Read KIMERU BIBLE PROTESTANT EDITION Aro 15 Bible Online

Aro 15 - KIMERU BIBLE PROTESTANT EDITION bible

Aro 15

¹Baatuî barîa wîtîkio bweetû bûrî na inya nî tûmenyagîîre antû barîa barî na wîtîkio bûtî na inya na tûkáthithia mantû jarîa jagûtûgwîria.

²O ûmwe weetû nî acwee ûrîa akagwîria akristû bangî nîkenda batetheka, na wîtîkio bwaao bûrika nkûrûki.

³ Nîkwîthîrwa Kristû ataacwîre kwigwîria wengwa. Îndî o ûrîa Maandîko jaugîîte, “Irumi birîa ûrumagwa bigûjaga kîrî ni.”

⁴Ûntû bunthe bûrîa bûrî Maandîkoone bwaandîkîtwe bûtûritana na nîkenda Maandîko jau jatûûmîîria na jatwîkîra inya nîkenda twona wîrîgîîro.

⁵Mûrungu ûrîa ûtûmaga tûûmîîria na agatwîkîra inya arobûûmbithia gûkara na ngwatanîro o muntû na ûngî bûkîthîngataga ngerekano îrîa Kristû Jesû aatwonererie,

⁶nîkenda buî bwinthe bûrî amwe bûgakumithagia Mûrungu, Îthe wa Mwathani weetû Jesû Kristû na kajû kamwe.

⁷Rîu gwatanageni ûgeni o muntû na ûngî, o ta ûrîa Kristû aabûgwatîre ûgeni, nîkenda Mûrungu akumagua.

⁸Ndîbwîra na mma atî Kristû nî aaere nthûûmba ya Ayahudi nîkenda arikithia wîrane bûrîa Mûrungu aaere biûjûjû biaao birîa biaarî îgweta,

⁹ na nîkenda antû barîa batî Ayahudi bakumia Mûrungu nîûntû bwa kîaao kîaawe. O ta ûrîa Maandîko jakuuga, “Tontû bûû, ngakûgongaga ndî kîrî antû barîa batî Ayahudi; na mbinage ûkumio bwa riîtwa rîaaku.”

¹⁰ Ningî jariuga, “Gwîrueni buî antû barîa batî Ayahudi bûrî amwe na antû ba Mûrungu.”

¹¹ Ningî o kaîrî jakauga, “Kumieni Mûrungu buî bwinthe antû barîa batî Ayahudi, na antû bonthe nî bamûkumie.”

¹² Ningî kinya Isaya ariuga, “Ûmwe wa nchiarwa cia Jesii akeeja, kwatha antû barîa batî Ayahudi, na bakoonaga wîrîgîîro kuumania nawe.”

¹³Mûrungu ûrîa ûrî kaumo ka wîrîgîîro bunthe arobûûjûria na kûgwîrua na thîîrî nîûntû nî bûmwîtîkîtie, nîkenda wîrîgîîro bweenu bûgeeta na mbere gûkura nîûntû bwa inya ya Roho Ûmûtheru.

¹⁴Ataana na aarî ba baaba, nî nkwigua ng'anîri nîûntû bweenu, atî buî bwîngwa nî bûûjûri wega na bûrî na ûmenyo bûbwingî, na o muntû oomba kûritana ûngî.

¹⁵Îndî kûrî mantû jamwe mbûririkanîtie barûgeene îîjî ndî na ûchamba, nîûntû bwa ûtugi bûrîa Mûrungu ampeete,

¹⁶bwa kwaa nthûûmba ya Kristû Jesû kîrî antû barîa batî Ayahudi. Ni ndî mûthînjîri-Mûrungu kîrî Nteto Injega cia Mûrungu, nîkenda kîewa kîa antû barîa batî Ayahudi gîîtîkîîrua nî Mûrungu, kîtheretue nî Roho Ûmûtheru.

¹⁷Tontû bwa Kristû Jesû, ndî na gîtûmi gîa gwikumîria ngûgî îrîa nditagîra Mûrungu.

¹⁸Ntî na ûchamba bwa kwaria mantû jangî tiga jarîa Kristû eekîîre nkoroone yaakwa ya gûtûma antû barîa batî Ayahudi baathîkagîra Mûrungu nîûntû bwa mantû jarîa nkwaria na nkûthithia,

¹⁹na biama na mantû ja kûrigarania, jarîa nthithîtie nîûntû bwa inya ya Roho wa Mûrungu. Nthithîtie ûu gûntû kunthe, kuuma Jerusalemu mwanka Iluriko, ngîtûmîîragia bwega Nteto Injega ciegiî Kristû.

²⁰Mworoto jwaakwa nî gûtûmîîria Nteto Injega gûntû kunthe kûrîa Kristû ataatûmîîrua kaîrî, nîkenda ntîkeeje gwakîîra mûsingiine jwa muntû ûngî.

²¹ O ta ûrîa Maandîko jakuuga: “Antû barîa bateerwa mantû jaawe bakoona, na antû barîa bataigua mantû jamwegiî bagaciûra.”

²² Gîkî nîkîo gîatûmîte ndigîîrua jamaingî kwîja kûbwona.

²³Îndî nandî nîûntû ntî na kaanya ka kûrita ngûgî gûntû gûkû kweenu kaîrî, na nîûntû nî ntwîre kwenda kwîja kûbwona mîaka îmingî îthiri,

²⁴ndî na wîrîgîîro bwa kûbwona nandî mbîtîte nthîgûrû ya Spania. Ngakara naabuî kagiita gagakai, naabuî bûgaampa ûteethio nîkenda mbîta na mbere na rûgendo rwaakwa.

²⁵ Nandî mbîtîte Jerusalemu nîkenda mbikîria akristû barîa barî ku ûtethio.

²⁶Nîkwîthîrwa kanisa cia Makedonia na Akaia nî cionere kwagîrîte kûrîta into bia gûteethia akristû barîa barî nkîa kûu Jerusalemu.

²⁷ Nîbo bongwa baathuurîre kûthithia ûntû bûu. Nî mma yaarî ngûgî yaao gûteethia Ayahudi bau nkîa. Nîkwîthîrwa Ayahudi nî bagaanîre itharimo biaao bia kîroho na antû barîa batî Ayahudi, kinya bo nî babuîri kûgaîra Ayahudi itharimo bia into birîa barî nabio.

²⁸Rîrîa nkathiria ngûgî îîjî na nenkanîre mbeecha irîa cionthe ikeethîrwa ikûritwa, nîrîo nkabûriûngîra ndî rûgendoone rwaakwa rwa gwîta Spania.

²⁹Ningî nî nkûmenya atî rîrîa nkeeja kweenu, nkeeja mbûjûri itharimo bia Kristû.

³⁰Rîu ataana na aarî ba baaba, ndaabwerenca ndeene ya Mwathani weetû Jesû Kristû na nîûntû bwa wendo bûrîa buumaga kîrî Roho, bûciûmie amwe naani kûndombera kîrî Mûrungu.

³¹Bûrombe nîkenda Mûrungu ambonokia kuuma kîrî antû ba Judea barîa batîîtîkîtie na nîkenda kinya ngûgî yaakwa îrîa îmbikîtie Jerusalemu îtîkîîrua nî akristû ba ku.

³²Tontû bûu, këethîra nî wendi bwa Mûrungu nkeeja kîrî buî ngwîrîtue na nogoke nîûntû bwa gûkarania naabuî.

³³Mûrungu ûrîa ûtweejaga thîîrî arokaraga amwe naabuî bwinthe. Amen.