Read KIMERU BIBLE PROTESTANT EDITION Aro 6 Bible Online

Aro 6 - KIMERU BIBLE PROTESTANT EDITION bible

Aro 6

¹Tuuge atîa îndî? Tûtûûre tûkîîagia nîkenda ûtugi bwa Mûrungu bwîta na mbere kwongeereka?

²Arî buru! Nîatîa tuî barîa twakuîre mantûûne jegiî meeyia, tûûmba gûtûûra tûkîîagia?

³Ka bûtiijî atî twinthe barîa baabatithîrue ndeene ya Kristû Jesû, nî twabatithîrue ndeene ya gîkuû kîaawe?

⁴ Tontû bûû, nî twathikanîîrue na Kristû Jesû rîrîa twabatithîrue ndeene ya gîkuû kîaawe, nîkenda o ta ûrîa Kristû aariûkîrue kuuma gîkuûne nî inya inene ya Îthe, o ûu nou kinya tuî tûkoona ûtûûro bûbwerû.

⁵Nîkwîthîrwa nî twagwatithanîrue nawe gîkuûne kîaawe, o ûu nou tûkagwatithanua nawe kûriûkeene kwaawe.

⁶Ningî nî tuîjî atî mîîtîre yeetû îrîa mîkûrû nî yaambanîîrue na Kristû, nîkenda kwenda kûthithia meeyia kûrîa gûtûûraga ndeene yeetû kûthirua tûtîkeeje kwaa nkombo cia meeyia kaîrî.

⁷Nîkwîthîrwa muntû ûrîa ûkuîte nî athaûri kuuma ûkomboone bwa meeyia.

⁸Rîu këethîra nî tûkujanîrîtie na Kristû, nî tûgwîtîkia tûgatûûra mwoyo amwe nawe.

⁹Nîkwîthîrwa nî tûkûmenya atî Kristû nî aariûkîre kuuma kîrî akuû na atîkorokua; gîkuû gîtîkoromwatha kaîrî.

¹⁰Gîkuû kîrîa aakuîre, aakuîre rîmwe na rîa mûthia nîûntû bwa meeyia. Nandî atûûraga arî na ngwatanîro na Mûrungu.

¹¹O ûu kinya buî no mwanka bwijûkie bûrî bakuû mantûûne jegiî meeyia, na bûtûûrage bûrî na ngwatanîro na Mûrungu ndeene ya Kristû Jesû.

¹²Tontû bûû, bûkáreka meeyia jaatha mîîrî yeenu kaîrî, na jatûma bûthingata mairîrîîria jaayo jamaaî.

¹³Ningî bûkárekeeria gîchunchî kinya kîmwe kîa mîîrî yeenu gîtûmîrwa na njîra imbîî kûthithia meeyia. Antû a kûthithia ûu, cieejaneni kîrî Mûrungu ta antû barîa bariûkîtue kuuma gîkuûne, na bûnenkanîre mîîrî kîrî Mûrungu nîkenda îtumîkaga mantûûne ja waagîru.

¹⁴Meeyia jatîbwatha kaîrî, nîûntû nandî bûtîathagwa nî Waatho îndî bwathagwa nî ûtugi bwa Mûrungu.

¹⁵Rîu tuuge atîa? Ka tûkathithagia meeyia nîûntû tûtîthingataga Waatho îndî twathagwa nî ûtugi bwa Mûrungu? Arî buru!

¹⁶Gûtî nkaanja nî bwijî atî rîrîa bwinenkanagîra kîrî muntû na bûkamwathîkîra, buî bweejaga nkombo cia muntû ûu. Bweejaga nkombo cia meeyia na jakareeta gîkuû, kana bûkaa nkombo cia kwathîkîra Mûrungu na bûkaa babaagîru.

¹⁷Îndî Mûrungu arocokerua nkaatho, nîûntû kinya këethîra kûrî îgiita bwaarî nkombo cia meeyia, nandî nî bwathîkîrîte mantû jarîa bwaritanîrwe kuuma nkoro cieenu na bûkathingata na bwairita kûjathingata.

¹⁸Ningî nîûntû nî bwathaûrîrwe kuuma meeyiene, nandî nî bûeete nkombo cia waagîru.

¹⁹Aja ndîaria naabuî ta ûrîa antû bangî baaragia nîûntû bwa ûûthû bweenu bwingwa. O ta ûrîa bwanenkanîre ichunchî bimwe bia mîîrî yeenu kûthithia ûthûngîrî na kinya kûthithia meeyia jamaingî nkûrûki, nandi cieejaneni bwee nkombo cia waagîru nîkenda bwaa babaagîru.

²⁰Rîrîa bwatwîre bûrî nkombo cia meeyia, bûtaarî nkombo cia waagîru.

²¹Nî mpongeeri îrîkû bwonere rîrîa bwathithagia mantû jau bwigagua nthao nîûntû bwaajo nandî? Mûthia jwa mantû jau nî gîkuû!

²²Nandî nî bûthaûri kuuma ûkomboone bwa meeyia, na bwaa nkombo cia Mûrungu. Mpongeeri yeenu nî kwethua babatheru na mûthieene nî ûtûûro bwa kenya na kenya.

²³Nîkwîthîrwa mûchaara jwa meeyia nî gîkuû; îndî kîewa kîa Mûrungu nî ûtûûro bwa kenya na kenya ndeene ya Kristû Jesû Mwathani weetû.