Read KIMERU BIBLE PROTESTANT EDITION Maj 27 Bible Online

Maj 27 - KIMERU BIBLE PROTESTANT EDITION bible

Maj 27

¹Rîrîa baatuîre atî no mwanka twîte Italia na meri, nî baanenkanîre Paûlû amwe na abuungwa bangî kîrî muntû ûmwe weetagwa Juliasi nîkenda abakaria. Juliasi aarî mûtongeeria wa gîkundi kîa asikarî, gîeetagwa Agastani.

²Tûraitia meri kuuma Adiramito îrîa yaarî îkûrûkîîre kûrîa meri ciarûngamaga mpwîroone cia Asia na tûraambîrîria rûgeendo rweetû. Aristakasi, ûrîa waatûûraga Makedonia, na waaciarîri Thesalonike, nî aarî amwe naatuî.

³Rûûneene tûrakinya Sidoni na tûrarûngama ku. Juliasi araigîîrua Paûlû kîaao na aramwîtîkîîria eeta kîrî acoore baawe nîkenda aingîrua moobatu jaawe.

⁴Rîu tûrambîrîria gwîta kaîrî, îndî ruuo rûratûringa na rûratûrigîîria gwîtîîra arîa tweetîrîte na tûreetîra rûteere rwa Saiprasi, nthîgûrû îrîa yaacîgîîrîîtue nî îria.

⁵Nyuma tûrauna îria akuî na Cilicia na Pamfîlia, na tûrakinya Mîra, ntûûra îrîa yaarî Lîcia.

⁶Tûgûkinya kûu, mûtongeeria ûu wa asikarî aroona meri yuumîte Alexandria îîtîte Italia, na aratuitithia ku.

⁷Tûreeta mpaara mono ntukû inyingî tûkîrîjaga thîîna înyingî mwanka tûrakinya Nidasi. Nîkwîthîrwa ruuo nî rwatûrigaîria, nî twetîrîre rûteere rwa Krete akuî na Salimone kûrîa ruuo rûtaurutanaga mono.

⁸Tûrakûrûkîîra au tûkîrîjaga thîîna mwanka tûrakinya antû eetagwa Arîa itaru biarungamaga, gûtîna ûgwati akuî na ntûûra ya Lasea.

⁹Nî twaarî tûgûta îgiita mono, na kinya rûgendo rwa gwîta na meri nî rwaarî na ûgwati nîûntû îgiita rîa gûciata biakûrîa nî rîaarî rîgûkûrûka. Rîu Paûlû arabataara

¹⁰akiugaga, “Îbuî akûrû, nî nkwona atî rûgendo rûrû rûkeethîrwa rûrî na ûgwati mono, na rûtûme antû beekîrwe ngûma na into birîa bikamati biûre.”

¹¹Îndî mûtongeeria ûu wa asikarî arathikîîra ûrîa mwîtithia wa meri na mwene meri baugaga antû a kûthikîîra ûrîa Paûlû augaga.

¹²Tontû antû au baarî gûtaarî gûntû gûkwega gwa kûrûngîka meri îgiita rîa mpio, antû babaingî nî baugîre twîte na mbere na rûgendo, nîkenda këethîra kwombîka bakinya Foenici. Foenici nîo meri ciarûngamaga kûu Krete. Nî twerîgîrîte kûrûngîka meri au Foenici îgiiteene rîu rîa mpio nîûntû Foenici yuumîte bwa ûmotho-gaiti yaamunta bwa ûrîo-gaiti.

¹³Rîu ruuo rûtaurutanaga mono, rûrambîrîria kuurutana kuuma bwa ûmotho na barathûgaania atî bakathithia ûrîa beendaga kûthithia. Tontû bûû, barathaûra meri na barambîrîria gwîta barî akuî na mpwîro ya Krete.

¹⁴Îndî nyuma ya kagiita gagakai, kîbubani gîkînene mono kîa ruuo rûrîa rweetagwa Ruuo rwa kuuma bwa ûrîo-gaiti, kîraurûtana kiumîte nthî înjûmo.

¹⁵Kîbubani kîu kîraringa meri, na meri îraremwa gwîta na mbere kûrîa yeetîte, tûraremwa kûmîîtithia, na tûratindîkwa nî ruuo.

¹⁶Rîrîa twetîrîre rûteere rûrîa ruuo rûtaurutanaga mono rwa Kauda, kathîgûrû karîa gaacîgîîrîîtue nî îria, nî twombîre kwogora gîtarû kuuma meri îîu na thîîna înene.

¹⁷Bakûrita gîtarû kîu, baroga meri îîu na mîkanda bwega nîûntû nî baakîraga kûremera kîthangeene kîa rûteere rwa îrîa rwa nthî ya Lîbia. Nî beenamîrie itambaa birîa biatûmaga meri îîtithua nî ruuo, nîkenda meri îîtithua nîru o kûrîa rûkeenda.

¹⁸Kîbubani kîu nî gîetîre na mbere kûringa meri mwanka gûgûkinya rûûnene barambîrîria kûgera mîrigo îrîa yaarî meeriine îrieene.

¹⁹Ntukû ya ithatû barata into bimwe birîa bikaraga meeriine.

²⁰Rîrîa ntukû inyingî ciakûrûkîre tûtîkwona riûa kana njota na kîbubani kîa ruuo gîgîtaga na mbere gûtûringa, wîrîgîîro bweetû bwa kwonokua bûrathira.

