Read KIMERU BIBLE PROTESTANT EDITION Maj 8 Bible Online

Maj 8 - KIMERU BIBLE PROTESTANT EDITION bible

Maj 8

¹Saûlû aarî ûmwe wa barîa beetîkîrîrie Stefano ooragwa. Ningî ntukû o îu yongwa Kanisa ya Jerusalemu îraambîrîria kûthangîkua mono. Barîa beetîkîtie bonthe, tiga atûmwa bonka, baranyaganua nteere cionthe cia Judea na Samaria.

²Antû barîa baakîraga Mûrungu barathika Stefano na baraithikîîra mono nîûntû bwa gûkua kwaawe.

³ Îndî Saûlû nî eetanîrie na kanisa na areetania na nyomba cia antû akîgwataga arûme na aka barîa beetîkîtie na akabakururia akabagera ncheera.

⁴Bau beetîkîtie nî beetîre bagîtûmîîragia rûteto gûntû kunthe kûrîa baanyaganîtue.

⁵Filipû nî eetîre ntûûreene ya Samaria na aratûmîîria nteto cia Kristû kîrî antû ba kûu.

⁶Antû babaingî barîa baathikîrîre ntûmîîri ya Filipû nî beetîkîrie bakwona biama birîa aaringîre.

⁷Nî aagondokeere roho inthûûku na irauma kîrî antû babaingî igîkayaga na kajû gakanene. Antû babaingî barîa baarî bionje, na barîa baarî ithuaa baroorua.

⁸Tontû bûû, antû bonthe baragwîrua mono ntûûreene îîu.

⁹Îndî ntûûreene îîu nî kwaarî na muntû ûmwe waaringagia, weetagwa Simioni. Mantû jarîa aaringagia nî jaarigaragia antû ba Samaria mono na agaciona arî muntû ûmûnene.

¹⁰Antû bonthe, kuuma ûrîa mûnini mwanka ûrîa mûnene nî baamûthikagîîra na wîru mono bakiugaga, “Simioni nîwe inya ya Mûrungu îrîa îtagwa ‘Inya Inene.’”

¹¹Nî baakuucagua mono nî mantû jaawe nîûntû bwa mantû jarîa aaringîtie îgiita rîrîraaja.

¹²Îndî rîrîa Filipû aatûmagîîria Nteto Injega ciegiî Ûnene bwa Mûrungu na ciegiî Jesû Kristû antû bau nî beetîkîrie na barabatithua bonthe, arûme na aka.

¹³Kinya Simioni nî eetîkîrie na arabatithua. Kuuma rîu araambîrîria gwîtanagia na Filipû akîrigaragua nî biama na mantû ja kûrigaria jarîa Filipû aathithagia.

¹⁴Rîrîa atûmwa barîa baarî Jerusalemu baigîrue atî antû ba Samaria baagwîtîkia rûteto rwa Mûrungu, barabatûmîra Peterû na Johana.

¹⁵Bagûkinya nî baarombeere barîa beetîkîtie nîkenda bajûkia Roho Ûmûtheru,

¹⁶nîkwîthîrwa îgiita rîu bataarî bakûûjûrwa nî Roho Ûmûtheru, nîka baabatithîtue akî ndeene ya riîtwa rîa Mwathani Jesû.

¹⁷Rîu Peterû na Johana bararîkîîra barîa beetîkîtie njara, na baroojûrwa nî Roho Ûmûtheru.

¹⁸Simioni akwona bau beetîkîtie boojûrwa nî Roho Ûmûtheru rîrîa atûmwa baabarîîkîrîre njara, arageria kûnenkera Peterû na Johana mbeecha akîbeeraga,

¹⁹“Kinya nî mpeeni inya îîu nîkenda muntû o wonthe ûrîa nkarîkîîra njara, ajûkia Roho Ûmûtheru.”

²⁰Îndî Peterû aramûcokeria, “Ûroûra na mbeecha ciaaku! Ka ûkûthûgaania woomba kûgûra kîewa kîa Mûrungu na mbeecha?

²¹Nî mma îîjî tî ngûgî yaaku, nîûntû nkoro yaaku îtî na ûûma mbere ya Mûrungu.

²²Tontû bûû, irire ûthûûku bûrîa bûrî nkoroone yaaku, ûrombe Mwathani nîkenda këethîra kwoombîka agakûrekera mathûgaanio ta jau.

