Read KIMERU BIBLE PROTESTANT EDITION Maj 9 Bible Online

Maj 9 - KIMERU BIBLE PROTESTANT EDITION bible

Maj 9

¹Saûlû noo eetaga na mbere gûciîtia ûrîa akooragithia aritwa ba Mwathani. Nî eetîre kîrî mûthînjîri-Mûrungu ûrîa mûnene

²araromba aewe barûga ya kwimenyithania iromberoone bionthe birîa birî Damaski, nîkenda eethîîra arûme kana aka barîa baathingataga jarîa Mwathani aritanîte, abagwate na abaikie Jerusalemu batheeki.

³Arî akuî gûkinya Damaski, weerû buumîte îgûrû bûrenia nteere cionthe kûmûthiûrûka.

⁴Aragwa nthî, na araigua kajû gakîmwîra: “Saûlû, Saûlû! Nîkî ûkûnthangîkia?”

⁵Nawe arooria, “Nîgwe ûû Mwathani?” Nako kajû kau karacokia, “Nî ni Jesû ûrîa ûkûthangîkia.

⁶Îndî nandî rûngama, na ûkûrûke ntûûreene, kûrîa ûkeerwa ûrîa ûbuîrîte kûthithia.”

⁷Antû barîa beetanîtie na Saûlû nî barûngamîre au batîkûûmba kwaria. Nî baaigîrue kajû, îndî gûtî muntû kinya ûmwe boona.

⁸Saûlû nawe ararûngama na ageria gûtega, atîoone noo mbi. Tontû bûû, antû bau baramûgwata njara mwanka Damaski.

⁹Nawe arakara ku mîthenya îthatû atîkwona, na atîkûrîa kana anyua noo mbi.

¹⁰Kûu Damaski nî kwaarî na mûthingati ûmwe weetagwa Anania. Nawe nî oonere kîoneki Mwathani akîmwîraga atîrî, “Anania!” Nawe aramûcokeria, “Ndî aja Mwathani.”

¹¹Nawe Mwathani aramwîra, “Ithuranîre wîte njîreene îrîa îtagwa Njîra întambûrûku na waakinya mûciî jwa Judasi, ûrithîrie muntû wîtagwa Saûlû wa kuuma Tarisû, nîûntû nî akûromba Mûrungu nandî tûrî aja,

¹²na nî onetue kîonekiine muntû weetagwa Anania agîkûrûka nyomba na kûmûrîkîîra njara nîkenda oomba kwona.”

¹³Rîu Anania aramûcokeria, “Mwathani, nî mbigîtue kuuma kîrî antû babaingî mantû jamathûûku jarîa muntû ûu athithîrîtie atheru baaku barîa barî Jerusalemu.

¹⁴Ningî nî aetwe waatho nî athînjîri-Mûrungu barîa anene bwa kwîja naaja kûtheeka antû bonthe barîa barombaga riîtweene rîaaku.”

¹⁵Îndî Mwathani aramwîra, “Îta, nîkwîthîrwa muntû ûu nîwe nthuurîte ae gîntû kîrîa ngaatumîra gîa gûtûmîîria riîtwa rîaakwa kîrî antû barîa batî Ayahudi na anene, na kîrî antû ba Israeli.

¹⁶Ni ningwa nkamwonia mantû jamaingî jarîa akanyamaarua najo nîûntû bwa riîtwa rîaakwa.”

¹⁷Tontû bûû, Anania areeta na arakûrûka nyomba îîu na ararîkîîra Saûlû njara arauga, “Mûtaana wa baaba Saûlû, Mwathani Jesû, ûrîa watirimanîre nawe ûrî njîreene wîîjîte gûkû, nîwe wantûma nîkenda ûûmba kwona kaîrî, na ûûjûrwa nî Roho Ûmûtheru.”

¹⁸O rîo, into biakari ta maramû jaragwa kuuma meethoone ja Saûlû, na aroomba kwona kaîrî. Rîu ararûngama na arabatithua.

¹⁹Saûlû araarîa biakûrîa na aragîa inya. Saûlû nî aakarîre kagiita gagakai amwe na eetîkia barîa baarî Damaski.

²⁰Kuuma au areeta iromberoone mwanya mwanya na araambîrîria gûtûmîîria akiugaga atî Jesû nî Mûtaana wa Mûrungu.

²¹Antû bonthe barîa baamwigîrue bararigara mono barauga, “Anga muntû ûûjû tîwe ûrîa ûroragaga antû barîa barombaga riîtweene rîa Jesû kûrîa Jerusalemu? Anga atîrejîre naaja akîendaga kûgwata antû barîa beetîtîkîtie Jesû nîkenda abaikia kîrî athînjîri-Mûrungu barîa anene?”

