Read KIMERU BIBLE PROTESTANT EDITION Maj 3 Bible Online

Maj 3 - KIMERU BIBLE PROTESTANT EDITION bible

Maj 3

¹Ntukû îmwe, thaa kenda cia mûthenya, Peterû na Johana nî beetîte kîûrûûne kûromba.

²Akuî na mûrango jwa kîûrû jûrîa jweetagwa “Mwari jûmûthongi,” nî kwaarî na muntû ûmwe, waarî kîonje kuuma agûciarwa. Nî aakamatagwa nî antû ntukû cionthe na bakamwîka au, nîkenda aroomba gîntû kuuma kîrî antû barîa baakûrûkaga kîûrûûne.

³Rîrîa oonere Peterû na Johana bakûrûkîte kîûrûûne, arabaroomba gîntû.

⁴Peterû na Johana baramûraithîria kûnûû na Peterû aramwîra, “Tûtege!”

⁵Nawe arabatega erîgîrîte gîntû kuuma kîrî bo.

⁶Rîu Peterû aramwîra, “Ntî na fetha kana thaabu, îndî kîrîa ndî nakîo ngakûa. Riîtweene rîa Jesû Kristû wa Nazarethi, ûkîîra ûciîtîre!”

⁷Rîu aramûgwata njara ya ûrîo na aramûûkîîria. O rîmwe magûrû na maru jaragwata inya;

⁸ararûngama o rîo na araambîrîria gwîta. Rîu arakûrûkania nabo kîûrûûne eetîte na magûrû jaawe na akîthûngathûngûthaga na agîkumagia Mûrungu.

⁹Antû bonthe barîa baarî o, baramwona eetîte wengwa na agîkumagia Mûrungu,

¹⁰na bakûmenya atî nîwe ûrîa warombaga ûteethio akuî na mûrango jûrîa jweetagwa Mwari jûmûthongi jwa kîûrû, bararigara mono na bararemwa kûmenya ûrîa aarî akûthithîrua.

¹¹Rîrîa muntû ûu waarî akwoorua aagwete Peterû na Johana, barî rwembeene rûrîa rweetagwa rwa Solomoni, antû bonthe nî boogîîre kîrî bo barigari mono.

¹²Rîrîa Peterû oonere antû bakinya arabeera, “Antû ba Israeli, nîkî bûkûrigarua nî ûntû bûbû? Nîkî bûtûkûrîrîte meetho teeka twatumîra inya yeetû kana waagîru bweetû gûtûma muntû ûûjû eeta?

¹³ Mûrungu wa Abrahamu na Isaaka na Jakubu, Mûrungu wa biûjûjû bieetû, nîwe wakumithia nthûûmba yaawe, Jesû. Nîwe wengwa ûrîa bwanenkanîre kîrî anene na bûramûkaana mbere ya Pilatû, kinya këethîra Pilatû nî aarî akuuga arekeerue.

¹⁴ Îndî nî bwamûregere kinya këethîra nî aarî Ûmûtheru na Ûmwagîru na bûrauga bûthaûrîrwe mûûragani.

¹⁵Rîu bûrooraga Ûrîa waarî kaumo ka ûtûûro. Îndî Mûrungu aramûriûkia kuuma kîrî akuû, na tûrî akûûjî ba ûntû bûu.

¹⁶Nî riîtwa rîa Jesû, na gwîtîkia riîtwa rîu, gwatûma muntû ûûjû bûkwona aja agîa inya ya gwîta. Nî gwîtîkia Jesû gwatûma muntû ûûjû abua buru bwinthe bûkîonaga.

¹⁷“Nandî antû beetû, nî nkûmenya atî baabuî na atongeeria beenu bwathithîrie mantû jau nîûntû bwa kwaaga ûmenyo.

¹⁸Îndî ûu nîu Mûrungu oojûrîrie mantû jarîa jaaroretue karaaja nî iroria bionthe, atî no mwanka Kristû acamaarue.

¹⁹Tontû bûû, irireeni na bûcokere Mûrungu, nîkenda abûrekera meeyia jeenu, rîu Mwathani abûreetîra îgiita rîa gwîkîrwa inya ya kîroho,

²⁰nîkenda abûtûmîra Krîstû ûrîa aabûthuurîre, na nîwe Jesû.

²¹No mwanka Jesû akare kûu îgûrû mwanka rîrîa îgiita rîa kûrikithia mantû jonthe jarîa Mûrungu aarîrie agîtumagîra iroria biaawe bibitheru kuuma tene rîgaakinya.

²² Musa nî aaugîre, ‘Mwathani Mûrungu weenu akarita kîroria kuuma kîrî ûmwe weenu. No mwanka bûthithie mantû jonthe jarîa akabwîra bûthithie.

²³ O muntû ûrîa ûtîathîkîîra kîroria kîu, ageekwa kûraaja na antû bangî ba Mûrungu na athirue.’

²⁴Iroria bionthe birîa biarîrie, kwambîrîria na Samueli na bonthe barîa baamûthingatîre, nî baatûmîîrîrie mantû jarîa jagûkarîka îgiita rîrî.

²⁵ Bûi bûrî nchiarwa cia iroria na cia kîrîkanîro kîrîa Mûrungu eekîre na biûjûjû bieenu, rîrîa eerîre Abrahamu atîrî, ‘Gûkûrûkîra nchiarwa ciaaku, nkatharima antû bonthe ba nthîgûrû.’

²⁶Tontû bûû, Mûrungu nî aariûkîrie nthûûmba yaawe, na aramîtûma kîrî buî bûrî mbere, nîkenda atûma o muntû o muntû atigana na mîîtîre yaawe îmîthûûku na abûtharima.”