²³Nîkwîthîrwa nî nkwona gwe ûûjûri ûrûrû ta bwa nyongo na ûrî nkombo ya meeyia!”

²⁴Simioni aramûcokeria, “Itû ndoombera Mwathani ntîkeeje kûgwatwa nî ûntû kinya bûmwe bwa jarîa wauga jakangwata.”

²⁵Rîrîa Peterû na Johana baathirîrie gûkûûjîîra na gûtûmîîria rûteto rwa Mwathani, baracoka Jerusalemu. Barî rûgendoone rwa gûcoka baratûmîîria Nteto Injega cia Mûrungu ntûûreene ingî cia Samaria.

²⁶Mûraîka wa Mwathani areera Filipû, “Ithuranîre wîte rûteere rwa ûmotho, mwanka ûkinye njîreene îrîa yuumaga Jerusalemu îgeeta Gaza.” Njîra îîu îkûrûkagîîra rwanda.

²⁷Rîu Filipû araithuranîra, araambîrîria rûgendo. Îgiita o rîu rîongwa muntû ûmwe wa kuuma Ethiopia, waarî ûmwakûre nî aarî rûgendoone aanîte kwaao. Muntû ûu aarî wa îgweta mono na nîwe waarî mûrûngamîîri wa mbeecha cia mûka-mûnene ûrîa waathaga Ethiopia. Aaumîte Jerusalemu kûrîa aarî agwîta kûthaathayia Mûrungu. Aanîte akamati nî ngaarî yaakuucîîtue nî mbarathi.

²⁸Arî ngaarîîne, nî aathomaga yuku rîa kîroria Isaya.

²⁹Roho Ûmûtheru areera Filipû, “Îta akuî na ngaarî îîu, wîîtanie nayo.”

³⁰Filipû aroogîanga arakinya akuî na ngaarî na araigua muntû ûu akîthoma yuku rîa Kîroria Isaya. Filipû aramûûria, “Nî ûgûciûra nteto irîa ûkûthoma?”

³¹Nawe aramûcokeria, “Ngaciûra atîa na ntî na muntû wa gûnteethia gûciûra?” Rîu areera Filipû aitie ngaarîîne akare nthî akuî nawe.

³² Maandîko jarîa aathomaga jaugaga ûjû: “O ta ng'ondu iikîtue kîthînjîroone kana ng'ondu îrîa îkiraga ki îkîenjwa guee, nou kinya we atauga noo atîa.

³³Nî eekîrithîrue nthao na antû barareega kûmûthithîria îota. Gûtî we ûkoomba kwaria mantû jegiî nthukî yaawe nîûntû ûtûûro bwaawe aja nthîgûrû bûgûkinya mûthia.”

³⁴Muntû ûu wa kuuma Ethiopia areera Filipû, “Û mbîîra, nûû kîroria gîkî gîkwarîîria? Kîrîaria mantû jakîegiî kana kîrîaria mantû jegiî muntû ûngî?”

³⁵Rîu Filipû araambîrîria na gachunchî kau ka Maandîko na aramûtûmîrîria Nteto Injega ciegiî Jesû.

³⁶Barî rûgendoone o ûu, barakinya antû kwaarî na rûûjî na muntû ûu arauga, “Rûûjî tîru rûû! Nîmbi îkagiria mbatithua?” [

³⁷Filipû arauga, “Ûkëeja gwîtîkia na nkoro yaaku yonthe, woomba kûbatithua.” Nawe aracokia, “Îî nî ngwîtîkia atî Jesû Kristû nî Mûtaana wa Mûrungu.”][1]

³⁸Rîu muntû ûu arauga ngaarî îrûngame na bobaîrî bareenama rûûjîîne, na Filipû aramûbatithia.

³⁹Rîrîa baumîrîre rûûjîîne, Roho wa Mwathani arajûkia Filipû na mpwîî na ararima. Muntû ûu wa kuuma Ethiopia ataamwonere kaîrî îndî nî eetîre na mbere na rûgendo rwaawe agwîrîtue mono.

⁴⁰Îndî Filipû araciona arî Azotu na arakûrûkîîra ntûûreene cionthe agîtûmagîîria Nteto Înjega ciegiî Jesû mwanka arakinya Kaisaria.