Read KIMERU BIBLE PROTESTANT EDITION Maj 6 Bible Online

Maj 6 - KIMERU BIBLE PROTESTANT EDITION bible

Maj 6

¹Nyumeene, antû barîa beetîkagia nî beetîre na mbere kwongereka. Ayahudi barîa baaragia Kîgriiki nî baambîrîrie gûtetia Ayahudi barîa baaragia Kiiberania bakîbeeraga atî nî baatiganagîria ntigwa ciaao bakîgaa into birîa baeejagwa o mûthenya o mûthenya.

²Tontû bûû, atûmwa barîa îkûmi na baîrî bareeta antû barîa beetîkîtie bonthe na barabeera, “Tî bwega tûtiga gûtûmîîria rûteto rwa Mûrungu nîkenda tûbûgaîra birîa bûkwenda.

³Tontû bûû, ataana na aarî ba baaba, thuureni antû mûgwanja, kuuma kîrî buî. Antû bau no mwanka beethîrwe barî eetîkua, na boojûri Roho Ûmûtheru na barî na ûûme nîkenda tûkabanenkera ngûgî îîu.

⁴Îndî tuî tûgacieejana kûromba na gûtûmîîria rûteto rwa Mûrungu.”

⁵Rwaria rûu rûragwîria antû barîa beetîkîtie bonthe. Barataara Stefano, muntû waarî na wîtîkio bûbûnene na woojûri Roho Ûmûtheru, na Filipû, na Prokora, na Nikano, na Timoni, na Pamena, na Nikola wa kuuma Antioki ûrîa waarî akûgarûka aa wa ndini ya Kîyahudi.

⁶Baraikia antû bau kîrî atûmwa, na atûmwa barabarombera na barabarîkîîra njara.

⁷Rûteto rwa Mûrungu rûrataamba nkûrûki, na antû barîa beetîkîtie baroongereka mono kûu Jerusalemu na athînjîri-Mûrungu babaingî mono nî beetîkîrie.

⁸Mûrungu nî aeere Stefano inya înyingî mwanka aratua kûringaga biama na kûthithagia mantû ja kûrigaria kîrî antû.

⁹Îndî antû bamwe barambîrîria gûkararania na Stefano. Antû bau baarî ba kuuma kîromberoone kîmwe gîeetagwa kîrombero kîa antû barî na ûciathi. Bangî baarî ba kuuma Kurene na Alexandria na Cilicia na Asia.

¹⁰Îndî batamûmbîre nîûntû Roho Ûmûtheru nî aamweere ûûme rîrîa aaragia.

¹¹Tontû bûû, barakukuma antû bamwe nîkenda bauga, “Nî twigîtue Stefano akîruma Musa na Mûrungu.”

¹²Nabo baraujîîra antû, na akûrû na aritani ba Waatho, rîu baragwata Stefano na baramwikia kîrî Kîama kîrîa kînene.

¹³Nî baaretere akûûjî ba ûrongo Kîameene na barauga ûjû, “Muntû ûûjû atîtigaga kûmeneeria kîûrû na Waatho bwa Musa.

¹⁴Nîkwîthîrwa nî twaigîrue akiuga atî Jesû ûrîa wa Nazarethi akamomora kîûrû na agarûre nkuagaya irîa Musa aatûtigîîre.”

¹⁵Antû bonthe barîa baarî Kîameene baratega Stefano kûnûû, baroona ûthiû bwaawe bûkari ta ûthiû bwa mûraîka.