²¹Nyuma ya gûkara îgiita rîrînene batîkûrûma gantû, Paûlû nî aarûngamîre mbere yaao na arabeera, “Itû akûrû, bûrîngînthikîîra na bûkarekana na rûgendo rûrû rwa kuuma Krete tûtîngîona thîîna îîjî kana tûûrîrwa nî into bibi bionthe.

²²Îndî nandî ndabwerenca bûûmîîrie, nîûntû gûtî muntû kinya ûmwe ûgaakua tiga meri yonka îkathûkanga.

²³Nîkwîthîrwa ûtukû mûraîka wa Mûrungu, ûrîa ni ndî waawe na ûrîa ni nthaathagia nî areejîre kîrî ni na

²⁴aambîîra: ‘Paûlû, ûgákîra! No mwanka ûkinye kîrî Kaisarî. Ningî Mûrungu nî etîkîîrîtie atî antû bonthe barîa wîtanîtie nabo bateetha nîûntû bwaaku.’

²⁵Tontû bûû, akûrû! Ûmîîrieni, nîkwîthîrwa nî mbîtîkîtie Mûrungu akathithia bûrîa bungwa arambîrîre akathithia.

²⁶Îndî gûtî gîkagiria tûgerwa antû amwe acîgîîrîîtue nî rûûjî.”

²⁷Ntukû ya îkûmi na inya ûtukû, meri nî yaaringagwa nî mîgombe mono nteere cionthe îrieene rîa Mediterania. Kûrî ûtukû gatîgatî barîa beetithîtie meri nî baathûgaanîrie atî barî akuî gûkinya nthî înjûmo.

²⁸Tontû bûû, baragera kîthimi kîa kûthima ûrîa rûûjî rworokerete na baroona rworokeri ta mita mîrongo îna. Bagûkarakara aniini, baragera kîthimi kaîrî na baroona rworokeri mita mîrongo îthatû.

²⁹Tontû nî baakîraga twija kûringa maiga, nî baatheekere meri kuuma bwa nyuma na biango bina nîkenda meri îrûngama na bareeteera gûkea.

³⁰Antû bau beetithagia meri nî baacwaga ûrîa boomba kuuma meeriine na baûra. Nî baambîrîrie kûgera gîtarû îrieene, baigwetie atî nîka bakwenda kûgera kîango gîa kûrûngîka meri bwa mbere.

³¹Îndî Paûlû areera mûtongeeria ûu na asikarî baawe atîrî, “Antû baba barega gûkara meeriine, bûtîonoka.”

³²Îgiita rîu asikarî baragiita mîkanda ya gîtarû kîu na baratigana nakîo kîreetithua nî rûûjî.

³³Kûrî akuî gûkea, Paûlû areerenca antû bonthe barîe biakûrîa akiugaga, “Naarua nîyo ntukû ya îkûmi na inya bûtîkûmenya ûrîa gûgakara kana bûrûma gantû.

³⁴Tontû bûû, ndabwerenca ambîrîeni kûrîa biakûrîa nîkenda bûgwata inya nîûntû gûtî kinya rûchiûri rwa mûtwe rwa kinya ûrîkû kîrî buî rûkaûra.”

³⁵Paûlû akuuga ûu, arajûkia mûgaate na aracokeria Mûrungu nkaatho mbere ya antû bau bonthe na arajûng'enyûranga na araambîrîria kûrîa.

³⁶Rîu antû bonthe baroomîîria, na kinya bo bararîa biakûrîa.

³⁷Twinthe barîa twaarî meeriine twaarî antû magana jaîrî ja mîrongo mûgwanja na batantatû.

³⁸Rîrîa baarîre baranyira, nî baajûkîrie nkano baragera îrieene nîkenda meri yûtha.

³⁹Rûûneene gwakea, antû bau nî baaremerwe kûmenya nthîgûrû îîu nî îrîkû, îndî nî booneere antû aeega ataarî na mûthanga a gûkûrûkîîria meri na barabanga këethîra kwombîka bamiikie rûteere rwa îria.

⁴⁰Rîu baroogora biango bia kûrûngîka meri na barabitiga îrieene ndeene na baroogora mîkanda îrîa yaogete gîntû kîrîa gîatûmaga meri îîta; na baratambûrûkia gîtambaa kîrîa gîekagîrwa mbere ya meri na baragiitithia mîringotiine nîkenda kîgwatia ruuo rwa gûtindîka meri îîta rûteere rwa îria.

⁴¹Îndî nî baaringîre kîthanga na meri îraigera mwanka îraremera. Rûteere rwa mbere rûragwatwa nî mûthanga mwanka rûrarikua ûntû îtîngîûmba kuuma au na mûthia jwa nyuma jûraunangwa nî mîgombe ya îria.

⁴²Asikarî nî baabangîre kûûraga antû barîa baatheeki nîkenda batîkeeje kûthambîra baûra.

⁴³Îndî mûtongeeria waao arabagiria kûthithia ûu beendaga, nîûntû nî eendaga kwonokia Paûlû. Rîu Paûlû ararita waatho atî barîa bakoomba kûthambîra nî baigere îrieene, na bathambîre mwanka nthî înjûmo,

⁴⁴na bangî bagwate mbaaû na ichunchî bingî bia meri birîa biaunîkangi. Ûu nîu gwakarîre, na antû bau bonthe barakinya nthî înjûmo barî thîîria.