Read KIMERU BIBLE PROTESTANT EDITION Aro 5 Bible Online

Aro 5 - KIMERU BIBLE PROTESTANT EDITION bible

Aro 5

¹Tontû bûû, nîkwîthîrwa nî tûethetue babaagîru nîûntû bwa gwîtîkia, tûrî na thîîrî na Mûrungu gûkûrûkîra kîrî Mwathani weetû Jesû Kristû.

²Jesû ûu nî atûmîte twona ûtugi bwa Mûrungu bûrîa tûtûûraga ndeene yaabu nandî. Tontû bûû, nî tûgwîragîrua wîrîgîîro bûrîa tûrî nabu bwa kwîja kûgaa mwago jwa Mûrungu.

³Nkûrûki ya bûu, nî tûgwîragîrua mathîîna nîûntû nî twijî mathîîna jareetaga kûûmîîria,

⁴kûûmîîria kûreetaga mîîtîre îmîega, na mîîtîre îmîega îgatûma kûgîa na wîrîgîîro.

⁵Wîrîgîîro bûu bûtîtûmaga tûkua nkoro, nîûntû Mûrungu nî atûûjûrîtie wendo bwaawe nkoroone cieetû gûkûrûkîîra Roho Ûmûtheru ûrîa aatweere.

⁶Rîrîa tûtoombaga gwiteethia, Kristû nî aakuîre nîûntû bweetû tuî eeyia îgiita rîrîa oneere rîagîrîte.

⁷Bûrî na inya muntû gûkua nîûntû bwa muntû ûmwagîru. Kwombîka muntû akoomîîria gûkua antû a muntû ûmwega.

⁸Îndî Mûrungu nî akwonania ûrîa aatwendeete, nîûntû rîrîa tuî twaarî eeyia, Kristû nî aakuîre nîûntû bweetû.

⁹Nandî nîûntû nî twigithanîtue na Mûrungu nî tharike ya Jesû Kristû, gûtî nkaanja agaatwonokia kuuma mûthûûroone jwa Mûrungu.

¹⁰Nîkwîthîrwa rîrîa tuî twaarî anthû ba Mûrungu, Jesû nî aakuîre nîkenda aatwigithania na Mûrungu. Tontû nandî nî atuigithanîtie na Mûrungu rî, ûtûûro bwaawe bûgatwonokia bûng'ana!

¹¹Ningî tî bûu bunka akî, nî tûgwîragîrua kwîthîrwa tûrî kîrî Mûrungu gûkûrûkîîra kîrî Mwathani weetû Jesû Kristû, ûrîa ûtûmîte twîthîrwa tûrî na ngwatanîro na Mûrungu.

¹² Meeyia jaareterwe nthîgûrûûne nî muntû ûmwe, najo meeyia jarareeta gîkuû. Tontû bûû, gîkuû kîrataamba kîragwata antû bonthe nîûntû antû bonthe nî beeîtie.

¹³Nî mma meeyia nî jaarî nthîgûrûûne mbere ya Waatho bûretwa, îndî Waatho bûkeethîrwa bûtî o meeyia jatîtaragwa.

¹⁴Amwe na jau gîkuû kîaathanîre kuuma îgiita rîa Adamu mwanka îgiita rîa Musa. Kîratua kwathaga kinya antû barîa meeyia jaao jataang'anene na ja Adamu, ûrîa waaremere Mûrungu. Adamu aarî mûthemba jwa muntû ûrîa ûkeeja nyumeene.

¹⁵Îndî ûtugi bwa Mûrungu bûrî mwanya mono na wîyia bwa Adamu. Nî mma wîyia bwa muntû ûmwe nî bwareteere antû bonthe gîkuû. Îndî Mûrungu nî aaeejanîre kîewa gîkînene kîa ûrekeri kîrî antû bonthe gûkûrûkîra kîrî muntû ûmwe, tawe Jesû Kristû.

¹⁶Kûrî na mwanya gatîgatî ka kîewa kîa Mûrungu na meeyia ja muntû ûmwe. Nîkwîthîrwa nyuma ya muntû ûmwe kwîyia, gûkanûkua nî kwambîrîrie, îndî nyuma ya antû babaingî kwîyia, Mûrungu nî aaere antû kîewa kîaawe kîa kûbaethia babaagîru.

¹⁷Nî mma meeyia ja muntû ûmwe, nîjo jaatûmîre gîkuû gîtua kwaathanaga nîûntû bwa muntû ûu. Îndî ûrîa Jesû Kristû aathithîrie nî bûkûrûkîte bûu mono. Bonthe barîa bajûkagia ûtugi na kîewa kîa Mûrungu gîa gûtûma muntû aa ûmwagîru, bagatûûra bakîathanaga ndeene ya Kristû.

¹⁸Rîu o ta ûrîa meeyia ja muntû ûmwe jaatûmîre antû bonthe bakanûkua, nou îthithio rîrîagîru rîa muntû ûmwe rîtûmaga antû bonthe bathaûrwa na boona ûtûûro bwa kenya na kenya.

¹⁹O ta ûrîa antû bonthe baeetherue eeyia nîûntû bwa muntû ûmwe kûrega kwathîka, ûu nou antû babaingî bakaethua babaagîru nîûntû bwa kwathîka kwa muntû ûmwe.

²⁰Waatho bwareterwe nîkenda mantû jamaaî joongeereka. Îndî rîrîa meeyia joongeerekaga, ûtugi bwa Mûrungu nîka bwongerekaga nkûrûki,

²¹nîkenda meeyia jaathaga antû mwanka gîkuûûne, na ûtugi bwa Mûrungu bwaathaga antû na njîra ya waagîru mwanka boona ûtûûro bwa kenya na kenya ndeene ya Jesû Kristû, Mwathani weetû.