Read KIMERU BIBLE PROTESTANT EDITION Aro 13 Bible Online

Aro 13 - KIMERU BIBLE PROTESTANT EDITION bible

Aro 13

¹Muntû wonthe nî abuîrîte kwathîkagîra thirikarî îrîa îkwaathana nîûntû gûtî waathani bûtiumaga kîrî Mûrungu. Barîa bakwaathana beekîtwe waathaniine nî Mûrungu.

²O muntû ûrîa ûrûjaga na athani barîa barîo nî mantû jarîa Mûrungu augîîte arûjaga najo; nawe wonthe ûrîa ûkathithia ûu akairetera îgamba.

³Tontû athani tî ba gûkîragwa nî barîa bathithagia mantû jameega îndî nî ba gûkîragwa nî barîa bathithagia mantû jamathûûku. Këethîra nî ûkwenda gûkara ûtîgûkîra barîa bakwaathana, thithagia ûrîa kwagîrîte nabo bagagûkumagia.

⁴Barîa bakwaathana nî nthûûmba cia Mûrungu cia gûgûteethia. Îndî ûkëeja kûthithia mantû jamathûûku, kîra, nîûntû barî na waatho bwa gûgûkanûkia. Bo nî nthûûmba cia Mûrungu, cia gûkanûkia barîa bathithagia mantû jamathûûku.

⁵Tontû bûû, no mwanka bwinyiagie kîrî barîa bakwaathana, tî ûntû bwa gûkîra gûkanûkua nî Mûrungu akî, îndî kinya nîûntû bwa kwîthîrwa ûtî na ûntû noo bûrîkû bwa kwiguutîra.

⁶ Kîu nîkîo gîtûmaga ûreaa ûgoti, nîûntû barîa bakwaathana nî Mûrungu batumîkagîra rîrîa bakûrita ngûgî îîu.

⁷Nenkagîra barîa bakwaathana kîrîa babuîri kûnenkerwa. Banenkagîre ûgoti bwaaku na ûrîage moogoti jonthe jarîa jatui na ûtîîage bonthe barîa babuîri kûewa gîtîîo.

⁸Ûgákara na îrandû rîa muntû kinya ûrîkû tiga rîa wendo akî. Muntû ûrîa wendaga ûngî nî ojûragia Waatho bunthe bwa Mûrungu.

⁹ Nîkwîthîrwa maathana jarîa jaugaga, “Ûkáthûngîîra; Ûkóragana; Ûkáiya; Ûkáirîrîria;” na kinya jangî jonthe jarî ndeene ya Waatho bûbû buugaga, “Endaga muntû ûngî o ta ûrîa ûciendeete gwengwa.”

¹⁰Ûkëethîrwa wendeete muntû, ûtîmûthithîria ûntû bûbûthûûku. Tontû bûû, kwendana nîku kûûjûria Waatho bunthe.

¹¹Nî bûbuîri kûthithia ûu nîûntû nî bûkûmenya atî rîrî nîrîo îgiita rîeenu rîa gûûkîîra kuuma toroone. Nîkwîthîrwa îgiita rîeetû rîa kwonokua rîrî akuî naatuî nandî nkûrûki ya rîrîa twambîrîrie gwîtîkia.

¹²Ûtukû bûrî akuî kûthira, na mûthenya nî jwengeerie gûkinya. Tûtigeeni kûthithia mantû jamooru jarîa jathithagîrua muunduune na tûthithagie mantû jameega ta antû barîa batûûraga weerûûne.

¹³Tûtûreeni na mîîtîre îmîega ta antû ba weerû. Tûtiganeeni na biatho birîa antû bathithagia mantû jamaaî, na wogiti, na ûmaramari na ûmaraya, na kûrwaa tuî twîngwa na kwigîrua bangî rûriitho.

¹⁴Îndî rekeni Mwathani Jesû Kristû aathage ûtûûro bweenu buru na bûkáa mwîrî kaanya ga kûûjûria mairîrîîria jaaju jamaaî.