Read KIMERU BIBLE PROTESTANT EDITION Maj 5 Bible Online

Maj 5 - KIMERU BIBLE PROTESTANT EDITION bible

Maj 5

¹Îndî muntû ûmwe weetagwa Anania na mwekûrû waawe Safira, kinya bo nî beenderie muunda jwaao.

²Anania na mwekûrû waawe bararîkania baithe mbeecha imwe cia irîa boonete na baraikia mbeecha ingî kîrî atûmwa.

³Peterû aramûria, “Anania, nîkî ûrekeeretie Nkoma atonya ndeene yaaku na waaîria Roho Ûmûtheru. Nîkî weekîre mbeecha imwe cia iria weenderie muunda?

⁴Munda jûrarî jwaaku mbere ya ûjweendia na kinya nyuma ya kûjweendia, mbeecha irîa jûraumîre, iraarî ciaaku ûtumîra ûrîa ûkwenda. Nîkî ûrabangîre kûthithia ûntû ta bûbû? Tî muntû waîîrîtie îndî nî Mûrungu.”

⁵Rîrîa Anania aaigîrue ûu, aragwa nthî, na arakua. Antû bonthe barîa baigîrue mantû jau baraigua ûguaa mono.

⁶Antû babeethî bareeta baramûkunîkîra na chuka na baramûkamata bareeta kûmûthika.

⁷Nyuma ya mathaa akuî jathatû, mwekûrû waawe arakûrûka ndeene, atîkûmenya ûrîa kwaarî gûgûkarîka.

⁸Peterû aramûûria, “Mbîîra! Mbeecha iji nîcio bûroonere bûkwendia muunda?” Nawe aramûcokeria, “Îî, nîcio iu.”

⁹Rîu Peterû aramwîra, “Nîkî gîtûmîte bwîtîkanîîria bu-baîrî kûgeria Roho wa Mwathani? Thikîîra! Antû barîa beetîre kûthika mûkûrû waaku, nandî barî mwariine, na kinya gwe bagakûjûkia.”

¹⁰O rîo Safira aragwa nthî magûrûûne ja Peterû, na arakua. Antû bau beethî bagûkûrûka bareethîra agûkua. Baramûkamata na bareeta kûmûthika akuî na mûkûrû waawe.

¹¹Kanisa yonthe amwe na antû barîa baigîrue mantû jau, baraigua ûguaa bûbûnene mono.

¹²Atûmwa nî baaringîre biama na mantû jamaingî ja kûrigaria jarathithîka kîrî antû. Antû barîa beetîkîtie bonthe nî baacemanagia arîa gweetagwa Rwembea rwa Solomoni.

¹³Gûtî muntû ûteetîkîtie womagîîria kwiringanîra nabo. Îndî amwe na jau antû bonthe nî babakaathaga mono.

¹⁴Aka na arûme babaingî mono barîa beetîkagia baroongereka kîrî barîa beetîkîtie Mwathani.

¹⁵Tontû bûû, antû baratua gwikagia aajie njîreene na bakabamamia itandeene na mîgekeene nîkenda baringithua nî kîrundu gîa Peterû akûrûkîte.

¹⁶Antû babaingî nî baaumîre ntûûreene irîa ciaarî akuî na Jerusalemu na baraikia aajie baao na barîa baarî na roho inthûûku, na bonthe baroorua.

¹⁷Rîu mûthînjîri-Mûrungu ûrîa mûnene na Asadûkayo barîa aakaranagia nabo baraigîîrua atûmwa rûriitho.

¹⁸Tontû bûû, barabagwata na barabaingîra ncheera îrîa antû bangî baaingagîrwa.

¹⁹Îndî ûtukû bûû, mûraîka wa Mwathani ararugûra mîrango ya ncheera arabaumagaria oome arabeera,

²⁰“Îteeni bûrûngame kîûrûûne na bwîre antû mantû jegiî ûtûûro bûbû bûbwerû.”

²¹Atûmwa baraathîkîra, na barakûrûka kîûrûûne rûkîîrî kainda baraambîrîria kûritana. Rîu mûthînjîri-Mûrungu ûrîa mûnene na barîa beejanîrie nawe, nî beetîre mûcemanio jwa Kîama kîrîa kînene, takîo kîûthûrano kîa akûrû ba Ayahudi bonthe. Rîu baratûma antû ncheera beeta kûgîîra atûmwa.

