Read KIMERU BIBLE PROTESTANT EDITION Maj 4 Bible Online

Maj 4 - KIMERU BIBLE PROTESTANT EDITION bible

Maj 4

¹Peterû na Johana bakîaragîria antû o ûu, athînjîri-Mûrungu na mûrûngamîîri wa kîûrû amwe na Asadûkayo barakinya.

²Nî baathûûrîre bakwîgua atûmwa bau bakîritana antû na gûtûmîîria atî Jesû nî aarî akûriûka nîûntû ûritani bûû nîka bwarikithagia atî akuû bakariûka.

³Rîu baragwata Peterû na Johana, na nîûntû nî kwaarî gûgûtuka barabaingîra ncheera mwanka rûûneene.

⁴Îndî babaingî ba barîa baigîrue ntûmîîri yaao nî beetîkîrie. Bau beetîkîrie baarî akuî arûme ngiri ithaano.

⁵Rûûneene, athani ba Ayahudi na akûrû atongeeria na aritani ba Waatho baracemania Jerusalemu.

⁶Baacemanîrie na Anasi, mûthînjîri-Mûrungu ûrîa mûnene, na Kaifa na Johana na Alexanda na bangî bonthe ba kuuma nja ya mûthînjîri-Mûrungu ûrîa mûnene.

⁷Rîrîa baareeterwe kîrî bo, barooria atûmwa bau atîrî, “Bûthithîtie ûntû bûbû bûgîtumagîra inya yaaû? Kana nî riîtwa rîaaû bûtumîrîte?”

⁸Rîu Peterû oojûri nî Roho Ûmûtheru arabeera, “Aathani ba antû na akûrû atongeeria:

⁹Nîkwîthîrwa bûtîgûtûûria naarua mantû jegiî îthithio rîrîega, rîrîa muntû ûûjû kîonje athithîrîtue kana ûrîa muntû ûûjû oorua,

¹⁰rîu ka tûbwîre na twîre antû bonthe ba Israeli atî tûtumîîre riîtwa rîa Jesû Krîstû wa Nazarethi, ûrîa buî bwaambîîre, îndî Mûrungu aramûriûkia kuuma kîrî akuû, kwooria muntû ûûjû ûrûngami mbere yeenu.

¹¹ Jesû ûûjû nîwe ûrîa Maandîko jakuuga: ‘Iiga rîrîa buî aaki bwaregere, nîrîo nandî rîethetue iiga rîa koona.’

¹²“Wonokio bûtiuma kîrî muntû ûngî kinya ûrîkû, nîkwîthîrwa gûtî riîtwa rîngî rîaejanîrwe nthîgûrûûne yonthe, rîûûmba gûtwonokia.”

¹³Rîrîa akûrû ba kîama boonere ûrîa Peterû na Johana baaragia na ûchamba na baramenyithua atî bataathomi na bataarî na îgweta, bararigara mono. Nîrîo baamenyere atî bo baarî antû barîa beethagîrwa barî na Jesû.

¹⁴Îndî rîrîa boonere muntû ûrîa waarî akûoorua arûngi amwe nabo, batoombîre kuuga no atîa.

¹⁵Rîu barabeera baume Kîameene, nabo baratigwa ndeene bakîaranagîria.

¹⁶Baroorania, “Nîatîa tûûmba kûthithîria antû baba nîkwîthîrwa antû bonthe ba Jerusalemu nî bakûmenya kîama kîu kîraringîrwe na tûtîûmba gûkaana ûntû bûu?

¹⁷Îndî nîkenda tûûmba kûrigîîria ûntû bûbû bûtîgataambe kîrî antû, tûbakaanieni tûbeere bakaarîria muntû kinya ûrîkû kuuma nandî ndeene ya riîtwa rîa Jesû.”

¹⁸Tontû bûû, barabeeta ndeene kaîrî na barabakaania bakaaria kana baritana kaîrî ndeene ya riîtwa rîa Jesû.

