Read KIMERU BIBLE PROTESTANT EDITION Maj 28 Bible Online

Maj 28 - KIMERU BIBLE PROTESTANT EDITION bible

Maj 28

¹Tûgûkinya nthî îîu înjûmo tûrî thîîria, nîrîo twamenyere atî gîcîgîîrio kîu gîeetagwa Malita.

²Antû ba kûu nî baatwigîîrîrue kîaao mono na baratûgwata ûgeni na baratwakîria mwanki nîûntû nî kwaûraga na nî kwaarî na mpio mono.

³Rîrîa Paûlû aarî akwojania nkû na aaciîkîra riiko, kiuua nî kîaumîre nkûûne iu nîûntû bwa mûruutîra jwa mwanki, na kîrairigicîria njareene yaawe.

⁴Antû ba kûu bakwona njoka îîu îcuuracuurîte njareene yaawe, baraciîra, “Nî mma muntû ûûjû nî mûûragani. Kinya këethîra atîrakuîrîîre îrieene, îota rîtîtîkîîria atûûra mwoyo.”

⁵Îndî Paûlû arainainia njara yaawe na kiuua kîu kîragwa mwankiine, nawe gûtî u aakara.

⁶Antû bau bareteera bakîthûgaanagia atî akaimba kana agwe nthî na akue ntûti. Îndî bagûkara kagiita gakaraaja beteerete na boona gûtî u agûkara nî baagarûrîre mathûgaanio jaao na barauga atî “We nî mûrungu.”

⁷Akuî na au twaarî, nî kwaarî na kîthaka kîa muntû weetagwa Publio, ûrîa waarî mûnene wa nthîgûrû îîu yaacîgîîrîîtue nî rûûjî. Publio nî aatûgwatîre ûgeni na aratûmenyeera bwega mono ta acoore baawe ntukû ithatû.

⁸Îgiita rîu îthe wa Publio nî aamami aajîtue nî nchoma na kwarwa. Paûlû nî eetîre kûmwona, na akûthiria kûromba, aramûrikîîra njara na aramworia.

⁹Rîrîa ûntû bûu bwathithîkîre antû au, antû bangî bonthe barîa baarî na mîrimo nthîgûrûûne îîu yaacîgîîrîîtue nî îria bareeta kîrî Paûlû na baroorua.

¹⁰Antû bau nî baatweere biewa bibingî. Rîrîa twaambîrîrie gwîta nî beekîîre into bionthe birîa twaarî na ûbatu nabio meeriine.

¹¹Nyuma ya mîeri îthatû nî twaambîrîîrie rûgendo rweetû kaîrî tûrî meeriine ya Alexandria yeetagwa, Mîrungu ya Maatha. Meri îîu nî yaarî nthîgûrû îîu yaacîgîîrîîtue nî rûûjî îgiita rîu rîonthe rîa mpio.

¹²Nî twakinyîre ntûûra ya Sirakuse, na tûrakara ku ntukû ithatû.

¹³Twauma au, tûrathiûrûka tûrakinya ntûûra yeetagwa Regiamu. Nyuma ya ntukû îmwe, ruuo rwa kuuma bwa ûmotho rûratûringa na tûrakinya Puteoli ntukû ya ijîîrî.

¹⁴Kûu nîku twoonanîre na ataana na aarî ba baaba, na baratûgwata ûgeni na baratûûria tûkare nabo ntukû mûgwanja. Nyuma ya îgiita rîu, tûrakinya Roma.

¹⁵Rîrîa ataana na aarî ba baaba barîa baarî kûu, baigîrue atî tûgûkinya, nî beejîre gûtûthagaana thokoone yeetagwa Apiusi na antû arîa eetagwa Mîkawa Îthatû. Paûlû akûboona arakaatha Mûrungu na aragîa ûchamba.

¹⁶Rîrîa twakinyîre Roma, Paûlû nî eetîkîrîîrue akara arî wenka, akarîtue nî asikarî ûmwe.

