Read KIMERU BIBLE PROTESTANT EDITION Aro 14 Bible Online

Aro 14 - KIMERU BIBLE PROTESTANT EDITION bible

Aro 14

¹ Gwatageeni ûgeni barîa wîtîkio bwaao bûtî na inya, îndî bûgákararania nabo mantû jegiî ûrîa bakwona nî bûbwega kana tî bûbwega.

²Kûrî we wîtîkagia noo arîe into bionthe, îndî kûrî ûngî nîûntû wîtîkio bwaawe bûtî na inya arîjaga mataanda akî.

³Muntû ûrîa ûrîjaga biakûrîa bia mîthemba yonthe atîbuîri kûmena muntû ûrîa ûtirîjaga biakûrîa bia mîthemba yonthe. Ningî kinya muntû ûrîa ûtîrîjaga biakûrîa bia mîthemba yonthe atîbuîri kûmena ûrîa ûrîjaga biakûrîa bia mîthemba yonthe nîûntû Mûrungu nî amwîtîkîîrîtie.

⁴Ka gwe ûrî ûû, ûkîgitîra nthûûmba ya muntû ûngî îgamba? Mwathi waayo nîwe ûkamenya këethîra jarîa îkûthithia nî jameega kana nî jamaaî. Ningî akoombana nîûntû Mwathani arî na inya ya gûtûma oombana.

⁵Kûrî muntû ûthûgaanagia atî kûrî ntûkû înjega nkûrûki ya îngî, na ûngî akathûgaania atî ntukû cionthe no ûmwe. O muntû nî abuîri kûthingata ûrîa akwona na mathûgaanio jaawe.

⁶Muntû ûrîa waathûraga ntukû eethagîrwa agîtîîa Mwathani. Muntû ûrîa ûrîjaga biakûrîa bia mîthemba yonthe, abirîjaga akumithia Mwathani, nîûntû nî acokagîria Mûrungu nkaatho nîûntû bwa biakûrîa biu. Muntû ûrîa ûtîrîjaga biakûrîa bia mîthemba yonthe, athithagia ûu nîkenda akumithia Mwathani na nî acokagîria Mûrungu nkaatho.

⁷Gûtî kinya ûmwe weetû ûtûûraga nîûntû bwaawe wengwa, na gûtî kinya ûmwe weetû ûkuujaga nîûntû bwaawe wengwa.

⁸Këethîra tûgatûûra mwoyo, tûgatûûra nîûntû bwa Mwathani na këethîra tûgakua, tûgakua nîûntû bwa Mwathani. Tontû bûû, twatûûra, kana twakua, tûrî o ba Mwathani.

⁹Gîtûmi gîkî nîkîo gîatûmîre Kristû akua na ariûka nîkenda eethîrwa arî Mwathani wa antû barîa barî mwoyo na wa barîa bakuîte.

¹⁰ Nîmbi îtûmaga ûgitîra mûkristû ûngî îgamba? Nimbi îtûmaga ûmena mûkristû ûngî? Twinthe tûkarûngama mbere ya Mûrungu na tûgambithue nîwe.

¹¹ Tontû Maandîko jaugîîte, “Mwathani ariuga; nîûntû ni ndî Mûrungu ûrîa ûtûûraga mwoyo, o muntû wonthe agaturia maru mbere yaakwa, na o muntû wonthe akaumbûra na kanyua kaawe auge ni nî ni Mûrungu.”

¹²Tontû bûû, o ûmwe weetû agaiteteera wengwa mbere ya Mûrungu.

¹³Tontû bûû, kuuma nandî tûtigeeni kûgitîra bangî îgamba na tûtue atî tûtîkorothithia ûntû bwa kûgitaria mûkristû kana bwa gûtûma eeyia.

¹⁴Ni na bwaakwa, nî mbijî na ngeetîkia ndî kîrî Mwathani Jesû atî gûtî biakûrîa kinya bimwe bitî bibitheru na bwaabio biongwa. Îndî biakûrîa biu tî bibitheru kîrî muntû ûrîa ûkathûgaania bitîtheri.

¹⁵Mûkristû ûngî akëeja kwigua bûbûûî nîûntû bwa biakûrîa birîa ûkûrîa, ûgwe ûtîtongeeretue nî wendo. Ûkororeka biakûrîa birîa ûrîjaga biînyangia ûtûûro bwa muntû ûrîa Kristû aakuîre nîûntû bwaawe.

¹⁶Tontû bûû, ûkáreka gîntû kîrîa woonaga kîrî gîkîega gîtengûrwa.

¹⁷Nîkwîthîrwa Ûnene bwa Mûrungu tî kûrîa kana kûnyua, îndî nî waagîru, na thîîrî na kûgwîrua kûrîa Roho Ûmûtheru aeejanaga.

¹⁸Muntû ûrîa ûtumîkagîra Kristû nî agwîragia Mûrungu na ageetîkîîrua nî antû bangî.

¹⁹Tontû bûû, no mwanka tûrûmîîrîre mantû jarîa jaretaga thîîrî, na jarîa jatûteethagia gwîkanîra inya.

²⁰Bûkéeja kwînyangia ngûgî cia Mûrungu nîûntû bwa biakûrîa. Biakûrîa bionthe biomba kûrîîwa, îndî tî bwega kûrîa gîntû kinya kîrîkû kîrîa gîgûtûma muntû ûngî agwa meeyiene.

²¹Nî bwega kûrega kûrîa nyama kana ndibei kana ûthithia ûntû noo bûrîkû bûrîa bûûmba gûtûma mûkristû ûngî agwa meeyiene.

²²Ûkéera muntû kinya ûrîkû ûrîa wîtîkîtie bwegiî ûntû bûu, nî bûkare bûrî witho gatîgatî gaaku na Mûrungu. Kûgwîrua nî kîrî muntû ûrîa ûtî na ûntû bûkûmûgambithia ndeene yaawe.

²³Îndî ûrîa wîthagîrwa arî na nkaanja kîrî into birîa akûrîa, Mûrungu nî amûkanûkagia aabirîa, nîûntû îthithio riaawe rîtiumanîtie na wîtîkio. Ûntû kinya bûrîkû bûrîa bûtîumanîtie na wîtîkio nî meeyia.