Read KIMERU BIBLE PROTESTANT EDITION Aro 2 Bible Online

Aro 2 - KIMERU BIBLE PROTESTANT EDITION bible

Aro 2

¹ Gwe muntû, ûtî na gîtûmi noo kîrîkû gîa kuigwatia rîrîa ûkûgiitîra bangî îgamba. Nîkwîthîrwa rîrîa ûgiitagîra bangî, nîgwe wiigitagîra gwengwa, nîûntû mantû jau nîjo jongwa ûthithagia.

²Nî tûkûmenya atî Mûrungu nî mma athithagia rîrîa akûgambithia antû barîa bathithagia mantû jau!

³Gaûkûthûgaania gwe muntû, atî rîrîa ûgiitagîra barîa bathithagia mantû jau îgamba îndî gwe ûkajathithia, ûtîkanûkua nî Mûrungu?

⁴Kana nî kîaao kîa Mûrungu na ûûmîîria bwaawe wagîrîte gîtûmi? Ga ûtiijî atî kîaao kîa Mûrungu kîrî o nîkenda wirira?

⁵Îndî gwe ûrî na nkoro înjûmo na ûtîkwenda kwirira. Tontû bûû, ka ûgûtûma Mûrungu athûûra nîgwe nkûrûki; nîkwîthîrwa rîrîa ntukû ya îkanûkia îgakinya, Mûrungu akoonekana akîgiita magamba na îota.

⁶ Ntukû îîu Mûrungu akarîaa o muntû kûringana na mathithio jaawe.

⁷Antû barîa batûûraga kûthithia mantû jameega na gûcwaa mwago na ûkumio na ûtûûro bûrîa bûtîthiraga; bau nîbo Mûrungu akaa ûtûûro bwa kenya na kenya.

⁸Îndî antû barîa baciendeete bongwa na batîthingataga ûûma na bathithagia mantû jamathûûku, bagakanûkua na mûthûûro jûmûnene.

⁹Antû bonthe barîa bathithagia mantû jamaaî bakeethîrwa barî na mîthangîko na kwithikîîra gûkwingî. Jaja jakambîrîria na Ayahudi, rîu jakinyîre antû barîa batî Ayahudi.

¹⁰Îndî Mûrungu akaa barîa bathithagia mantû jameega mwago, na îgweta na thîîrî; arîambîrîria na Ayahudi, rîu aee antû barîa batî Ayahudi.

¹¹ Nîkwîthîrwa Mûrungu atîendaga bamwe na athûûra bangî.

¹²Antû bonthe barîa beagia kinya këethîra batiijî Waatho bwa Musa, bakathirua. Ningî barîa beagia bakîmenyaga Waatho, Waatho bûgatumîrwa kûbagambithia.

¹³Nîkwîthîrwa tî barîa baijî ûrîa Waatho buugaga baejaga babaagîru mbere ya Mûrungu, îndî nî barîa bathithagia ûrîa Waatho buugaga.

¹⁴Rîrîa antû barîa batî Ayahudi bathithagia ûrîa Waatho bûkuuga batongeeretue nî mathûgaanio jaao, kinya këethîra batî na Waatho, bûu bweejaga Waatho kîrî bo.

¹⁵Mîîtîre yaao nî yonanagia atî mantû jarîa Waatho buugaga jathithue nî jaandîki nkoroone ciaao. Nkoro ciaao kinya cio nî ikûûjîîraga ûntû bûu, nîûntû mathûgaanio jaao nî jabathitangaga kana jakabathaûra.

¹⁶Tontû bûû, kûringana na Nteto Injega irîa ntûmagîîria, Mûrungu agatumîra Jesû Kristû kûgambithia antû bonthe nîûntû bwa mantû jarîa bathithagia wiithoone ntukû ya îgamba yakinya.

¹⁷Ûkëethîrwa nî ûciîtaga Mûyahudi na nî ûciaandîte Wathoone na ûgaikumîria ngwatanîro yaaku na Mûrungu;

¹⁸na nî wiijî weendi bwa Mûrungu na Waatho nî bûkûritanîte kwathûrana wega na ûthûûku;

¹⁹na gwe nî witaraga ûrî mûtongeeria wa atumuumu na weerû kîrî barîa barî muunduune;

²⁰na ûcionaga ûrî mwejani kîrîra kîrî barîa biaa na mûritani wa barîa batiijî mantû. Waatho nî bûkûete ûmenyo na ûûma.

²¹Gwe ûrîa ûritanaga bangî, nîmbi îgiragia wiritana gwengwa? Ûtûmagîîria ûkîîraga bangî bakáiya, ka gwe wiyaga nîkî?

²²Uugaga antû bakáthûngîîra, ka gwe ûthûngagîîra nîkî; nî ûmenete mîrungu ya mîng'uanano mono, ka wiiyaga kwa inya into kuuma biûrûûne biaayo nîkî?

²³Wikumagia atî nî ûthingataga Waatho bwa Mûrungu. Ka ûtîonaga atî nî ûmenaga Mûrungu rîrîa ûkuuna Waatho?

²⁴ O ta ûrîa Maandîko jakuuga: “Buî Ayahudi nî bûtûmîte antû barîa batî Ayahudi bathûûmbia riîtwa rîa Mûrungu!”

²⁵Gûtaanwa gwaaku gûkeethîrwa kûrî na gîtûmi këethîra gwe ûkoojûria ûrîa Waatho buugîîte. Îndî gûtaanwa gwaaku nî kwa ûtheri ta ûtîtaani, këethîra ûkauna Waatho.

²⁶Muntû ûtî Mûyahudi, ûtîtaani, akëeja kûthithia ûrîa Waatho bûkuuga, nî mma akajûkua ta muntû ûtaani.

²⁷Antû barîa bathithagia ûrîa Waatho bûkuuga, kinya këethîra batîtaani bakabûgambithia buî bwanenkeerwe Waatho na bûtaani îndî nî buunaga Waatho bûu.

²⁸Ndiuga atîrî, ûrîa wonekanaga bwa oome akari ta Mûyahudi na ataani tî kuuga ûrî Mûyahudi wa mma, nîûntû rûtaano rwa mma tî rûrîa rwonagwa na meetho.

²⁹Mûyahudi wa mma nî ûrîa ûrî Mûyahudi bwa ndeene. Ningî rûtaano rwa mma nî rûrîa rûrî nkoroone na nî ngûgî ya Roho wa Mûrungu. Muntû ûrîa ûkari ûu atîkumagua nî antû îndî nî Mûrungu ûmûkumagia.