Read KIMERU BIBLE PROTESTANT EDITION Maj 22 Bible Online

Maj 22 - KIMERU BIBLE PROTESTANT EDITION bible

Maj 22

¹“Ba baaba na ataana ba baaba, itû nthikîîreeni nciiteteere mbere yeenu nandî!”

²Rîrîa baigîrue akîbaarîria na Kîhibirania, barakira ki kinya nkûrûki. Rîu Paûlû areeta na mbere kûbeera.

³ “Ûûni ndî Mûyahudi, na nciarîri Tarisû îrîa îrî Cilicia. Îndî nkûrîrîte ntûûreene îîjî ya Jerusalemu ndî mûritwa wa Gamalieli. Nî ndaaritanîrwe kûthingata Waatho bwa biûjûjû bieetû ntîkuuna kinya bûmwe, ndî na wîru mono mantûûne jegiî Mûrungu o ta ûrîa buî bûkari naarua.

⁴ Nî ndaathangîkagia na nkooraga antû barîa baathingataga Njîra ya Mwathani; nkîgwataga arûme na aka nkabaikia ncheera.

⁵Mûthînjîri-Mûrungu ûrîa mûnene na akûrû bonthe ba Kîama boomba gûkûjîîra ûntû bûbû. Nî ndaeerwe kinya barûga nîbo, yaandîkîri Ayahudi barîa baatwîre Damaski. Tontû bûû, ndîreeta Damaski nîkenda ngwata antû bau na mbareeta Jerusalemu batheeki na nyororo nîkenda bakanûkua.

⁶“Ndî njîreene mbîtîte, ndî akuî gûkinya Damaski, nî ndaaringîrwe nî weerû bûbûnene buumîte îgûrû, kûrî ta thaa thita cia mûthenya.

⁷Rîu ndîragwa nthî, na ndîraigua kajû gakîmbîîra: ‘Saûlû! Saûlû! Nîkî ûnthangîkagia?’

⁸Naani ndîrauga, ‘Nîgwe ûû, Mwathani?’ Nawe arambîîra, ‘Nî ni Jesû wa Nazarethi, ûrîa ûthangîkagia.’

⁹Antû barîa twaarî nabo nî boonere weerû bûu îndî bataigua kajû ka ûrîa waaragia naani.

¹⁰Rîu ndîrooria, ‘Nîatîa nkathithia, Mwathani?’ Nawe arambîîra, ‘Rûngama, na wîte Damaski na kûu ûkeerwa mantû jonthe jarîa ûbuîri kûthithia.’

¹¹Rîu ntoombaga kwona nîûntû bwa weerû bûu. Tontû bûû, antû barîa twaarî nabo barangwata njara mwanka Damaski.

¹²“Kûu Damaski, nî kwaarî na muntû ûmwe weetagwa Anania. Nî muntû waakîrîte Mûrungu na woojûragia Waatho bweetû. Ningî nî aatîîtwe mono kîrî Ayahudi bonthe barîa baatwîre Damaski.

¹³Nî eejîre kûmbona, na ararûngama akuî naani arauga, ‘Mûtaana wa baaba Saûlû, coka kwona!’ O îgiita rîu rîongwa ndîroona kaîrî, na ndîramwona.

¹⁴Rîu Anania arambîîra, ‘Mûrungu wa biûjûjû bieetû agûkûthuura nîkenda ûmenya wendi bwaawe, na woone Nthûûmba yaawe îrîa Mbagîru, na wiigua agîkwarîria na kajû kaawe kongwa.

¹⁵Nîkwîthîrwa ûkaa mûkûûjî waawe na wîîrage antû bonthe mantû jarîa woona na waigua.

¹⁶Rîu nandî nîmbi wetereete? Rûngama na ûbatithue na ûthambue meeyia jaaku nîûntû bwa gûkaîra riîtwa rîaawe!’

¹⁷“Rîrîa ndacokere Jerusalemu, nî ndeetîre kîûrûûne na nkîrombaga, nî ndoonere kîoneki.

¹⁸Ndîroona Mwathani akîmbîîra: ‘Ithare, uume Jerusalemu na mpwîî nîûntû antû ba gûkû batîîtîkîîria ûkûûjî bwaaku mantûûne jambegiî.’

¹⁹Naani ndîramûcokeria, ‘Mwathani, antû baba nî baijî bwega mma atî nî ni ûrîa weetanagia na irombero bionthe nkîgwataga na nkaûûra antû barîa baagwîtîkagia.

²⁰ Kinya rîrîa mûkûûjî waaku Stefano ooragîrwe, ni ningwa nî ndaagwatanagîra na îthithio rîu na ndîrakaria nguû cia barîa baamûûragîre.’

²¹Rîu Mwathani arambîîra, ‘Ciîtîre, nîkwîthîrwa ngagûtûma kûraaja, kîrî antû barîa batî Ayahudi.’”

²²Antû nî baakiri ki, baathikîîrîte Paûlû. Rîrîa aaugîre nteto iu, barambîrîria kûgondoka na kajû gakanene bakiugaga, “Nî ooragwe! Atîbuîrîte kwîthîrwa arî mwoyo.”

²³Bareeta na mbere kûringa gîtuma na kuinainia nguû ciaao na kûgera tîîri bwa îgûrû.

²⁴Mûtongeeria wa asikarî arauga Paûlû atonyithue nyomba na arabeera bamûûre ibooko nîkenda abeera kîrîa gîatûmaga Ayahudi baringa gîtuma.

²⁵Îndî rîrîa baamûtheekere nîkenda bamûûra ibooko, nî oorîrie asikarî ûmwe, ûrîa waarûngi au, “A-rî, Waatho nî bûgwîtîkîîria muntû ûrîa ûciarîri Roma aûûrwa ibooko atîambîte kûgambithua?”

²⁶Rîrîa asikarî ûu aaigîrue ûu, nî eetîre areera mûtongeeria wa asikarî, “Nîatîa ûkwenda kûthithia? Muntû ûûjû nî Mûroma!”

²⁷Rîu mûtongeeria wa asikarî areeta kîrî Paûlû na aramwîra, “Mbîîra, ka ûrî Mûroma?” Paûlû aramûcokeria, “Îî ndîwe.”

²⁸Mûtongeeria ûu wa asikarî arauga, “Ûûni ndaeere Mûroma rîrîa ndaarîîre mbeecha inyingî mono.” Paûlû arauga, “Ûûni ndaaciarîrwe ndî Mûroma.”

²⁹Antû barîa beeteerete kûûra Paûlû bakîmûûragia biûria baraciîtîra ntûti na kinya mûtongeeria ûu wa asikarî aramaka mono akûmenya atî Paûlû nî Mûroma na nî aarî akûmûtheeka.

³⁰Rûûneene, mûtongeeria wa asikarî areenda kûmenya mantû jongwa jarîa Ayahudi baathitangîrîte Paûlû. Rîu arathaûra Paûlû mînyororo îrîa yaamûtheekete, na areera athînjîri barîa anene ba Mûrungu amwe na Kîama kîonthe boothûrane. Rîu araikia Paûlû kîrî bo.