Read KIMERU BIBLE PROTESTANT EDITION Maj 26 Bible Online

Maj 26 - KIMERU BIBLE PROTESTANT EDITION bible

Maj 26

¹Rîu Agripa areera Paûlû, “Ûrî na kaanya ka gwitetera gwengwa.” Paûlû aratambûrûkia njara yaawe na araiteteera ûjû:

²“Mûnene Agripa, naarua ndî na munya nîûntû bwa kûûmba gwiteteera aja mbere yaaku, nîûntû bwa mantû jarîa Ayahudi banthitangîte najo.

³Tontû gwe nî wiijî bwega nkuagaya cionthe cia Ayahudi na mantû jarîa batîgwatanagîra, itû nî ngûkwerenca ûnthikîîre ûtî na mpwîî.

⁴“Ayahudi nî baijî bwega ûrîa ntûûraga kuuma ndî muntû ûmwîthî. Ningî nî baijî ûrîa ndaatûûraga ndî nthîgûrûûne yeetû na kinya Jerusalemu.

⁵ Nî baijî kuuma tene, këethîra bakeenda kûrita ûkûûjî, atî kuuma rîrîa ndaambîrîrie ntwîre ndî ûmwe wa Afarisayo, gîkundi kîrîa kîthingataga mantû jonthe jarîa Waatho buugîîte.

⁶Nandî ndî aja nkîgambithagua nîûntû nî mbîrîgîîrîte wîrane bûrîa Mûrungu aeere biûjûjû bieetû.

⁷Wîrane o bûrîa bungwa mîîrîga îkûmi na îîrî ya mûgongo jweetû îtûûraga îîrîgîrîte îgiita rîonthe rîrîa îthaathagia Mûrungu na wîru, ûtukû na mûthenya. Mûkaathe mûnene, Ayahudi banthitangîte nîûntû bwa wîrîgîîro bûu!

⁸Nîmbi îgûtûma bwona teeka Mûrungu atîriûkagia akuû?

⁹ Ni ningwa nî ndaaijî na mma atî nî ndaabuîri kûthithia mantû jamaingî nkîrwaa na riîtwa rîa Jesû wa Nazarethi.

¹⁰Nî ndaathithîrie mantû jau Jerusalemu. Rîrîa athînjîri-Mûrungu barîa anene baanenkeere Waatho, nî ndaingîîre barîa beetîkîtie ncheera na îgiita rîa kûbooraga rîakinya, kinya ni nkauga nî booragwe.

¹¹Nî ndabathangîkîrie maita jamaingî barî iromberoone biaao na ndîrageria gûtûma baruma Mûrungu. Ndî na mûthûûro jûmwîngî, nî ndaabanthangîkîrie mono kinya barî ntûûreene ngeni.

¹²“Tontû bûû, nî ndeetîre Damaski mpeei waatho na ntûmi nî athînjîri-Mûrungu barîa anene.

¹³Mûkaathe, ndî njîreene kûrî thaa thita cia mûthenya, nî ndoonere weerû bûkwenia nkûrûki ya riûa bwathaara kuuma îgûrû na bûranthiûrûkîra ni amwe na antû barîa ndeetanîtie nabo.

¹⁴Tuî twinthe tûragwa nthî na ndîraigua kajû gakîmbûûria na Kîhibirania, ‘Saûlû, Saûlû! Nîkî ûnthangîkagia? Nîka ûkwithîînia ûtheri ta ntigiri îkîringa rûturo rwa mwene rwatî.’

¹⁵Naani ndîrooria, ‘Nîgwe ûu Mwathani?’ Mwathani aracokia, ‘Nî ni Jesû ûrîa ûthangîkagia.

¹⁶Îndî ûkîîra na ûrûngame. Nîkwîthîrwa ndacionania kîrî gwe nîkenda ûntumîkagîra na waa mûkûûjî wa mantû jarîa woona naarua na jarîa ngakwonia nyumeene.

¹⁷Ngakwonokia kuuma kîrî antû ba Israeli na kîrî antû barîa batî Ayahudi, barîa ngagûtûma kîrî bo.

¹⁸Ûkabamincûria meetho nîkenda bauma muunduune na batonya weerûûne; baume waathaniine bwa Nkoma, bacoke kîrî Mûrungu; nîkenda baagea na wîtîkio kîrî ni, barekerwa meeyia jaao na baa bamwe ba barîa ntheretie.’

¹⁹“Tontû bûû, gwe mûnene Agripa, gûtî u ndîngîûmba kûrega kwathîkîra kîoneki kîu kîaumîte îgûrû.

²⁰ Mbere buru nî ndaambîrîîrie gûtûmîîria kîrî antû ba Damaski, rîu ndîratûmîîria kîrî antû ba Jerusalemu na ba nthîgûrû yonthe ya Judea na kinya kîrî antû barîa batî Ayahudi nkîbeeraga bairire meeyia jaao na bacokeere Mûrungu na bathithie mantû ja kwonania atî nî bairirîte.

²¹Kîu nîkîo gîtûmi Ayahudi baangwatîre ndî kîûrûûne na barageria kûmbûraga.

²²Îndî Mûrungu nî aanteetherie îgiita rîu na mwanka naarua Mûrungu nî aanteethagia. Tontû bûû, ndûngami aja nkîritaga ûkûûjî kîrî antû bonthe, barîa barî îgweta na kinya barîa batî îgweta. Mantû jaja nkwaria nîjo jongwa jarîa iroria na Musa baaugîre atî jagakarîka;

²³ atî no mwanka Kristû athangîkue na eethîrwe arî wa mbere kûriûka kuuma kîrî akuû, nîkenda atûmîîria weerû bwa wonokio kîrî antû bonthe, Ayahudi na kinya barîa batî Ayahudi.”

²⁴Rîrîa Paûlû akinyîrie au agiitetagîîra, Festasi aramûgondokera aramwîra, “Paûlû, ûrî na nthû! Kîthomo gîaaku gîkiingî nîkîo gîgûkûrita nthû.”

²⁵Îndî Paûlû arauga, “Itû mûkaathe Festasi, ni ntî na nthû. Mantû jarîa nkwaria nî ja mma buru.

²⁶Gwe mûnene Agripa nî ûkûmenya bwega mantû jaja, nîkîo nkwaria ntîgûkîra mbere yaaku. Ntî na nkaanja atî gûtî ûntû noo bûmwe bwa jaja jaathithîkîre ûtîkûmenya nîûntû jataathithîkîre withoone.

²⁷Mûnene Agripa, nî wîtîkîtie iroria? Nî mbijî bwega atî nî wîtîkîtie.”

²⁸Rîu Agripa arooria Paûlû, “Ka ûkûthûgaania nyuma ya kagiita gagakai ûu woomba gûmpethia mûkristû?”

²⁹Paûlû aramûcokeria, “Ndîromba Mûrungu atî kinya kwajûkia kagiita gagakai kana îgiita rîrîraaja, atî gwe na kinya bonthe barîa banthikîîrîte naarua, bûee akristû bûkare taani, îndî bûtîkatheekwe na nyororo ta iji.”

³⁰Rîu mûnene Agripa, na mûrûngamîîri na Baanice amwe na antû bangî bonthe barîa baakari nthî au bararûngama

³¹na bakuireba barauga, “Gûtî u muntû ûûjû athithîtie bwa gûtûma ooragwa kana atheekwa.”

³²Rîu Agripa areera Festasi, “Muntû ûûjû arîngîthaûrwa tiga ûrîa aaugîre îgamba rîaawe riikue kîrî Kaisarî.”