Read KIMERU BIBLE PROTESTANT EDITION Aro 3 Bible Online

Aro 3 - KIMERU BIBLE PROTESTANT EDITION bible

Aro 3

¹Rîu rî nîmbi Mûyahudi akûrûkîte antû bangî nayo? Ningî gûtaanwa kwaao kûrî na baita îrîkû?

²Nî mma kûrî na baita na njîra cionthe. Bwa mbere Ayahudi nîbo Mûrungu aanenkeere ntûmîîri yaawe baikîria antû bangî.

³Îndî a gûkëethîrwa bamwe baao bataarî eetîkua? Ka kûrega gwîtîkia kwaao gûtûma Mûrungu atiga kwaa mwîtîkua?

⁴ Arî gûtîûmbîka! Reka Mûrungu atûûre arî mwîtîkua kinya këethîra antû bonthe bakaa arongo. O ta ûrîa Maandîko jaugîîte: “Gwe Mûrungu, rîrîa rîonthe waaragia, nteto ciaaku nî cieejaga cia mma; îgambeene rîaaku, gwe nîgwe ûûmbanaga.”

⁵Îndî këethîra ûthûûku bweetû ka bwonanagia atî ûrîa Mûrungu athithagia nî bwa mma, nîatîa tûkauga? Ga tûkauga atîthithîtie bûrîa bûrî bwa mma rîrîa agûtûkanûkia? (Aja ndîaria ta muntû.)

⁶Arî gûtîûmbîka! Këethîra Mûrungu tî mwîtîkua nîatîa oomba kûgambithia nthîgûrû?

⁷Îndî-rî gûkëethîrwa kûrega gwîtîkîka gwaakwa nîku kwonanagia atî Mûrungu nî mwîtîkua mono na mwago jwaawe jûkoonekana, nîmbi îtûmaga ngiitîrwa atî ni ndî mwîyia?

⁸Nîmbi îndî îgiragia tuuga, “Tûtueni kûthithagia ûthûûku nîkenda wega bwonora?” Ûu nîu antû bamwe bantujagîîra atî nîu ndîtanaga. Bau nabo bakagitîrwa îgamba bûbûûî ta ûrîa kwagîrîte!

⁹Tuuge atîa îndî? Ga tuî Ayahudi tûrî babeega nkûrûki ya bangî? Arî buru! Nîkwîthîrwa nî nthirîtie kwonania bwega atî Ayahudi na antû barîa batî Ayahudi, bonthe baathagwa nî meeyia.

¹⁰ O ta ûrîa Maandîko jaugîîte: “Gûtî muntû kinya ûmwe ûrî ûmwagîru, gûtî we buru,

¹¹gûtî kinya ûmwe ûgûciûkîrwa, gûtî kinya ûmwe ûgûcwaa Mûrungu.

¹²Bonthe nî batigîte kûthingata Mûrungu; bonthe nî bangaratanîte, gûtî kinya ûmwe ûthithagia ûrîa kwagîrîte, gûtî we buru.”

¹³ “Mîmero yaao nî kaburi îtîkunîki, ndûûme ciaao ciûjûri ûrongo na waayia, tûnyua twaao tuumaga nteto irî thumu ta ya njoka.

¹⁴ Ndwaria ciaao nacio nî irumi akî na rwaakaî.

¹⁵ Barî mpwîî cia gwîkîra bangî ngûma na kûûragana.

¹⁶O arîa beetaga batigaga maganjo na mîthangîko,

¹⁷na batiijî mantû ja thîîrî.

¹⁸ Ningî batîkîraga Mûrungu noo rî.”

¹⁹Nandî nî twijî atî o ûntû bunthe ndeene ya Waatho bwîkîri nîûntû bwa barîa baathagwa nî Waatho. Gûkari ûu nîkenda antû batîona bwa kwigwatia na nîkenda nthîgûrû yonthe îîja kûgambithua nî Mûrungu.

²⁰ Nîkwîthîrwa gûtî muntû kinya ûmwe ûkaa ûmwagîru nîûntû bwa kûthithia ûrîa Waatho buugaga, nîûntû Waatho bûrî o nîkenda antû bamenya meeyia nîmbi.

²¹Îndî nandî njîra îrîa Mûrungu atûmagîra kuigithania antû nawe nî îguûrîri antû. Njîra îîu îtiumanîtie na Waatho, kinya këethîra Waatho bwa Musa na iroria nî bigûkûjîîra ûntû bûû.

²² Mûrungu eetîkagîîria antû nî babaagîru rîrîa beetîkia Jesû Kristû. Mûrungu atîendagîîra bamwe nkûrûki ya bangî.

²³Nîkwîthîrwa antû bonthe nî beîîtie na baûrîrwa nî mwago jwa Mûrungu.

²⁴Îndî nîûntû bwa ûtugi bwa Mûrungu, bûrîa aeejanaga ta kîewa, nî aeethagia antû babaagîru gûkûrûkîîra kîrî Kristû Jesû, mûkûûri waao.

²⁵Mûrungu aaeejanîre Jesû Kristû arî kîgongwana nîûntû bwa meeyia jeetû. Tweethagua babaagîru rîrîa twetîkia atî Jesû Kristû eetûrîre tharike yaawe nîûntû bweetû. Mûrungu aathithîrie ûû nîkenda oonania atî we nî ûmwagîru. Mbereene Mûrungu nî eetagîîra omîrîtie na agacieethia atoonaga meeyia ja antû.

²⁶Îndî îgiita rîrî nî akanûkagia antû nîûntû bwa meeyia jaao nîkenda onania we wengwa nî ûmwagîru na atî nîwe wethagia muntû wonthe ûrîa wîtîkagia Jesû, ûmwagîru.

²⁷Tontû bûû, nî ûntû bûrîkû tûûmba gwikumîria? Gûtî bu! Nî gîtûmi kîrîkû twikumîria? Nî gîtûmi gîa kûûjûria Waatho? Arî! Îndî kîrîa tûûmba guikumîria nî atî nî twîtîkîtie.

²⁸Nîkwîthîrwa wîtîkio nîbu bûtûmaga muntû aethua ûmwagîru mbere ya Mûrungu, na tî kûûjûria ûrîa Waatho bûkuuga.

²⁹Kana ka Mûrungu arî Mûrungu wa Ayahudi akî? To we Mûrungu wa antû barîa batî Ayahudi kinya bo? Îî, nî Mûrungu wa barîa batî Ayahudi kinya bo.

³⁰ Tontû Mûrungu nî ûmwe, nî aeethagia Ayahudi bonthe barîa beetîkagia babaagîru na akaethia antû barîa batî Ayahudi babaagîru nîûntû bwa wîtîkio bwaao.

³¹Ka gwîtîkia gûgûtûma Waatho bwaga inya? Arî buru! Ûûma nî atî rîrîa tûrî na wîtîkio nîrîo tûingagia Waatho nkûrûki.