Read KIMERU BIBLE PROTESTANT EDITION Aro 1 Bible Online

Aro 1 - KIMERU BIBLE PROTESTANT EDITION bible

Aro 1

¹Barûga kuuma kîrî ni Paûlû, nthûûmba ya Jesû Kristû, ûrîa wîîti aa mûtûmwa na ûthuuri nî Mûrungu nîkenda atûmîîria Nteto Injega cia Mûrungu.

²Nteto îîjî Njega no irîa Mûrungu aatumîîre iroria gwîîka wîrane na antû kuuma tene, o ta ûrîa ciaandîki Maandîkoone.

³Nteto iu Njega ciegiî Mûtaana wa Mûrungu, tawe Mwathani weetû Jesû Kristû, ûrîa waaciarîrwe kuuma rûrîîjoone rwa Daudi.

⁴Ningî ûntû bwegiî ûtheru bwa ûmûrungu bwaawe, nî onanîrue na inya înene atî nî Mûtaana wa Mûrungu rîrîa aariûkîrue kuuma kîrî akuû.

⁵Tontû bwaawe Mûrungu nî atûete ûtugi na atûethia atûmwa nîkenda tûtûmîîrîria antû ba mîgongo yonthe beetîkia na baathîkîra Kristû;

⁶kinya buî bwingwa, barîa beetî baa ba Jesû Krîstû.

⁷Tontû bûû, nî buî bwinthe barîa bûtûûraga Roma nkwaandîkîra, buî barîa Mûrungu eendeete na athuurîte nîkenda bwaa baawe. Bwinthe gîeeni ûtugi na thîîrî kuuma kîrî Mûrungu Baaba weetû na Mwathani weetû Jesû Kristû.

⁸Mbere nî ngûcokeeria Mûrungu waakwa nkaatho ndeene ya Jesû Kristû nîûntû bweenu bwinthe, nîûntû nteto ciegiî wîtîkio bweenu nî ikwîranwa nthîgûrûûne yonthe.

⁹Mûrungu ûrîa nditagîra ngûgî ncieejanîte na nkoro yaakwa yonthe gûtambia Nteto Injega ciegiî Mûtaana waawe, nîwe mûkûûjî atî nî mbûririkanaga magiita jonthe rîrîa nkûromba.

¹⁰Magiita jonthe nî ndombaga Mûrungu ampe kaanya gakeega ga kwîja kîrî buî na mûthieene ngûkoona.

¹¹Nîkwîthîrwa ntwîre kwirîrîria kûbwona nîkenda mbûgaîre kîewa kîa kîroho bûgîa înya.

¹²Ûrîa nkuuga nî atîrî, wîtîkio bwaakwa bûbwîkîre inya na wîtîkio bweenu bûmbîkîre inya.

¹³ Ataana ba baaba nî nkwenda bûmenya atî nî jamaingî mbîthîrîtwe nkîendaga kwîja kîrî buî, îndî mwanka nandî kûrî mantû jatwîre jandigîrîtie. Ndîngîenda kwîthîrwa ndî na maciara kîrî buî ta jarîa ndî najo kîrî antû bangî barîa batî Ayahudi.

¹⁴Nî mbigagua ndî îrandû kîrî antû bonthe: Agriiki na acenci na kîrî antû baathomu na barîa batîthomi.

¹⁵Tontû bûû, nî nkwenda mono gûtûmîîria Nteto Injega cia Mûrungu kinya kîrî buî barîa batûûraga Roma.

¹⁶ Ntiigagua nthao ngîtûmîîria Nteto Injega cia Mûrungu, nîûntû nîcio inya ya Mûrungu ya gûtûma muntû wonthe ûrîa wîtîkîtie oonoka: kîrî Ayahudi mbere, rîu kîrî antû barîa batî Ayahudi.

¹⁷ Nîkwîthîrwa Nteto Injega nîcio cionanagia ûrîa Mûrungu eetîkagîîria antû bakaa babaagîru. Ûntû bûu bûkarîkaga nîûntû bwa gwîtîkia kuuma kîambîrîria mwanka mûthia. O ta ûrîa Maandîko jakuuga, “Muntû ûrîa mwagîru atûûraga na njîra ya wîtîkio.”