²²Îndî nthûûmba iu îgûkinya ncheera, ireethîra batî ku na iraacoka irabeera,

²³“Nî twîthîre mîrango ya ncheera yonthe îingi na akaria bakarîtie bwega. Îndî tûkûrugûra, twethîra gûtî muntû kinya ûmwe ndeene.”

²⁴Mûrûngamîîri wa kîûrû na athînjîri-Mûrungu barîa anene bakwigua ûu, bararigara mono bagîciûragia kûrîa atûmwa baarî bagwîta.

²⁵Rîu muntû ûmwe areeta arabeera, “Antû barîa bûraingîrîte ncheera barî kîûrûûne bakîritanaga antû.”

²⁶Rîu mûrûngamîîri wa kîûrû amwe na nthûûmba ciaawe bareeta kîûrûûne na baragwata atûmwa. Îndî bataatumîîre inya kûbagwata nîûntû nî baakîraga antû babaringa na maiga.

²⁷Barabaikia Kîameene na mûthînjîri-Mûrungu ûrîa mûnene arabeera,

²⁸ “Nî tûrabûkanîrie na inya bûkáritana bûgîtumagîra riîtwa rîa muntû ûûjû, îndî nandî bûkûûjûria ûritani bweenu Jerusalemu yonthe, na nîka bûkwenda tuîrwa nî tuî tworagîre muntû ûûjû.”

²⁹Rîu Peterû arî amwe na atûmwa barîa bangî aracokia, “No mwanka twathîkîre Mûrungu, antû a kwathîkîra antû.

³⁰Mûrungu wa biûjûjû bieetû nî aariûkîrie Jesû, ûrîa bworagîre, bûkûmwamba mûtharabeene.

³¹We nîwe Mûrungu aneneetie na amweethia Mûnene na Mwonokia, nîkenda atûma Aisraeli bairira, na barekerwa meeyia jaao.

³²Tuî tûrî akûûjî ba mantû jau, na kinya Roho Ûmûtheru ûrîa Mûrungu anenkerete barîa bamwathîkagîra, nî mûkûûjî wa mantû jau.”

³³Rîrîa akûrû bau baigîrue nteto iu, baraakana nî mûthûûro, bareenda kûbooraga.

³⁴Îndî Mûfarisayo ûmwe weetagwa Gamalieli, ûrîa waarî Mûritani wa Waatho na waatîîtwe nî antû bonthe, ararûngama na arauga atûmwa nî baumagarue oome kagiita gagakai.

³⁵Rîu areera akûrû bau ûjû, “Îbuî Aisraeli, imenyereeni mono mbere ya kûthithia ûntû bûrîa bûkwenda kûthithîria antû baba!

³⁶Nî bûkûririkana nî kwaarî na muntû weetagwa Theuda, ûrîa waacieethagia muntû wa gîtûmi waarî na athingati akuî magana jana. Îndî akûûragwa, athingati baawe nî baaraganîre na gîkundi kîaawe kîraaragana na kîrathira.

³⁷Kaîrî, rîrîa antû baataragwa, Judasi wa kuuma Galili, nî aakuucîrie antû kîrî we na baramûthingata. Îndî kinya we akûûragwa, aritwa baawe nî baaraganîre.

³⁸Kinya nandî, ka mbwîre, tiganeni na antû baba. Barekeerieni! Këethîra mûbango jûjû kana mantû jaja jaambîrîtue nî muntû, jakathira buru jongwa.

³⁹Îndî këethîra nî Mûrungu ûjabangîte, bûtîboomba. Bwomba kwîthîrwa nî Mûrungu bûkûrwaa nawe.”

⁴⁰Tontû bûû, bareetîkanîîria nawe na bareeta atûmwa bau. Baraathana baûrwe ibooko na barabakaania na inya atî bakaritana kaîrî riîtweene rîa Jesû, rîu barabarekeeria bareeta.

⁴¹Atûmwa barauma kîameene kîu bagwîrîtue mono nîûntû nî boneerwe baagîrîte kûnyamarua nîûntû bwa riîtwa rîa Jesû.

⁴²Nî beetîre na mbere kûritana na gûtûmîîria Nteto Injega kîûrûûne na mîciî o ntukû o ntukû bakiugaga Jesû nîwe Kristû.