Read KIMERU BIBLE PROTESTANT EDITION Maj 24 Bible Online

Maj 24 - KIMERU BIBLE PROTESTANT EDITION bible

Maj 24

¹Nyuma ya ntukû ithaano, Anania, mûthînjîri-Mûrungu ûrîa mûnene arakinya Kaisaria arî na akûrû babakai na waakiri ûmwe weetagwa Tatulo. Nî beetîre kîrî mûrûngamîîri na barathintanga Paûlû.

²Rîu Paûlû areetwa, na Tatulo arambîrîria kûmûthitanga ûjû: “Mûkaathe Felix, kuuma ûkwambîrîria kwaathana nî tûgwîrîrîtue îgiita rîa thîîrî. Mantû jamaingî jarîa ûtûmîte jagarûrwa nî jatûmîte nthîgûrû îîjî yeetû îthinyaara.

³Mantû jau nî jatûmîte twinthe tûgwîrua gûntû kunthe, na nî tûgûgûcokeria nkaatho inyingî mono mono.

⁴Îndî nandî, ntîkwenda gûgûteera kagiita gaaku; tontû bûû, nî tûgûkwerenca nîûntû bwa wega bwaaku, ûthikîîre karwaria geetû gaakuî.

⁵Nî twonete muntû ûûjû nî ûmûûî mono. Nîwe ûringithagia Ayahudi bonthe gîtuma nthîgûrûûne yonthe. Ningî nîwe mûtongeeria wa kîama kîa Anazarini.

⁶Ningî nkûrûki ya ûu, nî areendaga gwîkîrithia kîûrû mûgiro îndî twamûgwata [na nî tûreendaga kûmûgambithia kûringana na Waatho bweetû.

⁷Îndî Lusia, mûtongeeria wa asikarî, aratonyeera o, aramûjûkia kwa inya kuuma kîrî tuî na

⁸arauga atî barîa tûkûmûthitanga twîje kîrî gwe.][7] Ûkëeja kûûria muntû ûûjû biûria ûkamenya kuuma kîrî we, mantû jonthe jarîa tûkûmûthitanga najo.”

⁹Ayahudi nabo bareetîkîîria atî jau jonthe akûthitangwa najo nî ja mma buru.

¹⁰Rîu Felix areera Paûlû nî aarie. Nawe Paûlû arauga, “Ndî na kûgwîrua gûkwingî ngiiteteera aja mbere yaaku mbijî atî ûgwe nî ûtwîre ûrî mûgambi wa mûgongo jûjû jweetû mîaka îmingî.

¹¹Woomba kwîthîrwa ûkîmenyaga atî tî nkûrûki ya ntukû îkûmi na ijîîrî ikûrûkîte kuuma ndîgwîta Jerusalemu kûthaathayia Mûrungu.

¹²Ayahudi baatambîthîre ngîtetaga na muntû kinya ûrîkû, kana baambîthîra nkîûjîîraga antû nîkenda barega Waatho kûu kîûrûûne kana kîromberoone, kana ntûûreene iu.

¹³Ningî batîûmba kwonania na mma atî mantû jarîa bakûnthitangîra jarî o.

¹⁴Jaja nîjo mantû jarîa ngwîtîkîîria mbere yaaku: Ûûni nî mbathîkagîra Mûrungu wa biûjûjû bieetû, ntwîre nkîthingataga Njîra îrîa bo bongwa bagwîta gîkundi kîa ûrongo. Nî mbîtîkîtie mantû jonthe jarîa jaandîki Waathoone bwa Musa na jarîa jaandîki nî iroria.

¹⁵Nî mbîrîgagîîra Mûrungu o ta ûrîa kinya bo bamwîrîgagîîra atî, antû bonthe barîa baagîru na barîa batî babaagîru bakariûkua.

¹⁶Tontû bûû, nciûmagia o ûrîa nkûûmba nîkenda mbîthîrwa ntî na ûntû bwa kwigambithia nabu mbere ya Mûrungu na mbere ya antû.

¹⁷ “Nyuma ya gûtûûra gûntû kûngî mîaka îmîkaai, nî ndeetîre Jerusalemu gwikîria antû baakwa mbeecha na kûrita igongwana.

¹⁸Rîrîa ndaathithagia mantû jau, nîrîo baambîthîre kîûrûûne, na nî ndaarî ndîkûthiria kûthithia mambura ja kwitheria. Gûtî antû baarî amwe naani kana kwîthîrwa kûrî antû baaringaga gîtuma. Îndî Ayahudi bamwe kuuma Asia

¹⁹nî babuîrîte kwîthîrwa barî aja mbere yaaku banthitanga, këethîra kûrî ûntû barî nabu bwa kûnthitangîra.

²⁰Kana tiga antû baba barî aja bauge nî îthûûkia rîrîkû boonere ndî narîo rîrîa ndeetîrwe Kîameene,

²¹ tiga ûntû bûmwe akî ndaugîre ndûngami mbere yaao: ‘Naarua bûrîngambithia nîûntû nî mbîtîkîtie atî akuû bakariûka.’”

²²Rîu Felix, ûrîa waijî bwega mantû jegiî Njîra îîjî, aratîîria îgamba rîu na arabeera, “Nkagiita îgamba rîrî rîrîa Lusiasi, mûtongeeria wa asikarî akeeja.”

²³Rîu ararita waatho kîrî asikarî ûrîa waakarîtie Paûlû na aramwîra atî nî akarue bwega na akáinyîîrua na acoore baawe nî betîkagîîrue bamûriûngagîre nîkenda baingagia moobatu jaawe.

²⁴Nyuma ya ntukû inkai, Felix areejania na mwekûrû waawe Durusila, ûrîa waarî Mûyahudi. Araathana Paûlû aikue kîrî we, na aramûthikîîra akîaria mantû jegiî gwîtîkia Kristû Jesû.

²⁵Îndî rîrîa Paûlû aambîrîîrie kwaria mantû jegiî waagîru, na gwikaania mairîrîîria ja mwîrî na mantû jegiî îgamba rîrîa rîkeeja, Felix aramaka mono na arauga, “Nandî woomba gwîta; ngagwîta kaîrî rîrîa nkoona kaanya.”

²⁶Îgiita o rîu nî eerîgagîîra atî Paûlû akamûkukuma na mbeecha. Tontû bûû, nî eetaga Paûlû maita jamaingî na akaaria nawe.

²⁷Îndî nyuma ya mîaka îîrî, Pociasi Festasi araa ngavana wa Kaisaria antû a Felix. Felix nî aatigîre Paûlû ncheera nîûntû nî eendaga kwendwa nî Ayahudi.