²²Saûlû aragîa inya inyingî ya gûtûmîîria, na aramenyithia Ayahudi barîa baatûûraga Damaski bwega, akîbaejaga itûmi bibing'anu atî Jesû nîwe Kristû mwanka baraaga bwa kumûcokeria.

²³ Nyuma ya ntukû inyingî, Ayahudi nî baacemanîrie amwe na baraireba ûrîa bakooraga Saûlû,

²⁴îndî Saûlû aramenyithua ûrîa baarî bakûbanga. Nî baakaragia mpingîro cia gûtonya ntûûreene îîu ûtukû na mûthenya nîkenda bamûûraga.

²⁵Îndî athingati baawe nî baamûjûkîrie kûrî ûtukû baramwîkîra gîkabûûne na baramwînîkîîra rûthingoone rwa ntûûra.

²⁶Rîrîa Saûlû aakinyîre Jerusalemu, nî aagererie kwiringanîra na athingati ba Jesû. Îndî bonthe baramûkîra, nîûntû bateetîkagia atî nî aarî akwaa mûthingati wa Jesû.

²⁷Îndî Baranaba areeta arajûkia Saûlû aramwikia kîrî atûmwa, arabooneria bûbwega ûrîa Saûlû aacemanîrie na Mwathani arî njîreene na ûrîa Mwathani aarîrie nawe. Ningî arabeera ûrîa Saûlû aatûmîrîîrie na ûchamba riîtweene rîa Jesû kûu Damaski.

²⁸Tontû bûû, Saûlû arakaranîra amwe nabo, na arariûnga Jerusalemu yonthe agîtûmagîîria riîtweene rîa Mwathani omîrîtie.

²⁹Nî aarîrie na arakararania na Ayahudi barîa baaragia Kîgriiki, îndî bo nî baagererie kûmûûraga.

³⁰Rîrîa barîa beetîkîtie baamenyere nteto iu, barajûkia Saûlû na baramwikia Kaisaria na baramwîra eete Tarisû.

³¹Tontû bûû, Kanisa, îrîa yaarî îgûtaamba Judea na Galili na Samaria îragîa inya na thîîrî. Antû bau beetîkîtie nî baakîraga Mwathani na bagîteethagua nî Roho Ûmûtheru, barongeereka mono.

³²Rîrîa Peterû aariûngagîra antû barîa beetîkîtie, nî eetîre mwanka kîrî barîa baatûraga Linda.

³³Kûu nî eethîîre muntû ûmwe weetagwa Aeneasi, ûrîa woonji mîaka înaana na atoombaga kuuma gîtandeene.

³⁴Peterû aramwîra, “Aeneasi, Jesû Kristû agûkworia. Ûkîîra ûtandîke gîtanda gîaaku.” Nawe arookîîra o rîo.

³⁵Antû bonthe barîa baatûûraga Linda na Sharoni bakûmwona bareetîkia Mwathani.

³⁶Nî kwaarî na mwekûrû ûmwe ntûûreene ya Jopa weetagwa Tabiitha kana Dorokasi[2] na Kîgriiki. Mwekûrû ûu aatwîre kûthithia mantû jameega na gûteethia nkîa magiita jonthe.

³⁷Nî aakuîre na antû barathaambia mwîrî jwaawe na barajwîka kanyomba karîa kaarî ngorobeene.

³⁸Nîkwîthîrwa Jopa gûtaarî kûraaja na Linda, barîa beetîkîtie bakwigua atî Peterû nî aarî Linda baratûma antû baîrî beeta kûmwîra ûjû, “Njû gweetû na mpwîî na ûgákarakara.”

³⁹Rîu, Peterû areetania nabo na agûkinya ku baramwikia ngorobeene îgûrû. Aka bonthe barîa baarî ntigwa baroojûra kûu bakîrîraga na kwonia Peterû ngutukî na nguû ingî irîa Dorokasi aatumîte rîrîa aarî mwoyo.

⁴⁰Rîu Peterû arabaumagaria bonthe, na araturia maru araromba Mûrungu. Rîu aragarûka na areerekera mwîrî jûu arauga, “Tabiitha, ûkîîra!” Tabiitha aramincûria meetho na rîrîa oonere Peterû arakara nthî.

⁴¹Peterû aramûgwata njara na aramûteetheeria kûrûngama. Rîu areeta antû barîa beetîkîtie bonthe amwe na ntigwa irîa ciaarî o na aramûnenkanîra kîrî bo arî mwoyo.

⁴²Nteto iu irataamba iroojûra Jopa kunthe, na antû babaingî bareetîkia Mwathani.

⁴³Peterû nî aakarîre Jopa ntukû inyingî. Aakaraga kwa muntû weetagwa Simioni, ûrîa waarî mûtaguti wa mîgûûta.