¹⁹Îndî Peterû na Johana barabacokeria, “Îthuurîreeni bwingwa ûntû bûrîa bwagîrîte mbere ya Mûrungu, këethîra nî kûbwathîkîra kana nî kwathîkîra Mûrungu.

²⁰Nîkwîthîrwa tuî tûtîûmba gûtiga kwaria mantû jarîa twonete na twigîîtue.”

²¹Tontû bûû, akûrû bau barabamakia na baracoka barabarekeeria bareeta. Baraaga ûrîa boomba kûbakanûkia nîkwîthîrwa antû bonthe nî baakumagia Mûrungu nîûntû bwa ûntû bûu bwathithîkîte.

²²Muntû ûu woorerue aarî na ûkûrû bwa mîaka nkûrûki ya mîrongo îna.

²³Peterû na Johana bakûrekeerua nî baacokere kîrî acoore baao na barabeera ûrîa baarî bakwîrwa nî athînjîri-Mûrungu barîa anene na akûrû.

²⁴ Rîrîa baigîrue nteto iu, bonthe bararomba Mûrungu bakiugaga, “Mwathani ûrîa waathaga, gwe woombîre îgûrû na nthî, na îria na into bionthe birîa birîku,

²⁵ gwe waatûmîre nthûûmba yaaku, baaba weetû Daudi, auga arî na inya ya Roho Ûmûtheru: ‘Nîmbi îtûmîte antû barîa batî Ayahudi bateeta, na beeka nkireba cia ûtheri?

²⁶Anene ba nthîgûrû baumagara na mathaga ja ndwaa na athani boothûrana amwe, nîkenda barwaa na Mwathani na Krîstû waawe.’

²⁷ “Nîkwîthîrwa ga nkûbwîra na mma Herode na Pontio Pilatû, amwe na antû ba Israeli na antû barîa batî Ayahudi nî boothûranîre ntûûreene îîjî nîkenda baregana na Jesû, nthûûmba yaaku întheru, îrîa waeetherie Kristû.

²⁸Boothûranîre nîkenda bathithia mantû jarîa gwe waabangîte na weendeete jathithîka.

²⁹Îndî nandî, itû Mwathani raithîîria ûrîa bagûtûciîtîria. Tûee tuî nthûûmba ciaaku ûchamba bwa gûtûmîîria rûteto rwaaku.

³⁰Tambûrûkia njara yaaku woorie antû. Îtîkîîria biama na mantû ja kûrigaria jathithîke riîtweene rîa Jesû, Nthûûmba yaaku Întheru.”

³¹Rîrîa baathirîrie kûromba, antû au baatîrimanîte kûrainainua, na bonthe baroojûrwa nî Roho Ûmûtheru. Antû bonthe baraambîrîria gûtûmîîria rûteto rwa Mûrungu barî na ûchamba.

³² Antû barîa beetîkîtie bonthe baarî na nkoro îmwe na mworoto jûmwe. Gûtî we waugaga gîntû kîrîa aarî nakîo nî kîaawe wenka akî, îndî nîka baagaanaga bionthe birîa baarî nabio.

³³Atûmwa nî baakûûjagîîra barî na inya înene mono mantû jegiî kûriûka kwa Mwathani Jesû, na Mûrungu arabatharima bonthe na njîra inyingî.

³⁴Gûtî muntû waagaga gantû, nîûntû barîa baarî na ithaka kana nyomba nîka baabiendagia,

³⁵na bakanenkera atûmwa mbeecha iu, nabo bakagaîra o muntû o muntû kûringana na ûbatu bwaawe.

³⁶Nî kwaarî na Mûlawi ûmwe wa kuuma Saiprasi, weetagwa Josefu, ûrîa atûmwa baeere riîtwa Baranaba (nî kuuga Muntû ûrîa wîîkagîra bangî inya ).

³⁷Muntû ûu kinya we nî aarî na muunda jwaawe. Nî aajwenderie na araikia mbeecha kîrî atûmwa.