Read KIMERU BIBLE PROTESTANT EDITION Aro 11 Bible Online

Aro 11 - KIMERU BIBLE PROTESTANT EDITION bible

Aro 11

¹ Nandî ndîûrîa atîrî, ka Mûrungu aregete antû baawe? Arî buru! Ûûni ndî Mûisraeli, ûmwe wa nchiarwa cia Abrahamu, na wa kuuma mwîrîga jwa Benjamini.

²Mûrungu atîregete antû baawe barîa aathuurîte kuuma kîambîrîria. Buî bwingwa nî bûkûririkana ûrîa Maandîko jaugaga bwegiî Elija rîrîa eerencaga Mûrungu nîûntû bwa Aisraeli akiugaga:

³ “Mwathani, nî barooragîre iroria biaaku na bakoboranga kîritîro gîaaku kîa igongwana. No ni ninka ntîgarîte, na nî bagûncwaa bambûraga.”

⁴ Îndî nîatîa Mûrungu aamûcokerie? Nî aamwîrîre atîrî, “Nî ndiitigarîrîtie antû ngiri mûgwanja barîa batathaathayia mûrungu jwa mûng'uanano jûrîa jwîtagwa Baali.”

⁵O ûu nîu gûkari kinya îgiita rîrî: kûrî antû babakai barîa Mûrungu aitigarîrîtie, abathuurîte nîûntû bwa ûtugi bwaawe.

⁶Abathuurîte nîûntû bwa ûtugi bwaawe na tî ûntû bwa mathithio jaao. Këethîra tî ûu, ûtugi bwaawe bûtîngîîthîrwa bûrî ûtugi bwa mma.

⁷Tuuge atîa îndî? Antû ba Israeli batoonere kîrîa baacwaga. Nî babakai baao barîa Mûrungu aathuurîre boonere kîrîa baacwaga. Bangî bonthe baraa ndemi.

⁸ O ta ûrîa Maandîko jaugîîte: “Mûrungu nî aarigicanîrie mathûgaanio jaao, mwanka naarua tûrî bo batîûmba kwona na kana baigua.”

⁹ Daudi nawe ariuga: “Biatho biaao nî biejage mûtego jwa kûbagwata, bagûûjage na bakanûkague.

¹⁰Meetho jaao nî jagîe muundu baremwe kwona, na mîgongo yaao nî yunîke kenya na kenya.”

¹¹Rîu ndîûrîa atîrî, Ayahudi baagitara ka jwaeere nîju mûthia jwaao? Arî buru! Îndî nîûntû bwa kwîyia kwaao, wonokio nî bûkinyîrîte antû barîa batî Ayahudi nîkenda Ayahudi baigua rûriitho.

¹²Këethîra kwîyia kwaao nîku gwatûmîre nthîgûrû îngî yonthe yoona itharimo bibingî, na kûremeerwa kwaao kûretera antû barîa batî Ayahudi itharimo, itharimo bikaingîa bûng'ana atîa rîrîa Ayahudi bonthe bageetîkia!

¹³Nandî nî buî antû barîa batî Ayahudi nkwarîria: Mûrungu nî anthuurîte ampeethia mûtûmwa kîrî antû barîa batî Ayahudi. Nî ngûkathîrîria ngûgî yaakwa mono,

¹⁴nîkenda antû beetu Ayahudi baigua rûriitho, na bamwe boonoka.

¹⁵Këethîra kûregwa kwaao nî gwatûmîre nthîgûrû iigithanua na Mûrungu, gûcokeera kwaao gûkeethîrwa gûkarî atîa? Gûkeethîrwa gûkarî ta ûtûûro kîrî barîa bakuîte.

¹⁶Këethîra biûjûjû bia Ayahudi biaarî bibitheru, kinya nchiarwa ciaao nî itheru. Mîri ya mûtî îkeethîrwa îbuui kinya mabûûra nî ja buui.

¹⁷Mpang'i imwe cia mûzeituni jwa muunda nî ciaunîrwe na mpang'i cia mûzeituni jwa kîthaka, îrarûmatanithua arîa mpang'i iu ciaarî nîkenda ikûrîra mûzeituniine jûu. Buî antû batî Ayahudi nî buî mpang'i cia mûzeituni jwa kîthaka.

¹⁸Tontû bûû, bûgáikumîria mpang'i iu ingî. Bûkëeja gwikumia, bûrikane bûtiumîte mîriine îndî mîri nîyo îbûgwatîrîte.

