Read KIMERU BIBLE PROTESTANT EDITION Aro 10 Bible Online

Aro 10 - KIMERU BIBLE PROTESTANT EDITION bible

Aro 10

¹Ataana na aarî ba baaba, maromba jaakwa kîrî Mûrungu, na ûrîa nkoro yaakwa irîragîria, nî atî antû beetû boonoke.

²Ndî mûkûûjî waao atî barî wîru mono mantûûne jegiî gûcwaa Mûrungu îndî wîru bûu bwaao nî bwagîte ûmenyo bwa mma.

³Bataaciûkîrwa bamenya waagîru bûrîa buumaga kîrî Mûrungu îndî bacwaga kûrikithia waagîru bwaao bongwa; na barega kwinyia beetîkîîria njîra îrîa Mûrungu atumagîra kweethia antû babaagîru.

⁴Nîkwîthîrwa Kristû nî aakinyîrie Waatho mûthia, nîkenda o muntû wonthe ûrîa ûgeetîkia aa ûmwagîrû mbere ya Mûrungu.

⁵ Musa aandîkîre arauga atî muntû ûrîa ûrî ûmwagîru nîûntû bwa kûthingata Waatho agatûûrua nîbu.

⁶ Îndî muntû ûrîa ûrî ûmwagîru nîûntû bwa gwîtîkia, akáuga ûjû nkoroone yaawe, “Nûû ûgaitia îgûrû?” (Kuuga ûu nî Kristû akûringa nthî).

⁷Ningî akória, “Nûû ûkenama kûrîa akuû barî?” (Kuuga ûu nî kûriûkia Kristû kuuma kîrî akuû).

⁸Îndî Maandîko jariuga ûjû, “Rûteto rwa Mûrungu rûrî akuî naagwe, na rûrî kanyueene gaaku, na rûrî nkoroone yaaku.” Rûu nîru tûtûmagîîria nîkenda muntû eetîkia;

⁹nîûntû ûkëeja kuumbûra na kanyua gaaku atî Jesû nîwe Mwathani, na ûgeetîkia na nkoro yaaku atî Mûrungu nî aamûriûkîrie kuuma gîkuûne, ûkoonoka.

¹⁰Nîkwîthîrwa muntû eetîkagia na nkoro yaawe na akaethua ûmwagîru na akaumbûra na kanyua kaawe na akoonoka.

¹¹ Maandîko jariuga, “Muntû wonthe ûrîa wîtîkagia Mûrungu, atîkorocokerwa nî nthao.”

¹²Ûntû bûu nî bwa antû bonthe nîûntû kîrî Mûrungu gûtî Mûyahudi kana ûrîa ûtî Mûyahudi. Mûrungu nî Mwathani wa antû bonthe na nî atharimaga na itharimo bibingî bonthe barîa bamûkaagaîra.

¹³ O ta ûrîa Maandîko jakuuga, “O muntû wonthe ûrîa ûgakaîra riîtwa rîa Mwathani akoonoka.”

¹⁴Îndî nîatîa antû bakoomba gûkaîra Mwathani ûrîa batîtîkîtie? Ningî bageetîkia atîa këethîra gûtî rîo baigua agîtûmîîrua? Ningî bakaigua atîa këethîra gûtî mûtûmîîria wa kûbeera?

¹⁵ Nîatîa antû bakoomba gûtûmîîria batîtûmi? O ta ûrîa kwaandîki, “Kwîja kwa antû barîa batûmîîragia Nteto Injega cia Mûrungu nî kûthongomi mono!”

¹⁶ Îndî tî antû bonthe beetîkîrie Nteto Injega cia Mûrungu; nîkwîthîrwa Isaya ariûria atîrî, “Mwathani nûû weetîkia ntûmîîri yeetû?”

¹⁷Tontû wîtîkio buumanagia na kwigua nteto îrîa itûmîragua, nacio nteto iu ciegiî Krîstû ûrîa ûgûtûmîîrua.

¹⁸ Îndî rî, ndiûria atîrî, “kwombîka bakeethîrwa bataigua ntûmîîri?” No mwanka beethîrwe baraigua; nîûntû Maandîko jariuga atîrî, “Kajû kaao nî kaigîgîtue nthîgûrûûne yonthe, na nteto ciaao ciatamba nthîgûrûûne yonthe.”

¹⁹ Kaîrî ga nkûûria, kûûmbîka antû ba Israeli beethîrwe bataaciûkîîrwe? Musa wengwa nîwe wa mbere gûcokia ûntû bûu: “Ngatûma bwiigue rûriitho nîûntû nkatharima mîgongo îngî, na ntûme bûthûûre rîrîa nkatharima mûgongo jwa antû biaa.”

²⁰ Kaîrî Isaya ariuga nteto iji arî na ûchamba, “Nî ndonerwe nî antû barîa bataancwaga, ndîracionania kîrî barîa bataambûrithagîria.”

²¹ Îndî mantû jegiî Israeli Mwathani ariuga: “Mûthenya junthe nî ndaabatambûrûkîîrie njara nkîbagwata ûgeni îndî bareeta na mbere kûrega kwathîka na baraa ndemi.”