Read KIMERU BIBLE PROTESTANT EDITION Maj 23 Bible Online

Maj 23 - KIMERU BIBLE PROTESTANT EDITION bible

Maj 23

¹Paûlû arakûûrîra antû bau baarî Kîameene meetho na arauga, “Ataana ba baaba, ntwîre ntî na ûntû bwa kwigambithia nabû ndeene yaakwa, mbere ya Mûrungu, mwanka naarua tûrî.”

²Rîu mûthînjîri-Mûrungu ûrîa mûnene, tawe Anania, araatha antû barîa baarûngi akuî na Paûlû bamûringe rwîî mûromo.

³ Paûlû aramwîra, “Mûrungu wengwa nîwe ûgakûringa rwîî, gwe ûkari ta rûthingo rwaki chokaa. Ûrî aja nîkenda ûngambithia kûringana na Waatho, îndî nîkî ûkuuga ndiingwe rwîî na Waatho bûtîgwîtîkîîria?”

⁴Antû barîa baarûngi akuî na Paûlû baramwîra, “Nîkî ûkûruma mûthînjîri-Mûrungu ûrîa mûnene?”

⁵ Paûlû aracokia, “Ataana ba baaba, ntîkwijî atî nîwe mûthînjîri-Mûrungu ûrîa mûnene. Kinya Maandîko nî jakuuga, ‘Ûkária ûntû bûbûthûûku bwegiî mûtongeeria wa antû beenu.’”

⁶ Rîrîa Paûlû oonere atî bamwe barîa baarî Kîameene kîu baarî Asadûkayo na bangî Afarisayo, aratûmîîria na inya arabeera: “Ataana ba baaba, ûûni ndî Mûfarisayo, ndî mûtaana wa Afarisayo. Ûûni ndeeti Kîameene aja nîûntû nî mbîtîkîtie atî antû baakuû bakariûka.”

⁷Akuuga ûu, Afarisayo na Asadûkayo barateta mono na mûcemanio jûratwîkana ikundi biîrî.

⁸ Asadûkayo batîtîkagia atî antû baakuû nî bariûkaga kana beetîkia kûrî araîka, kana roho inthûûku. Afarisayo nabo nî beetîkîtie mantû jau jo-jathatû.

⁹Bararega kwiganua buru mwanka aritani bamwe ba Waatho, ba gîkundi kîa Afarisayo bararûngama na boomîrîtie barauga, “Gûtî ûntû bûbûûî tûkwona muntû ûûjû athithîtie. Kwombîka akeethîrwa aarîrîtue nî Roho kana mûraîka.”

¹⁰Nkaanja îraingîa nkûrûki mwanka mûtongeeria wa asikarî arakîra Paûlû atambûrangwa nî antû. Tontû bûû, areera asikarî baawe bajûkie Paûlû kwa inya kuuma kîrî bo, na bamûcokie kûrîa asikarî bau baakaraga.

¹¹Ûtukû o bûu, Mwathani ararûngama akuî na Paûlû na aramwîra, “Ûmîîria! Ûkûthiria gûnkûûjîîra Jerusalemu, nandî no mwanka wîte Roma ûgankûûjîîre.”

¹²Rîrîa gwakeere rûûneene, Ayahudi bamwe nî baacemanîrie na baraireba na baraciîtia barauga: “Tûtîrîa kana tûnyua tûtîambîte kûûraga Paûlû.”

¹³Barîa bairebere baarî antû nkûrûki ya mîrongo îna.

¹⁴Rîu bareeta kîrî athînjîri-Mûrungu barîa anene na akûrû barauga, “Tuî tûgûciîtia atî tûtîrîa no mbi mwanka tûûrage Paûlû.

¹⁵Tontû bûû, buî amwe na Kîama, tûmaneeni kîrî mûtongeeria wa asikarî bûmwîre atî nî bûkwenda Paûlû areetwa kîrî buî, bwigwetie atî ka bûkwenda kûgwata mantû jamwegiî bwega. Naatuî nî twithuranîrîte kûmûûraga mbere ya akinya kîrî buî.”