¹⁷Nyuma ya ntukû ithatû, Paûlû areeta atongeeria ba Ayahudi. Rîrîa boothûranîre arabeera, “Ataana ba baaba, kinya këethîra gûtî ûntû ûûni ndaathithîtie bûbûûî kûrîa Jerusalemu bwegiî Ayahudi kana meneeria nkuagaya cia biûjûjû bieetû, nî ndaagwatîrwe ndî kûrîa Jerusalemu na ndîranenkanîrwa kîrî Aroma ndî mûbungwa.

¹⁸Rîrîa antû bau baategere mantû jaakwa bwega, nî beendaga kûnthaûra, nîûntû gûtaarî na ûntû bwa gûtûma mbûragwa.

¹⁹ Îndî rîrîa Ayahudi baaregere ûntû bûû, nîrîo ndoonere no mwanka îgamba rîîje rîgambwe nî Kaisarî, kinya këethîra ntaarî na ûntû bwa kwîja kûthitanga mûgongo jweetû.

²⁰Tontû bûû, nîkîo mbwîtîte bwîja twaranîria; nîkwîthîrwa wîrîgîîro bwa antû ba Israeli nîbu bûtûmîte ntûûra ntheeki na nyororo iji.”

²¹Nabo baramwîra, “Tuî gûtî barûga twona yuumîte Judea, kana muntû kinya ûmwe wa ataana ba baaba eeja gûtwîra ûntû bûbûthûûku kinya bûrîkû bûkwegiî.

²²Îndî nî tûkwenda gûkûthikîîra ûtwîre ûrîa ûkwona. Nîkwîthîrwa nî twijî na mma atî mantû jegiî ûritani bwa gîkundi kîû gîaaku, nî bûtengûragwa gûntû kunthe.”

²³Tontû bûû, baratua ntukû îrîa bagacemania na Paûlû. Ntukû îîu yakinya, antû babaingî bareeta kûrîa aakaraga. Nawe aratinda nabo kuuma rûkîîrî mwanka ûgoro akîboonagîîria bwega ûrîa ûritani bûu bwakari, na agîkûûjagîîra nteto ciegiî Ûnene bwa Mûrungu, na akîbakinyagîîria atî beetîkie Jesû nîûntû nîu kwaandîki Waathoone bwa Musa o na maukuune ja iroria.

²⁴Antû bamwe baabo bareetîkia, îndî bangî bararega gwîtîkia.

²⁵Nî baaregere kwiganua bongwa na bareeta, rîrîa Paûlû augîre, “Roho Ûmûtheru nî eerîre biûjûjû bieenu mantû ja mma agîtumagîra kîroria Isaya atî:

²⁶ Îta kîrî antû baba ûkabeere atîrî, kwigua bûkaigua, îndî bûtîciûra; kûraithîîria bûkaraithîria îndî bûtiona.

²⁷Nîkwîthîrwa mathûgaanio ja antû baba nî jarigicanîte, na matû jaao jatiigagua, na meetho jaao jatîonaga. Tontû, barîngîraithîîria barîngîona, na bakaigua na matû jaao, na bagaciûra na mathûgaanio jaao, na barîngîgarûka naani nkabooria.”

²⁸Rîu Paûlû arabeera ûjû, “Menyeni nandî atî wonokio bûrîa buumaga kîrî Mûrungu nî bwikîtue kîrî antû barîa batî Ayahudi, nabo bakathikîîra.” [

²⁹Rîrîa Paûlû aaugîre ûu, Ayahudi baraciîtîra bagîkararanagia bongwa.][8]

³⁰Paûlû nî aakarîre mîaka îîrî nyomba îrîa aakomborete, na akîgwataga ûgeni antû bonthe barîa beetaga kûmûkeethia.

³¹Nî aatûmîîrîrie Ûnene bwa Mûrungu na araritana mantû jegiî Mwathani weetû Jesû Kristû atîguiciitha kana arigîrua nî muntû kinya ûrîkû.