Read KIMERU BIBLE PROTESTANT EDITION Aro 4 Bible Online

Aro 4 - KIMERU BIBLE PROTESTANT EDITION bible

Aro 4

¹Nîatîa tûkaûga mantû jegiî Abrahamu kîûjûjû gîeetû?

²Këethîra Abrahamu aeere ûmwagîru nîûntû bwa mantû jarîa aathithîrie, oona ûntû bwa gwikumîria îndî tî mbere ya Mûrungu.

³ Nîkwîthîrwa Maandîko jariuga, “Abrahamu nî eetîkîrie Mûrungu, na Mûrungu aramwîtîkîîria aa ûmwagîru.”

⁴Mûriti wa ngûgî nî aeejagwa mûchaara, îndî mûchaara jwaawe tî kîewa, nîûntû nî îrîi rîaawe.

⁵Îndî antû barîa berîgagîîra wîtîkio antû a berîgîîra mathithio jaao na bageetîkia Mûrungu ûrîa ûrekagîra eeyia, nîbo wîtîkio bwaao bûtûmaga baa babaagîru.

⁶Daudi akîtharima antû barîa beetîkagia Mûrungu na bakaa babaagîru antû a gwîtîkia mathithio jaao, nî aaugîre ûûjû:

⁷ “Kîtharimo nî kîa antû barîa Mûrungu arekerete moothûûku jaao, barîa barekeri meeyia jaao.

⁸Kîtharimo nî kîrî muntû ûrîa Mwathani atîaandîkîra meeyia.”

⁹Kîtharimo gîkî ga kîrî kîa Ayahudi bonka? Arî buru! Nî gîa antû barîa batî Ayahudi kinya bo. Nîkwîthîrwa tûkûthiria kuuga: “Abrahamu nî eetîkîrie Mûrungu, na nîûntû bwa wîtîkio bwaawe Mûrungu aramweethia ûmwagîru.”

¹⁰Ûntû bûû bwathithîkîre rî? Nî mbere kana nî nyuma ya Abrahamu ataanwa? Nî mbere na tî nyuma ya agûtaanwa.

¹¹ Gûtaanwa kwaawe kwaarî rwano rwa kwonania atî Mûrungu nî aamweetherie ûmwagîru nîûntû bwa wîtîkio bwaawe kinya mbere ya ataanwa. Mûrungu aathithîrie ûu nîkenda Abrahamu aa îthe wa barîa bonthe beetîkagia Mûrungu batîtaani na akabaethia babaagîru.

¹²Ningî o ûu nîu aeere îthe wa barîa bataani, tî ûntû nî bataani îndî nîûntû nî baathingataga wîtîkio bûrîa îthe weetû Abrahamu aarî nabu kinya mbere ya ataanwa.

¹³ Mûrungu nî eekîîre wîrane na Abrahamu na nchiarwa ciaawe atî nthîgûrû yonthe îkeethîrwa îrî yaao. Ataeerwe wîrane bûu nîûntû bwa kûûjûria Waatho îndî aeerwe bu nîûntû nî eetîkîrie na araethua ûmwagîru.

¹⁴ Këethîra barîa bakaewa wîrane bûû nî barîa bathingataga Waatho, gûtîîthîrwa kûrî na gîtûmi gîa gwîtîkia na kinya wîrane bwîthîrwa bûrî bwa ûtheri.

¹⁵Nîkwîthîrwa Waatho nîbu bûretaga mûthûûro jwa Mûrungu na gûkeethîrwa gûtî na Waatho gûtîîthîrwa kûrî na kûrega kwathîkîra Waatho.

¹⁶ Kîu nîkîo gîtûmaga wîrane bwonora na njîra ya gwîtîkia, nîkenda bûkaejanwa na njîra ya ûtugi bwa Mûrungu kîrî nchiarwa cia Abrahamu cionthe. Wîrane nî kîrî barîa boojûragia Waatho na barîa beetîkîtie ta ûrîa Abrahamu eetîkîtie. Nîkwîthîrwa Abrahamu nîwe baaba weetû twinthe,

¹⁷ O ta ûrîa Maandîko jaugîîte, “Nî nkweethetie îthe wa mîgongo îmingî.” Ûntû bûu nî bwa mma kîrî Mûrungu ûrîa Abrahamu eetîkîrie. Mûrungu ûu nîwe ûriûkagia into birîa bikuîte na agatûma into bibierû birîa bitîtwîre o bionora.

¹⁸ Abrahamu nî eetîkîrie eerîgîîrîte mma ûntû bûtîkwîrîgîîrîka, atî we akaa îthe wa mîgongo îmingî, kûringana na ûrîa eeri, “Ûu nîu nchiarwa ciaaku ikaingîa ta njota.”

¹⁹ Kinya këethîra nî aarî mûkûrû wa mîaka akuî îgana rîmwe, na nî aijî atî mwîrî jwaawe nî teeka jûkuîte, na nî aijî mwekûrû waawe, Sara, aarî nthaata, wîtîkio bwaawe bûtaanyiia.

²⁰Abrahamu ataagîîre nkaanja ciegiî wîrane bûrîa aaei nî Mûrungu, îndî nîka wîtîkio bwaawe bwagîîre inya na aracokeria Mûrungu nkaatho.

²¹Nî aarî na mma atî Mûrungu arî na inya ya kûûjûria jarîa aamwîrîrîte.

²²Tontû bûû, wîtîkio bwaawe nî bwatûmîre “Mûrungu auga nî ûmwagîru.”

²³Îndî nteto iji, “Mûrungu auga nî ûmwagîru,” itaandîkîrwe nîûntû bwaawe akî.

²⁴Ciaandîkîrwe nîûntû bweetû, tuî barîa baejaga babaagîru nîûntû bwa gwîtîkia ûrîa waariûkîrie Mwathani weetû Jesû kuuma kîrî akuû,

²⁵ ûrîa wooragîrwe nîûntû bwa meeyia jeetû na arariûkua nîkenda atûethia babaagîru mbere ya Mûrungu.