Read KIMERU BIBLE PROTESTANT EDITION Aro 7 Bible Online

Aro 7 - KIMERU BIBLE PROTESTANT EDITION bible

Aro 7

¹Ataana na aarî ba baaba, ndîbwarîria nîûntû nî bwijî Waatho! Ka bûtîkûmenya atî Waatho bwathaga muntû akî rîrîa arî mwoyo?

²Waatho buugaga mwekûrû ûgûri arî waathoone bwa mûkûrû waawe bûnka akî eethîrwa arî mwoyo. Îndî mûkûrû waawe akëeja gûkua mwekûrû ûu atî waathoone bwa muntû ûgûri kaîrî.

³Mwekûrû ûu akëeja kûjûkua nî muntû ûngî na mûkûrû waawe arî mwoyo, eethagîrwa arî mûthûngîîri. Îndî mûkûrû waawe akëeja gûkua, mwekûrû ûu atî waathoone bwa muntû ûgûri kaîrî na akägûrwa nî muntû ûngî atîîthîrwa arî mûthûngîîri.

⁴O ûu ataana na aarî ba baaba nîu bwakuîre mantûûne jegiî Waatho nîûntû bwa mwîrî jwa Kristû, nîkenda bwîthîrwa bûrî baawe, ûrîa waariûkîrue kuuma kîrî akuû nîkenda tûûmba gûciarîra Mûrungu maciara.

⁵Rîrîa twatûûraga ja antû bangî, mairîrîîria jeetû ja meeyia, jarîa jookaûkagua nî Waatho, nîjo jaaritaga ngûgî ndeene yeetû na maciara jaajo jaarî gîkuû.

⁶Îndî nandî tuî nî tûthaûri mantûûne jegiî Waatho, nîûntû nî tûkuîte mantûûne jarîa jaatûgwete ûkombo. Rîu twomba gûtumîkîra Mûrungu bwega, tî na njîra ya kwathîkîra Waatho îndî na njîra înjerû ya Roho.

⁷ Rîu îndî tuuge atîa? Tuuge Waatho nî meeyia? Arî buru! Këethîra Waatho bûtaarî o, ntîngîmenya meeyia nîmbi. Këethîra Waatho bûtîugaga “Ûkáirîrîria gîntû kîaitha,” ûûni ntîngîmenya kûrî gîntû ta kwirîrîria.

⁸Îndî Waatho nî bwatûmîre meeyia joona kaanya gakeega ndeene yaakwa na gagûtûma mbûjûrwa nî mairîrîîria ja mîthemba îmingî. Këethîra Waatho bûtîo meeyia jatîîthîrwa jarî na inya.

⁹Ûûni na bwaakwa kûrî îgiita ndaarî mwoyo rîrîa ntaarî na Waatho, îndî rîrîa ndaamenyere maathana, meeyia jarariûka na ndîrakua.

¹⁰Maathana jongwa jarîa jaarî ja gûtûma ngîta mwoyo, kîrî ni jarandetera gîkuû.

¹¹ Meeyia jaroona kaanya gakeega maathaneene, jarampayia na jarambûraga.

¹²Tontû bûû, Waatho na bwaabu nî bûûtheru, na rîathana na bwarîo nî rîîtheru, nabio nî bia îota na nî bibiega.

¹³Îndî ga nkuuga gîntû gîkîega nîkîo kîandeeteere gîkuû? Arî buru! Nî meeyia jaatûmîîre gîntû gîkîega kîndeteera gîkuû nîkenda meeyia jonekana bwega atî nî meeyia. Najo maathana joonania ndî mwîyia nkûrûki ya kîthimi.

¹⁴Nî twijî atî Waatho nî bwa kîroho; îndî ûûni nthithagia mantû ja kî-mwîrî, mpendetue ndaethua nkombo ya meeyia.

¹⁵ Ntîturagia mantû jarîa nthithagia. Nîkwîthîrwa ntîthithagia mantû jarîa mpendaga kûthithia; îndî mantû jarîa nthithagia nî jarîa nthwîre.

¹⁶Rîu gûkëethîrwa nthithagia mantû jarîa ntîkwenda kûthithia, nî ngwîtîkîîria atî Waatho nî bûbwega.

¹⁷Tontû bûû, tî ûûni nthithagia mantû jau, îndî nî meeyia jarîa jarî ndeene yaakwa.

¹⁸Nîkwîthîrwa nî mbijî atî gûtî ûntû kinya bûmwe bûbwega bûtûûraga ndeene yaakwa, ûu nî kuuga mwîrîîne jwaakwa. Nî ndirîragîîria kûthithia ûntû bûbwega, îndî ntîûmbaga kûbûthithia.

¹⁹Ûu nî kuuga, antû a nthithia ûntû bûbwega bûrîa mpendaga kûthithia, nthithagia ûntû bûbûthûûku bûrîa ntîendaga kûthithia.

²⁰Rîu këethîrwa ûûni nthithagia ûntû bûrîa ntîkwenda kûthithia, bûu bûrîonania atî tî ni nthithagia ûntû bûu, îndî nî meeyia jarîa jarî ndeene yaakwa jabûthithagia.

²¹Tontû bûû, nî menyete kûrî na Waatho atî rîrîa nkwenda kûthithia ûntû bûrîa bwagîrîte, kûrî ûntû bûbûûî bwîthagîrwa bûrî akuî naanî bûrîa nthuuraga kûthithia.

²²Nkoroone yaakwa nî ngwîragua mono nî Waatho bwa Mûrungu.

²³Îndî nî nkwona kûrî Waatho bûngî bûritaga ngûgî mwîrîîne jwaakwa, bûrîa bûrûjaga na ûrîa nkwenda na bûgampethia nkombo ya waatho bwa meeyia jarîa jatûûraga ndeene yaakwa.

²⁴Wûûi kîrî ni, ni muntû ûtî na nkerû! Nûû ûûmba kûmbathûrana na mwîrî jûjû jûmbikîtie gîkuûne?

²⁵Nî nkaatho kîrî Mûrungu gûkûrûkîîra kîrî Jesû Kristû Mwathani weetû. Tontû bûû, ûu nîu nkari; ntumîkagîra Waatho bwa Mûrungu na mathûgaanio akî îndî mwîrî jwaakwa jûgatûmîkîra waatho bwa meeyia.