¹⁸Mûthûûro jwa Mûrungu nî jwonanîtue kuuma îgûrû nîûntû bwa antû barîa batîtîkîtie Mûrungu. Nîkwîthîrwa meeyia jaao na ûthûûku bwaao nî bûrigîîrîtie ûûma bûmenyeka.

¹⁹Nîkwîthîrwa mantû jarîa joomba kûmenyekana jegiî Mûrungu, nî bajaijî nîûntû Mûrungu nî aboonetie jo bwega.

²⁰Kuuma rîrîa Mûrungu oombîre nthîgûrû, inya yaawe ya ntwîre na ûmûrungu bwaawe, kinya këethîra bitîonagwa na meetho, nî bimenyekaga tarîîria kuumania na birîa Mûrungu ombîte. Tontû bûû, antû batî na ûntû bwa kwigwatia no bûrîkû.

²¹ Kinya këethîra nî baijî Mûrungu îndî batîmwejaga gîtîîo kîrîa abuîri kûewa, kana bamûcokeria nkaatho. Mathûgaanio jaao nî jaeere ja ûtheri na ûûme bwaao bwaa muundu mûtheri.

²²Baugaga nî baboome, îndî bo nî biaa.

²³ Antû a bathaathayia Mûrungu ûrîa ûtûûraga mwoyo, bo bathaathagia mîng'uanano îrîa îthithîtue îkari ta muntû kana nyoni, kana nyomoo irîa cionkagia kana irîa irî mathendû.

²⁴Kîu nîkîo gîtûmîte Mûrungu abarekeeria bathingataga mantû ja rûko jarîa nkoro ciaao ciirîragîîria. Bathithagia ûmaramari bûu bageekîrithia mîîrî yaao nthao.

²⁵Bakûûranagia ûûma bwegiî Mûrungu na ûrongo na bakathaathayia na bagatumîkîra birîa Mûrungu oombîte antû a mûûmbi waabio wengwa, ûrîa ûbuîri gûkumagua kenya na kenya! Amen.

²⁶Tontû bûû, Mûrungu nî aabarekanîîrie bathingata mairîrîîria jamathûûku jarî nthao kûgweta ja mîîrî yaao. Aka baao nî batigîte kûthengeerwa nî arûme o ta ûrîa kûrî wîthîre na bakathengeerwa nî aka bangî.

²⁷Kinya arûme nî batigîte kûthengeera aka o ta ûrîa kûrî wîthîre na batua kwirîragîîria arûme bangî na bakabathengeera. Ûntû bûbû nîbû bûtûmîte bakanûkua nîûntû bwa maatia jaao.

²⁸Nîkwîthîrwa antû baba batoonere kwagîrîte kûmenya Mûrungu bwega, Mûrungu nî aabarekeererie bakara na mathûgaanio jamakîîgu na mîkarîre îtîagîrîte.

²⁹Nî boojûrîrwe nî mantû jamathûûku jonthe: ûthûûku na ûkoroku na kwenda kûthithîria bangî bûbûûî; ningî nî boojûrîrwe nî rûriitho na ûûragani na thaanga na waayia na kwenda kûmeneeria bangî na nguutû.

³⁰Ningî baaragîa mantû ja kûthûkîria bangî riîtwa, nî bathwîre Mûrungu na nî arumani na aikumia na aciîkîîri. Bathûgaanagia ûrîa bathithia ûthûûku na batîathîkagîra aciari baao.

³¹Bo nî biaa na batî eetîkua na batî kîaao na batîcaîraga muntû noo ûrîkû.

³²Kinya këethîra nî baijî atî Waatho bwa Mûrungu buugaga atî antû barîa batûûraga na mîîtîre ta îîu nî babuîri gûkua, noo beetaga na mbere kûthithia mantû jau na kûgwatanîra na antû barîa bathithagia mantû jau.