¹⁹Îndî gwe ûkauga: “Mpang'i ciatemerwe nîkenda ûûni ngwatithanua na mûzeituni antû aacio.”

²⁰Bûu nî mma! Baagiitîrwe nîûntû bwa kwaga wîtîkio kwaao, îndî gwe wîîki o nî wîtîkio bwaaku. Îndî ûkéeja gwikumia, kîraga.

²¹Këethîra Mûrungu atacaîrîre Ayahudi na nîbo mpang'i cia wîthîre rî, ûrîthûgaania no gwe agacaîrîra?

²²Tontû bûû, menya Mûrungu nî wa kîaao îndî nî akanûkanagia mono. Atî kîaao kîrî barîa bagwîte meeyiene, îndî agakwigîîrua kîaao këethîra ûgatûûra ûrîa eendaga. Warega kûthithia ûu, ûgatemwa uume o.

²³Kinya Ayahudi bagätiga kûrega gwîtîkia kwaao, bakagwatithanua na mûzeituni kaîrî nîûntû Mûrungu arî na inya ya kûbagwatithania kaîrî.

²⁴Buî antû barîa batî Ayahudi bûrî mpang'i cia mûzeituni jwa kîthaka irîa ciatemerwe na iragwatithanua na njîra îtî ya wîthîre na mûzeituni jwa muunda. Bûkëethîrwa bûrî bûbûûthû atîa Mûrungu gûcokia Ayahudi, tabo mpang'i irîa ciagiiti, mûzeituniine jûrîa jungwa baaumîre.

²⁵Ataana na aarî ba baaba, nî nkwenda bûmenya kîriga kîrîa kîrî withoone bûtîkeeje kûthûgaania bûrî baboome mono. Kîriga kîu nî atî Ayahudi nî boomîtie nkoro ciaao. Kûûmia nkoro ciaao tî kwa gûtûûra îndî bakoomia nkoro ciaao mwanka rîrîa antû barîa batî Ayahudi bonthe bageetîkia Mûrungu.

²⁶ Bûu bwakarîka, Aisraeli bonthe bakoonokua. Maandîko jariuga atîrî, “Mwonokia akeeja kuuma Zaiûni, nawe akebia ûthûûku bunthe buume kîrî rûrîîjo rwa Jakubu.

²⁷ Kîrîkanîro gîkî nîkîo ngeeka nabo, rîrîa nkeebia meeyia jaao.”

²⁸Mantûûne jegiî Nteto Injega cia Mûrungu, Ayahudi nî anthû ba Mûrungu nîûntû bweenu buî antû barîa batî Ayahudi. Îndî mantûûne jegiî kûthuurwa, kinya nandi bo nî acoore ba Mûrungu mono nîûntû bwa biûjûjû biaao.

²⁹Nîkwîthîrwa Mûrungu atîgarûraga mathûgaanio jaawe mantûûne jegiî ûrîa athuuraga kana barîa eetaga.

³⁰Buî antû barîa batî Ayahudi kûrî îgiita bûtaathîkagîra Mûrungu îndî nandî nî abwonetie kîaao kîaawe nîûntû bwa kûrega gwîtîkia kwa Ayahudi.

³¹Tontû bûû nî batwîre batîkwathîka nîkenda o ta ûrîa Mûrungu aabwigîîrue kîaao, abaigîîrua kîaao kinya bo.

³²Tontû Mûrungu nî atûmîte antû bonthe bakara ta nkombo nîûntû bwa kûrega kwathîka kwaao nîkenda abaigîîrua kîaao bonthe.

³³ Ka ûtonga, na ûûme na ûmenyo bwa Mûrungu bûrî bûbwingî atîa! Kîaao kîaawe gîtîcûnkûûnîka, na gûtî muntû ûûmba gûturia njîra ciaawe! O ta ûrîa

³⁴ Maandîko jakuuga atîrî, “Nûû ûûmba gûciûra mathûgaanio ja Mwathani? Nûû ûmwejaga kîrîra?

³⁵ Kana nûû waamwaa kîewa, nîkenda eeja kûmûrîaa?”

³⁶ Nîkwîthîrwa nîwe woombîre into bionthe na nîwe ûbitûûragia na bionthe nî biaawe. Mûrungu arokumagua kenya na kenya! Amen.