¹⁶Îndî mûtaana wa mwarî wa ng'ina wa Paûlû nî aaigîrue mûbango jûu na areeta kûrîa asikarî baakaraga areera Paûlû.

¹⁷Rîu Paûlû areeta ûmwe wa asikarî na aramwîra, “Ikia mûthaka ûûjû kîrî mûtongeeria wa asikarî; kûrî ûntû arî nabu bwa kûmwîra.”

¹⁸Tontû bûû, aramûjûkia na aramwikia kîrî mûtongeeria waao arauga, “Paûlû, ûrîa ûbuungi, ambûûria nkûretere mûthaka ûûjû nîûntû kûrî ûntû arî nabu bwa gûkwîra.”

¹⁹Mûtongeeria ûu aragwata mûthaka ûu njara na aramwikia gateere aramûûria, “Nîatîa ûkwendaga kûmbîîra?”

²⁰Mûthaka ûu arauga, “Ayahudi nî betîkanîîrîtie gûkûromba rûûtha ûbaikîrie Paûlû Kîameene rûûjû, baigwetie atî Kîama nî gîkwenda kûmenya mantû jamwegiî bwega nkûrûki.

²¹Îndî ûgéetîkîîria nîûntû kûrî na antû nkûrûki ya mîrongo îna bamwiciithîrîte njîreene. Nî baciîtîtie atî batîrîa kana banyua mbere ya bamûûraga. Nandî nî baithuranîrîte betereete ûmûrekeeria.”

²²Tontû bûû, areera mûthaka ûu aciîtîre na aramwîra akéera muntû noo ûrîkû atî akûmwîra ûntû bûu.

²³Rîu mûtongeeria wa asikarî areeta asikarî baîrî na arabeera, “Thaa kenda cia ûtukû ciakinya, thuranîreni asikarî magana jaîrî, na asikarî mîrongo mûgwanja barîa beetithagia mbarathi, na asikarî magana jaîrî barîa batumagîra matumo, nîkenda beeta Kaisaria.

²⁴Ningî thuranîreni mbarathi irîa Paûlû agatûmîra na bûmûkinyie arî thîîria kîrî Felix ûrîa waarî mûrûngamîîri.”

²⁵Rîu mûtongeeria ûu araandîka barûga îkiugaga ûjû:

²⁶Jûkia nkeethi gwe mûkaathe mûrûngamîîri Felix, kuuma kîrî ni Klaudiasi Lusia,

²⁷Muntû ûûjû nî aragwatîrwe nî Ayahudi na baraarî akuî kûmûûraga. Rîrîa ndîramenyere nî Mûroma nî ndîretîre na asikarî baakwa na twamwonokia.

²⁸Nî ndîramwikîrie Kîameene kîaao nkîenda kûmenya bwega kîrîa bamûthitangîrîte.

²⁹Nî ndîramenyere atî bamûthitangîrîte mantû jegiî Waatho bwaao. Tontû bûû, gûtî îthûûkia kinya rîmwe nkwona arî narîo rîa gûtûma ooragwa kana aingîrwa ncheera.

³⁰Rîrîa ndîramenyere atî Ayahudi nî barathithîtie nkireba ya kûmûûraga, nî ndîratuîre mûrete kîrî gwe na ndîreera barîa baramûthitangîte beeje bamûthintange kîrî gwe.

³¹Tontû bûû, asikarî bau barajûkia Paûlû o ta ûrîa beeri na baramwikia ûtukû o bûu bungwa mwanka kîrî Antipatri.

³²Rûûneene asikarî barîa beetîte na magûrû baracoka kambîîne yaao na baratiga barîa baarî mbarathine beetanie nawe.

³³Nî beetanîrie nawe mwanka Kaisaria na baranenkera mûrûngamîîri barûga na baratiga Paûlû kîrî we.

³⁴Mûrûngamîîri ûu akûthoma barûga, nî oorîrie Paûlû nthîgûrû îrîa aumîte. Rîrîa aamenyere atî nî wa kuuma Cilicia,

³⁵arauga, “Ngakûthikîîra rîrîa barîa bagûkûthitanga bakeeja.” Rîu ararita waatho atî Paûlû nî akarue nî asikarî arî gîkaroone kîa Herode.