrîa îrî Cilicia. Ni mpuumîte ntûûra îrî îgweta mono. Itû ndakwerenca mpa rûûtha mbarîrie antû.”

⁴⁰Mûtongeeria ûu aramwîtîkîîria. Rîu Paûlû ararûngama au nkathîîne na aroneeria antû na njara atî bakîre. Rîrîa baakirîre, arambîrîria kûbaarîria na Kîhibirania akiugaga: